Azər Həsrət: "Mənə elə gəlir ki, sözügedən hibrid formatda tədbirin keçirilməsi yeni bir presedent olacaq"
Afrikanın müxtəlif ölkələrindən olan bir qrup jurnalist, tanınmış bloger və vətəndaş cəmiyyəti fəalları, eləcə də Yeni kaledoniyalı jurnalistlərin iştirakı ilə iyunun 13-də "Dekolonizasiya, beynəlxalq diplomatiya və müasir dünyada kommunikasiyanın rolu" mövzusunda hibrid formatda dəyirmi masa müzakirələri və mətbuat konfransı keçiriləcək.
Bakı vaxtı ilə saat 16:00-da başlayacaq mətbuat konfransında Fransa təhlükəsizlik qüvvələrinin Yeni Kaledoniyada yerli kanak xalqının dinc etiraz aksiyasına zorakılıqlarla cavab verməsi və bunun nəticəsində 10-dan çox dinc sakinin öldürülməsi, yüzlərlə insanın yaralanması və həbs edilməsi məsələləri beynəlxalq ictimaiyyətin diqqətinə çatdırılacaq. Belə ki, Fransa hökumətinin qərarı ilə Yeni Kaledoniyaya giriş qapadılıb, qanunsuz komendant saatı hələ də davam edir. Fransa polisi və jandarma qüvvələri tərəfindən törədilən vəhşilikləri dünya ictimaiyyətindən gizlətmək məqsədilə adanın sahibi olan kanakların fundamental hüquqları kobud şəkildə pozularaq ifadə və fikir azadlıqları məhdudlaşdırılıb. İnformasiya blokadasını yarmaq və adada baş verənləri yerli rəsmilərin dilindən eşitmək üçün Bakı Təşəbbüs Qrupu hibrid mətbuat konfransı təşkil edir.
Konfransın məqsədi, həmçinin, Yeni Kaledoniyada və Fransanın digər müstəmləkələrində geniş vüsət alan insan hüquq pozuntularına media vasitəsilə dünya ictimaiyyətinin diqqətini çəkmək, Afrikada hələ də davam edən müstəmləkəçiliyin yeni mərhələsi – neokolonializmlə mübarizə istiqamətində kommunikasiya sahəsində birgə əməkdaşlığın qurulmasının müzakirə edilməsidir. Mətbuat konfransında Yeni Kaledoniyadan yerli rəsmilər jurnalistlərin suallarını cavablandıracaq. Tədbirdə 20-dən çox xarici media nümayəndəsinin iştirakı gözlənilir.
Bir çox ekspertlər hesab edir ki, bu mətbuat konfransı və müzakirələr Yeni Koledoniyanı blokadada saxlayan istilaçı Makronun üzərinə informasiya yürüşüdür və bu, Fransa prezidentinin yürütdüyü siyasətin ifşa edilməsi istiqamətində mühüm hadisə olacaq.
Bu mətbuat konfransının beynəlxalq əhəmiyyəti nə olacaq?
"...Diqtə edən böyük güclər anlayacaqlar ki..."
Siyasi şərhçi Azər Həsrət "Bakı-Xəbər"ə "Belə tədbirin keçirilməsi qlobal əhəmiyyət kəsb edir. Çünki dünyanın müxtəlif guşələrində səsini dünyaya çatdırmağa çətinlik çəkən xeyli xalqlar var. Özəlliklə də bunlar yerli xalqlardır. Onların torpaqları başqa daha güclü xalqlar tərəfindən işğal edilib, işğal altında tutulurlar. Təbiidir ki, işğal altında oluqlarına görə onların səsi boğulur. Yəni normal dövlətləri olmadığına, eyni zamanda işğal qaldıqlarına görə dünyaya çatdıra bilmirlər. Əlbəttə ki, bu böyük bir ədalətsizlik və haqsızlıqdır"-deyə bildirdi.
A.Həsrətin sözlərinə görə, Azərbaycan dövləti və Azərbaycan xalqı da belə haqsızlıqlarla uzun müddət üzləşib və bundan əziyyət çəkib, ona görə də bizim insanlarımız, xüsusilə də vətəndaş cəmiyyəti təmsilçilərimiz bu cür məsələlərə həssas yanaşırlar. "O baxımdan, mənə elə gəlir ki, sözügedən hibrid formatda tədbirin keçirilməsi yeni bir presedent olacaq. Yəni dünyada artıq xüsusilə də diqtə edən böyük güclər anlayacaqlar ki, o kiçik və heçə saydıqları xalqların səsinə səs verən normal, öz ayağı üstə dura bilən xalqlar və onların təmsilçiləri var. Düşünürəm ki, Azərbaycanda belə bir təşəbbüsün ayaq açıb yeriməsi və qlobal səviyyədə rol oynaması, əlbəttə, dünya üçün yeni bir mərhələnin başlanğıcı da sayıla bilər. Qeyd etdiyim kimi, həmin o xalqların dünyaya səsinin çatdırılması ilə bağlı çox ciddi problemlər mövcuddur. Azərbaycanda bu təşəbbüs, əlbəttə, onlar üçün əlavə və yeni imkanlar demək olacaq. Hər halda, biz Azərbaycan tərəfi olaraq bu addımı atırıq. Söhbət, təbii ki, dövlətdən getmir, bu bir vətəndaş cəmiyyəti təşəbbüsüdür. Hesab edirəm ki, bundan boğulmaqda, əzilməkdə, istibdad altında zülm görməkdə olan xalqlar bu məsələdə özlərinin səsini eşitdirmək üçün maksimum yararlanacaqlar. Bu yararlanma da onları istibdad altında tutan böyük güclərə nəhayət ki, daha ağıllı, daha vicdanlı, daha ədalətli davranmaq baxımından bir çağırış rolunu oynayacaq"-deyə A.Həsrət qeyd etdi.
Leyla QARAXANLI
