Yeganə Hacıyeva: "Sonda müxalifətin əsas təklifi kimi bu mövzunu qabarda bilərlər"
"Bu gün Ermənistanın Azərbaycanla nə danışıqları, nə də əlaqələri var", - "Vətən naminə Tavuş" hərəkatının rəhbəri arxiyepiskop Baqrat Qalstanyan xarici mediaya müsahibəsində bildirib:
"Biz real danışıqların tərəfdarıyıq və real danışıqlar simulyasiya əsasında deyil, real insanlar arasında real münasibətlərdə aparılmalıdır. Bütün bu münasibətlər məcburiyyət və ya güc təhdidi ilə deyil, nümunəvi gündəmlə, danışıqlar masası üzərindəki məsələlərin müzakirəsi ilə, sülh müqaviləsi imzalamaq istəyi ilə qurulmalıdır.
Əhəmiyyətli məqam ondan ibarətdir ki, bu danışıqlar qarantların iştirakı ilə aparılmalıdır, bunun üçün ən yaxşı platforma ATƏT-in Minsk qrupudur".
Çox maraqlıdır, Azərbaycan ən yuxarı səviyyədə ATƏT Minsk qrupunun fəaliyyətinin tam ləğvinə çalışır. Hətta bununla bağlı Ermənistana da müraciət edilib ki, lüzumsuz qurumun ləğvi ilə bağlı onlar da müraciət etsin. Belə olan təqdirdə, Ermənistandakı revanşist müxalifət Minsk qrupunun bərpasını istəyir. Ola bilərmi ki, bu məsələdə Ermənistan iqtidarı ürəyindən keçənləri müxalifətin dili ilə dedizdirir?
Politoloq Yeganə Hacıyeva "Bakı-Xəbər"ə açıqlamasında bildirdi ki, Ermənistanda keçirilən etirazlar və onların ölkə daxilində işıqlandıran media və iştirakçı sayı onu deməyə əsas verir ki, aksiyaların sifarişi həm də ölkə rəhbərliyindən gəlir: "Bu bir neçə istiqamət üçün Nikol Paşinyana lazımdır. Bununla dünyaya göstərir ki, o həqiqi demokratdır, ölkəsində etirazlar keçirilir. Bu etirazların önündə də din gedir. Siyasi qrupların tam tükəndiyi obrazını yaradır. Getdikcə aksiyalarda iştirak edənlərin sayı azalır. Paşinyan həm də özünün səsləndirə bilmədiyi mövzuları müxalifətin dili ilə deyir. Ölmuş ATƏT-in Minsk qrupu ilə bağlı səslənən təkliflər də bu qəbildəndir. Sonda müxalifətin əsas təklifi kimi bu mövzunu qabarda bilərlər. Sifarişin hakimiyyətdən gəlməsi dəqiqdir. Prezident İlham Əliyev ATƏT-in Minsk qrupunun və onun bəzi təsisatlarının ləğvinin vaxtının gəlib çatdığını bu ilin fevralında sözügedən təşkilatın baş katibi xanım Şmidlə Münxendəki görüşündə demişdi. Minsk qrupuna həmsədrlik edənlərin və ümumiyyətlə, ATƏT-i təsiri altında saxlayan böyük güclərin sözügedən təsisatların ləğv olunmasını qətiyyən istəmədiklərini bilə-bilə dövlət başçısı bu məsələni ikinci dəfə bugünlərdə Bakıda səfərdə olan ATƏT sədri ilə görüşdə də dedi. Son olaraq Xudafərindəki açılışda da dövlət başçısı Azərbaycanın bu tələbini yenidən təzələdi. Minsk qrupunun fəaliyyətini davam etdirməyin məntiqi qalmayıb. ATƏT rəhbərliyi bu məsələni uzatmamalıdır. Digər tərəfdən, Ukrayna müharibəsi fonunda ABŞ və Fransanın digər həmsədr Rusiya ilə dialoqunu davam etdirməsi mümkün deyil. Minsk qrupu məsələsində tək qalan Fransa ATƏT-ə "Minsk qrupu qalmalıdır" siyasətini diktə edə bilməz".
Məhəmmədəli QƏRİBLİ
