Vüqar Bayramov: "Qiymətləndirmə apardıqdan sonra bununla bağlı qərarın verilməsi gözləniləndir"
Bloomberg Agentliyi yazır ki, Avropa Kiyevlə Ukrayna ərazisindən qaz tranzitinin saxlanması mümkünlüyünü müzakirə edir. Bu barədə yazan Bloomberg qeyd edir ki, Avropa bu tranzitlə Rusiya qazı əvəzinə Azərbaycan qazının nəql olunmasını istəyir.
Belə ki, Rusiya qazının Avropaya Ukrayna ərazisi ilə nəqlinə dair müqavilənin müddəti bu ilin sonunda başa çatır. Kiyev tranzitin uzadılmasına dair Rusiyanın Gazprom şirkəti ilə heç bir razılaşma imzalanmasını planlaşdırmır. Bloomberg vurğulayır ki, Azərbaycan qazının Avropaya nəqlindən mənfəətlənən Slovakiya olacaq. Belə bir tranzit imkanını Slovakiyanın baş naziri Robert Fitso may ayında Bakıya səfəri zamanı müzakirə edib. Onun sözlərinə görə, belə bir razılaşma əldə olunarsa, Bratislava Azərbaycandan qazın idxalına başlaya bilər. Slovakiya bu qazın bir hissəsini özündə saxlamağı, qalan həcmlərini isə başqa ölkələrə nəql etməyi planlaşdırır. O da qeyd edilir ki, Rusiya qazının Azərbaycan qazı ilə əvəzlənməsinə dair qərar bu ilin sonundan tez olmayaraq qəbul edilə bilər.
Maraqlıdır, ümumən ekspertlər Ukrayna vasitəsi ilə Azərbaycan qazının nəqli perspektivini necə dəyərləndirir?
"Bu, Azərbaycanın Avropanın enerji təhlükəsizliyinin formalaşmasında rolunu gücləndirir"
Sözügedən məsələni "Bakı-Xəbər"ə şərh edən millət vəkili Vüqar Bayramov buna bir neçə aspektdən yanaşdı: "Azərbaycan öz mavi qazını fərqli yollarla Avropa bazarına çıxarır. Cənub Qaz Dəhlizi daha sonra Yunanıstan-Bolqarıstan interkonnektorundan istifadə edə bilməsi daha çox ölkələrin mavi qaza olan tələbinin ödənilməsinə imkan yaradır. Praktik olaraq Yunanıstan-Bolqarıstan interkonnektorun ötürmə qabiliyyətinin artırılması Mərkəzi və Şərqi Avropada daha çox ölkələrin Azərbaycan qazı almasına gətirib çıxaracaq. Ancaq təbii ki, digər alternativ mənbələr də müzakirə oluna bilər. Mütəmadi olaraq da alternativ mənbələrlə bağlı fikirlər təqdim olunur və bu istiqamətdə müzakirələr aparılır. O cümlədən, Ukrayna vasitəsi ilə Avropaya qaz ixrac etmək olar. Ancaq nəzərə almaq lazımdır ki, bunun xərcinin, eyni zamanda texniki parametrlərinin hesablanmasına ehtiyac var. Bu, Azərbaycanın Avropanın enerji təhlükəsizliyinin formalaşmasında rolunu gücləndirir. Bu konteksdən də praktiki olaraq biz Avropa ilə Azərbaycan arasında qaz əməkdaşlığının güclənməsini müşahidə edirik. O baxımdan, alternativ yollarla, o cümlədən, Ukrayna ərazisindən Azərbaycan mavi qazının nəql edilməsi ilə bağlı müzakirələrin aparılması istisna deyil. Ancaq bunun maliyyə tutumu, eyni zamanda xərçi, həmçinin texniki parametrlərinin hesablanmasına ehtiyac var. Bu konteksdən də yalnız qiymətləndirmə apardıqdan sonra bununla bağlı qərarın verilməsi gözləniləndir".
Vidadi ORDAHALLI
