Ermənistan Müdafiə Nazirliyi Fransadan qoşun istədi - bölgə "yanır"...
Rövşən Məhərrəmov: "Bu baş tutan deyil"
İrəvan Fransaya hərbi heyət göndərilməsi təklifi ilə müraciət edib. Bu barədə "Ermənistan müşahidəçisi" Teleqram kanalı məlumat yayıb.
Məlumata görə, Ermənistan Müdafiə Nazirliyi Fransanın İrəvandakı səfirliyi vasitəsilə Fransa hökumətinə "təcrübənin ötürülməsi və Fransa tərəfindən təchiz edilmiş silahlara texniki xidmətin təşkili" məqsədilə Ermənistan ərazisində yerləşdirilmək üçün məhdud qoşun kontingentinin hazırlanması barədə rəsmi təkliflə müraciət edib.
Fransa hərbi bazasının Ermənistan ərazisində yerləşəcəyi yer hələ müəyyən edilməyib.
Ermənistanın doğrudan da belə niyyəti ola bilərmi və bu baş tutsa ətraf ölkələrin: İran, Azərbaycan, Türkiyə və Rusiyanın məsələyə münasibəti necə olacaq?
Hərbi-siyasi şərhçi, ehtiyatda olan polkovnik Rövşən Məhərrəmov "Bakı-Xəbər"ə açıqlamasında bildirdi ki, bu rəsmi məlumat deyil, teleqram kanalından alınan xəbərdir: "Bildiyiniz kimi, Rusiyanın hərbi bazası Ermənistanda bu gün də yerləşir. Eyni zamanda İran və Türkiyə ilə sərhəddə sərhəd mühafizəsini də Rusiya sərhədçiləri həyata keçirir. Yəni belə bir məsələ bir müddət öncə qaldırılmışdı. Fransanın öz bazasını yerləşdirməsi ilə bağlı olan bu məsələyə qarşı İran və Mariya Zaxarova tərəfindən sərt açıqlamalar oldu. Əsasən də İranın mövqeyi çox sərt təsir bağışladı. Mən güman edirəm ki, bu gün ancaq təlimatçılar göndərə bilərlər. Onlar Fransanın təmin etdiyi texnikaların öyrədilməsi, üzərində təcrübə qazanılması istiqamətində hər hansı bir addım ata bilərlər. Hesab edirəm ki, Azərbaycan, Rusiya, Türkiyə buna sərt reaksiya verməlidir. Bu gün ABŞ - ın təlimatçıları Ermənistanda fəaliyyət göstərir, hərbiçiləri ilə təlimlər keçirlər. Fransanın isə bazasının yerləşdirilməsi heç vaxt yaxşı qarşılanmayacaq. Fikrimcə, bu baş tutan deyil. Müəyyən təlimatçıların Rusiyanın təmin etdiyi texnikanın üzərində mütəxəsislərin hazırlanması ilə bağlı hər hansı addım ola bilər. Yaddan çıxarmaq lazım deyil ki, Rusiyanın Cənubi Qafqazda öz marağı var. Eyni zamanda Rusiya Cənubi Qafqazdan çıxmaq istəmir. İlk növbədə Ermənistanda yerləşən bazalarını qoruyub saxlamağa çalışır. Odur ki, Rusiyanın mövqeyi Ermənistana öz gücündən istifadə edib təsir etməkdir. İran tərəfdən də bu addımlar atıla bilər".
Qeyd edək ki, erməni ordusunda xeyli sayda fransız mütəxəssis müşahidəçi kimi xidmət aparır və ordunun yenilənməsində iştirak edir, Bu da Şərq düşərgəsində yerləşən Ermənistan üçün qənaətbəxş deyil. Çünki burada əsas faktor Rusiyadır. Təbii ki, İran da kənarda qoyula bilməz. Rusiya üçün Fransa əsas düşmənlərdən biridir. Bir sözlə, Fransa ilə Ermənistan arasında hərbi əməkdaşlıq regionda yeni reallıqlar yaradır. Lakin bölgənin münasibətlər sistemini və müstəvisini dəyişə bilməyəcək. Əgər proses dərinə gedərsə, Rusiyanın Cənubi Qafqazda atacağı addımları görəcəyik. Amma bunu Ukrayna müharibəsi başa çatandan sonra aydın görmək olacaq.
Məhəmmədəli QƏRİBLİ
