Sahil Kərimli: "Fransanın ictimai-siyasi proseslərinə Azərbaycanın müəyyən qədər təsiri olur"
Məlum olduğu kimi, Avropa Parlamentinə keçirilən seçkilərdən sonra məğlubiyyətə uğrayan Makron ölkəsində növbədənkənar seçkilər təyin edib.
Fransa prezidenti Emmanuel Makron Fransa Milli Assambleyasının buraxıldığını elan edib və 30 iyun tarixinə birinci, 7 iyul tarixinə isə ikinci tur olmaqla Assambleyanın növbədənkənar seçkilərini təyin edib.
Məlumata görə, bundan əvvəl Fransada Avropa Parlamentinə (AP) seçkilərdə qalib gələn "Milli Birlik" partiyası Makronu Fransa parlamentinə növbədənkənar seçkilər təyin etməyə çağırmışdı.
Qeyd edək ki, Milli Assambleya Fransa parlamentinin aşağı palatasıdır. Assambleyanın deputatları qanunların müzakirəsi və qəbulu, habelə zəruri dəyişikliklərin edilməsi ilə məşğuldu.
Bəllidir ki, Makron üçün həlledici məqam yetişib. Azərbaycan Makrona qarşı hansı pressinq addımları ata bilər? Çünki o bunu haqq edir. İstər 44 günlük müharibənin gedişində, istərsə də ondan sonrakı dönəmdə Azərbaycana qarşı qərəzli addımları ilə yadda qaldı. İndi bizim ona cavab verməyimiz üçün yaxşı zamandır. Məsələn, Fransanın Azərbaycandakı bəzi kiçik şirkətlərinin bağlanması, Fransa ilə şərikli müəsissələrin fəaliyyətinin dayandırılması, kimdə həmin ölkənin mükafatları varsa, ondan imtina edilməsi, Azərbaycan -Fransa parlamentlərarası dostluq qrupunun fəaliyyətinin müvəqqəti olaraq dayandırılması kimi addımların atılması seçki ərəfəsində Makrona çox sarsıdıcı zərbə vura bilər. Bu pressinqlər lazımdırmı?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Fransanın Azərbaycana qarşı düşmənçilik mövqeyi son dövrlərdə, xüsusilə də Makron hakimiyyəti dövründə açıq məcraya yönəldilmişdi: "Bu da, təbii ki, Fransa ilə Azərbaycanın münasibətlərinə çox ciddi təsir göstərirdi. Ümumiyyətlə, mən hesab edirəm ki, Makron hakimiyyəti təkcə Azərbaycana qarşı yox, bütün beynəlxalq arenada daim yanlışlara yol verib. Son dövrlərdə Makronun həm daxili, həm də xarici siyasəti fiaskoya uğrayıb. Bu da, təbii ki, Makronun seçkilərdə məğlubiyyətinə gətirib çıxaran əsas amillərdən biridir. Bundan sonra hansı addımlar atılacaq? Təbii ki, Azərbaycan daim öz haqlı və ədalətli mövqeyini qoruyub saxlamaq üçün Fransaya həm rəsmi, həm də qeyri - rəsmi nümayəndələr tərəfindən etirazlar bildirib. Mən hesab edirəm ki, bundan sonra da həm siyasi dairələr, həm də Azərbaycan ictimaiyyəti, ziyalıları Fransanın Azərbaycana qarşı olan bu siyasətini daim pisləyəcəklər. Düşünürəm ki, Azərbaycan tərəfi sərt və adekvat addımlar ata bilər, bu mümkündür. Fransanın ictimai - siyasi proseslərinə Azərbaycanın müəyyən qədər təsiri olur. O ki qaldı Fransaya qarşı rəsmi baxımdan hansısa sanksiyaların tədbiq edilməsinə, bunu ancaq gələcək zamanda görə bilərik. Ancaq mən hesab edirəm ki, hər hansı bir təhlükə olmasa da Makron hakimiyyətinin sonu gəlib çatıb. Seçkilər də heç bir müsbət nəticə verməyəcək. Fransanın son illərdə Makronun timsalında yarıtmaz və naşı beynəlxalq siyasət yürütməsi onun ölkədə nüfuzunun çox aşağı səviyyəyə düşməsi ilə nəticələnib. Mən hesab edirəm ki, Makron qarşıdakı seçkilərdə yenə də uğursuzluğa düçar olacaq".
Məhəmmədəli QƏRİBLİ
