İlyas Hüseynov: "Keçmiş prezidentlər Serjik Sarkisyan və Robert Koçaryan daim revanşizm dalğasını gücləndirməklə məşğuldular"
"Onlar revanşizm ideyalarından tamamilə imtina etməlidirlər və biz görürük ki, belə ideyalar təkcə müxalifətdə deyil, iqtidarda da var. Bütün bu məsələlər, təbii ki, aydınlaşdırılmalı və tənzimlənməlidir". Bunu Prezident İlham Əliyev iyunun 6-da TÜRKPA-nın Baş katibi Mehmet Süreyya Eri, Türkiyə Böyük Millət Məclisinin sədri Numan Kurtulmuşu, Qazaxıstan Parlamenti Məclisinin sədri Yerlan Koşanovu, Qırğızıstan Joqorku Keneşinin sədri Nurlanbek Şakiyevi, Özbəkistan Ali Məclisi Senatının sədri Tənzilə Narbayevanı, Şimali Kipr Türk Cümhuriyyəti Məclisinin sədri Zorlu Töreni və Macarıstan Milli Assambleyasının sədrinin müavini Marta Matraini qəbul edərkən deyib.
Azərbaycan Prezidenti erməni revanşistlərin hərbi planlarını deşifrə etdi. Bu da o deməkdir ki, hazırda Ermənistanda keçmiş prezidentlər Sarksyan və Koçaryan da daxil olmaqla revanşizm hissi ilə yaşayan və hakimiyyətə can atan qüvvələr mövcuddur. Sözsüz ki, həmin qüvvələr niyyətlərini açıq bəyan edirlər və hakimiyyətə gələrək yenidən müharibəyə başlamaq planları qururlar. Azərbaycan Ermənistanın bu çirkin niyyətlərindən xəbərdardır və bu səbəbdən də ölkəmiz hər zaman hazır olmalı, təhlükəsizlik tədbirləri davam etdirilməlidir. Dəfələrlə, bəyan edildiyi kimi, Ermənistan heç bir halda Azərbaycana qarşı həmlələrlə uğur əldə edə blməz, belə bir cəhd olarsa, bu, Ermənistan dövlətinin sonu olacaq.
"Cənab Prezident bu çıxışı ilə onların çirkin məqsədlərini ifşa etdi..."
Politoloq İlyas Hüseynov baki-xeber.com-a şərhində bildirdi ki, Prezident İlham Əliyev TÜRKPA nümayəndə heyətini qəbul edərkən mühüm məsələlərə toxundu, təhlükəsizlik aspekti haqda fikirlərini bölüşdü. "Eyni zamanda regional təhlükəsizlik haqda danışarkən qeyd etmək lazımdır ki, Ermənistanda həm müxalifətdə, həm də elə iqtidar komandasında revanşizm ideyaları ilə yaşayan, bu ideyaları genişləndirməyə çalışan şəxslər var. Bu şəxslərin əsas məqsədi regional qarışıqlıq yaratmaq, müharibə yolu ilə bölgəni yeni gərginlik mərhələsinə daşımaq və bununla özü üçün qazanc axtarışı güdürlər. Keçmiş prezidentlər Serjik Sarkisyan və Robert Koçaryan daim revanşizm dalğasını gücləndirməklə məşğuldular, bu cür çirkin planlar qururlar. Məhz buna görə Azərbaycan öz təhlükəsizlik sistemini gücləndirməklə məşğuldur"-deyə İ.Hüseynov bildirdi.
İ.Hüseynov qeyd etdi ki, həm ordunun gücləndirilməsi, müasir silahlara əlçatanlığın təmin olunması, həmçinin hər bir təhlükəsizlik üçün yarana biləcək təhdidləri vaxtında preventiv yollarla aradan qaldırmaq əsas hədəfdir. "Mənə elə gəlir ki, təhlükəsizlik tədbirləri, hətta Azərbaycanla Ermənistan arasında sülh müqaviləsi imzalansa belə, genişləndirilməlidir. Sülh müqaviləsi o demək deyil ki, Ermənistanın arxasında duran qüvvələr bölgəni qarışdırmaq istəməyəcəklər. Ona görə də burada əsas məqsəd ölkəmizin milli təhlükəsizliyini daha da gücləndirmək və hər bir məkrli ssenariyə hazır olmaqdır. Eyni zamanda cənab Prezident bu çıxışı ilə onların çirkin məqsədlərini ifşa etdi, onların silahlanmaq, müxtəlif silah loqistikaları marşurutlarını cızmaq fikirlərinin Bakıda diqqətlə izlənildiyini vurğuladı. Həmçinin məlumdur ki, Ermənistanın müdafiə naziri Suren Papikyan da müxtəlif görüşlər keçirir, təmaslar icra edir, istənilən mənbədən silahların alınması işini həyata keçirtmək məqsədi güdür. Bu yaxınlarda elə Bolqarıstanla məhz bu istiqamətdə danışıqlar aparılıb. Azərbaycan buna susmayacaq və biz əgər görsək ki, Ermənistanın silahlanması çox kritik həddə çatır, bölgədə təhlükəsizlik üçün böyük təhlükələr yaratmaqdadır, Azərbaycan buna qəti cavab verəcəkdir"-deyə politoloq vurğuladı.
İradə SARIYEVA
