Faiq Balabəyli: "Bu tədbirlər təkcə Fransa müstəmləkəçiliyindən əziyyət çəkən xalqlara dəstək deyil, həm də Fransanın özünün əsl simasının ifşa edilməsi üçün mühüm hadisədir"
Fransanın müstəmləkəçilik siyasətini dayandırmaq üçün bütün dünya səfərbər olmalıdır. Necə ki, vaxtilə mütərəqqi bəşəriyyət alman faşizminə qarşı səfərbər oldu və Hitlerin dəhşətli siyasətinin qarşısını aldılar, eləcə də Makronun həyata keçirdiyi müstəmləkəçiliyin yolunu bağlamalıdırlar.
Sözsüz ki, birlik nəticəsində Fransa müstəmləkəsi olan xalqları azadlığa çıxarmaq olar.
Uzun müddətdir ki, Azərbaycanda vətəndaş cəmiyyəti institutları, başqa ictimai qurumlar səviyyəsində Fransanın müstəmləkəçilik siyasətinə qarşı barışmaz mübarizə aparılır, Yeni Kolendoniya xalqına və başqa xalqlara ciddi dəstək verilir. Bu məqsədlə yaradılan Bakı Təşəbbüs Qrupunun bu sahəyə verdiyi töhfələr bəşəriyyətə böyük xidmət nümunəsidir.
Bildiyimiz kimi, iyunun 13-də Bakı Təşəbbüs Qrupunun dəstəyi ilə Keniyanın paytaxtı Nayrobidə "Dekolonizasiya prosesində beynəlxalq təhlükəsizlik, diplomatiya və effektiv kommunikasiyanın rolu" adlı hibrid konfrans təşkil edilib. Əvvəlcədən bildirildiyi kimi, konfransda 30-a yaxın Azərbaycan və Keniya media nümayəndələri, Fransanın müstəmləkəçiliyindən əziyyət çəkən Yeni Kaledoniya və Fransız Qvianasını milli müstəqillik hərəkatı və siyasi partiyalarının rəhbər heyəti və üzvləri iştirak edib.
Bakı Təşəbbüs Qrupunun tədbirləri Fransa müstəmləkəçiliyinin ifşasında hansı rolu oynayır?
"Bilməyənlər də bilir ki, XXI əsrdə, yeni dünyada Fransanın timsalında hələ də müstəmləkəçi dövlət mövcuddur"
Müstəqil.az saytının rəhbəri Faiq Balabəyli "Bakı-Xəbər"ə şərhində bildirdi ki, Bakı Təşəbbüs Qrupunun bu istiqamətdə fəaliyyəti misilsizdir. "Bakı Təşəbbüs Qrupunun yaradılmasının özü Fransa müstəmləkəçiliyindən əziyyət çəkən xalqlara böyük bir dəstək oldu. O xalqlar haqq səslərini bu qrupun vasitəçiliyi ilə dünyaya çatdırırlar. Bu baxımdan, onların bu yöndə fəaliyyətini yalnız alqışlamaq olar. Ötənlərdə bir söz vardı: "Qaysaq bağlamayan yaralar". Fransa bu xalqlara o qədər yaralar vurub ki, o yaralar indiyə qədər qaysaq tutmayıb. Fransa bu gün kiçik ada dövlətlərində yaşayan xalqları, toplumları illərdir ki, əsarət altında saxlayır. Mərakeşdə, başqa Afrika ölkələrində etdiyi əməlləri indi daha çox ada dövlətlərində təkrarlayır. Elə ölkələr var ki, sözdə müstəqildirlər, amma özləri yenə də Fransanın təsiri altındadadırlar. O ölkələr, o xalqlar öz azadlıqlarına qovuşmayıblar, amma qovuşmalıdırlar. İllər boyu Fransanın törətdiyi vəhşiliklər, istila və istismar siyasəti, sərgilədiyi müstəmləkəçilik davranışları bu xalqlara əziyyyətdən, əzilməkdən başqa bir şey verməyib. Fransa elə bir dövlətdir ki, onun yürütdüyü müstəmləkəçilik siyasəti yalnız kiçik ada dövlətlərində yaşayan xalqlara deyil, bütün bəşəriyyətə, mürərəqqi cəmiyyətlərə ziyan vurur. Fransanın özü və əlaltıları başqa xalqlara zülm etməyi dayandırmaq istəmirlər. Konkret olaraq Ermənistanın adını çəkə bilərik ki, uzun illər Fransadan dəstək alıb və Azərbaycan torpaqlarını 30 il işğalda saxlayıb, bu gün də revanşist siyasətindən əl çəkmir. Özü Avropanı, kiçik ada dövlətlərini, başqa ölkələri qarışdırır, əlaltısı Ermənistan da Cənubi Qafqazda pozuculuq etməkdə davam edir".
F.Balabəyli bildirdi ki, Fransanın tükürpədici cinayətlərini, hümanizmdən uzaq müstəmləkəçilik siyasətini Bakı Təşəbbüs Qrupu qədər dəqiq ifşa edən ikinci bir təşkilat bəlkə də yoxdur: "Bakı Təşəbbüs Qrupunun keçirdiyi silsilə tədbirlər Fransanın müstəmləkəçilik siyasətinin ifşa edilməsində misilsiz rol oynayır. Bu tədbirlər nəticəsində dünyanın hər yerində Fransanın müstəmləkəçi bir dövlət olduğu, kiçik ada dövlətlərinin əhalisini zülm altında saxladığı duyulur. Bilməyənlər də bilir ki, XXI əsrdə, yeni dünyada Fransanın timsalında hələ də müstəmləkəçi dövlət mövcuddur. Bu tədbirlər təkcə Fransa müstəmləkəçiliyindən əziyyət çəkən xalqlara dəstək deyil, həm də Fransanın özünün əsl simasının ifşa edilməsi üçün mühüm hadisədir" - deyə F.Balabəyli vurğuladı.
İradə SARIYEVA
