Mübariz Göyüşlü: "Bu, pul qazanmaq məqsədilə ortaya çıxarılan bir filmdir, burada bəhs olunanların gerçəkliklə heç bir əlaqəsi yoxdur"
Cinayətkarı qəhrəmanlaşdırmaq, cani ilə öyünmək yalnız erməni cəmiyyətinə xasdır, çünki onlar həmişə cinayət törədən, terrorçuluqla məşğul olan, terrora, revanşizmə maliyyə ayıran şəxsləri "insanlıq etalonu" kimi təqdim edirlər".
Belə olmasaydı, İrəvanın mərkəzində, Ermənistanın başqa-başqa şəhərlərində terrorçulara, canilərə, faşist əlaltılarına heykəllər qoymazdılar, Ruben Vardanyan kimi cinayətlarlara, fırıldaqçılara, separatçılara, terrora maliyyə verənlərə, antisülh mövqeyində olanlara filmlər həsr etməzdilər.
Qarabağdakı keçmiş qondarma qurumun "dövlət naziri", törətdiyi çoxsaylı cinayətlərə görə hazırda Bakıda həbsdə olan milyarder Ruben Vardanyan barədə Ermənistanda film çəkilib, hətta filmin təqdimatı belə olub. Maraqlıdır, filmə də "İnsan olmaq: Ruben Vardanyanın manifesti" adı qoyublar ki, bu da heç heç onun gerçək əməlləri ilə uzlaşmır. Filmin adı da lap Marks və Engelsin 1848-ci ildə yazdıqları "Kommunist Manifestinə" bənzəyir, o manifestin məqsədi aydın idi, inanırdılar ki, dünyanı kapitalizmdən xilas edə bilərlər. Vardanyan haqda film çəkənlərin də məqsədi gizli deyil, onu - insanlığın üz qarasını qəhrəmanlaşdırmaq və "sülh quşu" kimi təqdim etmək istəyirlər. Sanki cinayət törətməklə, separatçıların pul kisəsi olmaqla o, böyük bir qəhrəmanlıq edib, bunlar da onun "qəhrəmanlıq epopeyasını" yaradıblar.
Rubeni elə qələmə verirlər ki, guya o aydan arı, sudan duru bir insan olub, bütün həyatını "elmə, təhsilə, maarifə həsr edib, bu sahələrə maliyyə vəsaiti xərcləyib".
Guya cani Ruben "uzaqgörən, xeyriyyəçi, maarifçi" birisi olub və filmdə də bunlar işıqlandırılıb. Yəni filmdə Rubenlə yaxından-uzaqdan əlaqəsi olmayan mifik məsələlərdən bəhs ediblər.
Yazırlar ki, Vardanyanın "həyat hekayəsi"nə həsr olunan filmə erməni və ingiliscə subtitrlərlə baxmaq mümkündür. Yəni tez-bazar qondarma filmin subtitrinin ingilscəsini də düşünüblər ki, onun gopalogiyasını daha çox insan duysun. Filmdə Vardanyanın ayrı-ayrı dövrlərdə verdiyi müsahibələrdən parçalar yer alıb. Guya xeyriyyəçilik, təhsilin inkişafına dəstək cani Rubenin missiyası olub. Belə idisə, bəs Rubenin Qarabağda, Azərbaycan torpağında nə işi vardı, niyə gedib təhsillə məşğul olmurdu, gəlib orada kukla "dövlət nazir"i olurdu, terrora pul verirdi, terrorçuları pulla bəsləyirdi, onlara işğal etdikləri torpaqlardan bərk yapşmağı təlqin edirdi?
R.Vardanyan kimilərinin missiyası cinayətdir, canilikdir, fırıldaqçılıqdır, başqa missiyaları yoxdur.
Bir sıra ekspertlər hesab edir ki, ermənilərin Ruben barədə mifik hekayələrin motivləri əsasında tez-tələsik film çəkməsinin səbəbi başqadır, onlar bu filmi dünyaya yaymaqla onu "humanist missiya daşıyıcısı" kimi qələmə vermək istəyirlər. Guya o, ancaq "humanitar layihələrə dəstək olub, sülh tərəfdarı kimi tanınıb" və sair kimi rəy yaratmaq istəyirlər. Nəzərə alsaq ki, onlar cinayətkar Vardanyanı həm də "Nobel" sülh mükafatına təqdim etmək istəyirdilər, amma niyyətləri baş tutmadı, indi də belə bir filmlə onu dünyada "humanist missiya daşıyıcısı" kimi tanıtmaq istəyirlər.
"Vardanyan insanlıq adına ləkə olan bir cinayətkar ünsürdür"
Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə şərhində bildirdi ki, bu film Vardanyanın çirkli pulları hesabına çəkilib və onu çəkənləri də bu işə gəlir əldə etmək niyyəti vadar edib. "Ruben Vardanyanın nə insanlığı, nə əməlləri, nə də tutduğu əyri həyat yolu imkan verir ki, o "humanist insan" kimi qələmə verilsin. Vardanyan insanlıq adına ləkə olan bir cinayətkar ünsürdür. Onun kriminal keçmişi var, terrorizmi maliyyələşdirib, çirkli pulların yuyulması kimi cinayət əməllərinə sahibdir. Bütün mənfi əməllərin sahibidir, terrorizimə, separatizmə dəstək verib. Belə birisi barədə bu adda film çəkilməsi gülüş və istehza doğurur. Rubenin insanlıqdan, humanizmdən xəbəri olub ki, onun barəsində sifarişlə, pulla "İnsan olmaq: Ruben Vardanyanın manifesti" adlı film çəkiblər? Bu olduqca absurd məsələdir. Bu, pul qazanmaq məqsədilə ortaya çıxarılan bir filmdir, burada bəhs olunanların gerçəkliklə heç bir əlaqəsi yoxdur. Vardanyan qaranlıq keçmişi ilə məşhur olan adamdı"-deyə M.Göyüşlü bildirdi.
M.Göyüşlü qeyd etdi ki, Vardanyan sahib olduğu milyardları düzgün yolla yox, əyri yollarla, qaranlıq və kriminal işlərlə qazanıb. "Vardanyan Azərbaycan xalqına və dövlətinə qarşı dövləti cinayətlərdə iştirak edib, ağır cinayətlərin iştirakçısı olub. Bu səbəbdən də hazırda mühakimə olunur. Biz inanırıq ki, o, layiq olduğu cəzanı alacaq"-deyə M.Göyüşlü vurğuladı.
İradə SARIYEVA
