Yadigar Məmmədli: "İstənilən halda görünən odur ki, Avropada seçkilər heç də ideal səviyyədə keçmədi"
Məlum olduğu kimi, iyunun 6-dan 9-dək Avropanın 27 ölkəsində Avropa İttifaqının əsas qanunverici orqanı olan Avropa Parlamentinə seçkilər keçirilib. Ancaq seçkilər heç də ideal səviyyədə keçirilməyib. Seçkilərdə bir sıra texniki qüsurlar özünü büruzə verib.
Məsələn, Belçikada seçki zamanı kompüterlər sönüb. Eyni zamanda Belçikada Avropa Parlamentinə və ölkənin federal parlamentinə seçkilər zamanı ilbizlər seçicilərin probleminə çevrilib. Bildirilib ki, ilbizlər belçikalıların poçtla aldıqları çağırış vərəqlərini yeyirlər. Sərin və yağışlı günlər səbəbindən ilbizlərin sayı artdığı üçün kənd yerlərindəki seçki dairələri daha çox zərər çəkib.
Belədə, ən xırda qüsura görə Azərbaycanda keçirilən seçkiləri tənqid edən, bir sıra məsələləri şişirdən müəyyən beynəlxalq təşkilatlar Avropa ölkələrində keçirilən seçkilərdə yaşanan texniki qüsurları görməzdən gəlirlər. Elə görüntü yaratmağa çalışırlar ki, guya hər şey ideal səviyyədədir. Əslində isə bu, belə deyil.
"Reallıq ondan ibarətdir ki, bu çatışmazlıqlar ortadadır və inkişaf etmiş Avropa ölkələrində baş verir"
Sözügedən məsələ ilə bağlı fikirlərini "Bakı-Xəbər"lə bölüşən media eksperti Yadigar Məmmədli hesab edir ki, digər dövlətlərə ideal seçkilərdən bəhs edən bir sıra Avropa dövlətləri nədənsə öz ölkələrində bunu yüksək səviyyədə təşkil etmirlər: "Ya da təşkil etmək istəmirlər. Avropa İttifaqının əsas qanunverici orqanı olan Avropa Parlamentinə keçirilən seçkilər bizim diqqət mərkəzimizdədir. Baxmayaraq ki, bizim deputatlarımız AŞPA-da fəaliyyətini dayandırıb. Ancaq istənilən halda görünən odur ki, Avropada seçkilər heç də ideal səviyyədə keçmədi. Seçici fəallığı aşağı oldu. Bütövlükdə, Avropa İttifaqı üzrə seçkilərdə seçici fəallığı 51 faiz təşkil edib. 2019-cu ildə keçirilən son seçkilərdə isə ümumi seçici fəallığı 50,66 faiz olub. Digər tərəfdən diqqəti çəkən məqamlardan biri də o oldu ki, bu seçkidə bir sıra texniki qüsurlar üzə çıxdı. Belçikada, İtaliyada, İspaniyada və digər üzv ölkələrdə müxtəlif texniki problemlər ortaya çıxıb. Bu onu göstərir ki, böyük miqyaslı seçkilərdə belə, bir sıra qüsurlar yaranır. Ancaq təəssüf ki, Azərbaycanda baş verən bu tipli problemlərə başqa eynəklə baxırlar. Hər vasitə ilə çalışırlar ki, qüsurları böyütsünlər. Halbuki, xırda qüsurlar istənilən vaxt baş verə bilər. Təəssüf ki, bu bir reallıqdır. Digər tərəfdən reallıq ondan ibarətdir ki, bu çatışmazlıqlar ortadadır və inkişaf etmiş Avropa ölkələrində baş verir. O Avropa ki, bu kimi məsələlərdə özlərini digər dövlətlərdən üstün, ideal hesab edirlər. Bax, paradoksal hal budur".
Vidadi ORDAHALLI
