Azər Həsrət: "Qərbin bu məsələdə iki standatlar sərgiləməsi səbəbindən Azərbaycanla bağlı belə konfranslar keçirilmədi"
Bu həftə Qərb İsveçrədə Qlobal sülh sammiti keçirəcək. Qərb Ukrayna üçün belə bir sammit keçirir. Amma vaxtilə Azərbaycan torpaqları işğalda olanda Qlobal sülh sammiti keçirmədilər, hətta öhtəliyi olmasına baxmayaraq Minsk konfransını belə çağırmadılar, bu cür konfransın keçirilməsinin adı çəkilmədi.
Bu dünyanın, Qərbin ikili standartlarının nəticəsdir. Bu da Azərbaycana bir daha haqq və əsas verir ki, Azərbaycan öz torpaqlarını özü azad etməkdə tamamilə haqlı idi.
Azərbaycanın torpaqları işğal altında olanda niyə belə konfrans təşkil olunmadı?
Ekspertlər qeyd edir ki, münaqişənin həlli ilə bağlı Minsk konfransı təşkil olunmalıydı, amma Qərb bu addımı atmadı və həmin dövrdəki status-kvonu qorumağa çalışdı. Ekspertlər deyir ki, Qərb hər zaman Azərbaycana ədalətsiz mövqeyi göstərdiyi üçün Azərbaycan özü münaqişəni hərbi və siyasi yolla həll etdi.
"Bu ikiüzlülüyün, ikili standartların daha bir bariz nümunəsidir"
Siyasi şərhçi Azər Həsrət "Bakı-Xəbər"ə şərhində bildirdi ki, bu Qərbin Azərbaycana qarşı ayrı-seçkilik siyasətinin göstəricisi idi. "Burada təəccüblü heç nə yoxdur. Çünki Qərb Ermənistan-Azərbaycan münqişəsində ədalətsiz bir şəkildə Ermənistanın tərəfində idi. Ermənistan "qalib" tərəf idi, torpaqlarımızı işğal altında saxlayırdı. Bu da Qərbə sərf etdiyinə görə onlar o münaqişənin həll edilməsi, işğalın başa çatdırılması üçün elə də tələsmirdilər. Qərbin bu məsələdə iki standatlar sərgiləməsi səbəbindən Azərbaycanla bağlı belə konfranslar keçirilmədi".
A.Həsrətə görə, düzdür, vətəndaş cəmiyyəti təşəbbüsləri çərçivəsində, yaxud başqa şəkildə hansısa əhəmiyyətsiz, bəzən də mənasız görüşlər, müzakirələr olub, amma Qlobal sülh sammiti səviyyəsində cəhdlər olunmadı. "İndi isə Ukrayna Qərbə lazımdır, Rusiya çökməlidir, yəni Qərbin məqsədi budur, bu baxımdan da, bu konfransı keçirirlər. Yəni biz təəccüblənmirik, burada qəribəlik də görmürük. Bu ikiüzlülüyün, ikili standartların daha bir bariz nümunəsidir.
Əlbəttə, indi kimsə durub deyə bilər ki, Ukrayna ilə bağlı keçiriləcək sammitin nəyi pisdir? Əlbəttə, biz deyirik ki, əksinə qoy müharibə tez bitsin, Ukrayna xalqı da nəhatəy öz azadlığına qovuşsun, torpaqlarına sahib olsun. Amma yenə də o sualı verməyə bilmirik ki, necə olur, Azərbaycan torpaqları işğal altında olanda bu Qərbin tükü də tərpənmirdi, amma indi Ukraynanın torpaqları işğal altındadır, bunların tükü də tərpənir, üstəlik, bu qədər silah, sursat, maliyə yardımları edirlər, əlavə olaraq da bu cür tədbirlər də keçirirlər. Biz sualı verməkdə haqlıyıq, heç kim də bizə irad tuta bilməz ki, niyə bu məsələyə belə yanaşırsız" - deyəA.Həsrət vurğuladı.
İradə SARIYEVA
