Ramil Məmmədli: "Bütün bunlar bir daha Makron hakimiyyətinin əsl simasını göstərir"
Fransa 2029-cu ilə qədər istismardan çıxarılması planlaşdırılan "Miraj - 2000" qırıcı təyyarələrinin Ukraynaya təhvil verilməsi imkanını nəzərdən keçirir.
Fransız aviasiya eksperti, geosiyasi və strateji analitik Siril de Lattre deyir ki, bu təyyarələrin istismardan çıxarılması və onların Ukraynadakı münaqişə kontekstində mümkün zərərsizləşdirilməsi Paris üçün köhnəlmiş qırıcıları satmaq cəhdindən daha sərfəli həll yolu ola bilər: "Əvvəlcə bu qırıcı ixrac versiyası idi, lakin Fransa ehtiyacları üçün 35-40 ədəd saxladı. İstənilən halda, bu təyyarələr 2029-cu ilə qədər tədricən istismardan çıxarılmalı və F4.5 və ya F5 versiyasında Rafale qırıcıları ilə əvəz edilməlidir. Bu istismardan çıxarılan təyyarələrlə nə edəcəyini başa düşmək lazım idi: ya onları sökün, ya da satın - amma beşinci nəsil qırıcılar dövründə kimə".
O qeyd edib ki, sıradan çıxarılan təyyarələri Ukraynaya göndərmək və orada onların məhv edilməsini izləmək daha ucuz başa gələcək.
Görünən odur ki, prezident Emmanuel Makron Fransası yenə Ukraynanın başını aldadır. Ukraynaya müasir təyyarələr vermək əvəzinə, istismar müddətini bitirmiş "Miraj - 2000" qırıcılarını verir. Bundan əvvəl Fransa Ukraynaya "Bastion" zirehli maşınlarını verdi və məlum oldu ki, onlar keyfiyyətsiz olmaqla yanaşı, tamamilə döyüşə yararsızdır. Sonra həmin keyfiyyətsiz zirehli maşınlar Ermənistana verildi. Məlum olur ki, Makron əməllicə silah satışı dələduzluğu ilə məşğuldur.
"Bu o deməkdir ki, "Miraj – 2000" qırıcıları asanlıqla Rusiya hava hücumundan müdafiə vasitələrinin hədəfi olacaq"
Sözügedən məsələyə aydınlıq gətirən hərbi ekspert Ramil Məmmədli "Bakı-Xəbər"ə açıqlamasında bildirdi ki, Fransadan bunu gözləmək təəccüblü deyil: "Fransa sözdə Rusiyanın Ukraynaya hücumuna qarşıdır, amma əmədə bu prinsipiallığı görmürük. Baxmayaraq ki, Makron pafosla Fransa silahlı birləşmələrinin Ukraynaya göndərilməsindən dəm vurur. Çünki faktlar tamamilə başqa şey deyir. Məsələn, 2023-cü ildə dünyada silah ixracına görə Fransa ikinci yerə çıxıb. O vaxta qədər Rusiya ikinci idi. Ancaq böyük silah istehsalçısı olan Fransa Ukraynaya silah yardımına görə 15-ci yerdədir. Baxmayaraq ki, Fransa ən müasir silah istehsalçısıdır. Fransa özünü doğrultmuş uzaqvuran "Sezar" toplarını Ukraynaya verməyi əsirgəyir. Deyir Ukrayna bu artileriya vasitələrini əldə etmək üçün 2 il gözləməlidir. Bundan əvvəl Fransa Ukraynaya "Bastion" zirehli maşınlarını verdi və elə ilk günlərdə bu texnikalar özünü doğrultmadı. İndi də Ukraynaya istismardan çıxarılmış "Miraj – 2000" qırıcıları təklif edir. Halbuki, sözügedən qırıcı təyyarələr müasir tələblərə cavab vemir. Çünki 1970-ci illərdə hazırlanan "Miraj-2000" təyyarələri artıq Fransada istifadə olunmur. Müasir naviqasiya vasitələri ilə təmin olunmayıb. Bu isə o deməkdir ki, həmin təyyarələr asanlıqla Rusiya hava hücumundan müdafiə vasitələrinin hədəfi olacaq. Halbuki, Fransada müasir 5-ci nəsil "Rafale" qırıcıları istehsal olunur. Həmin təyyarələr daha effektivdir, nəinki ömrünü başa vurmuş "Miraj-2000" qırıcıları. Bütün bunlar bir daha Makron hakimiyyətinin əsl simasını göstərir. Onun necə dələduz və frıldaqçı olmasını sübut edir. Baxmayaraq ki, hər gün Ukrayna cəbhəsində minlərlə insan həlak olur. Fransa isə Ukraynaya boş ümidlər verir".
Vidadi ORDAHALLI
