Bünyamin Qəmbərli: "Uzun müddət sonra Azərbaycan hakimiyyəti Vaqif Hüseynovu tələb etsə də, Moskva vermədi"
Azərbaycanın keçmiş Dövlət Təhlükəsizliyi Komitəsinin rəhbəri Vaqif Hüseynovun Moskvada dünyasını dəyişməsi ilə bağlı xəbər tam təsdiqini tapıb.
1961–1964-cü illərdə SSRİ Silahlı Qüvvələrində hərbi xidmət keçən, 1971-ci ildə isə Azərbaycan Dövlət Universitetinin Jurnalistika fakültəsini bitirən Vaqif Hüseynov jurnalist kimi bir sıra mətbu orqanlarda - "Sport", "Molodyoj Azerbaydjana", "Olimpiyskaya Panorama" qəzetlərində, o cümlədən televiziyada fəaliyyət göstərib.
Siyasi fəaliyyətlərinə gəlincə, Vaqif Hüseynov Azərbaycan Kommunist Partiyası Bakı Şəhər Komitəsinin birinci katibi, Azərbaycan Kommunist Partiyasının Mərkəzi Komitəsinin üzvü, Azərbaycan SSR Ali Sovetinin deputatı, 1975-1990-cı illərdə Azərbaycan SSR Olimpiya Komitəsinin rəhbəri olub.
1983-cü ildə Bakı Şəhər Komitəsinin birinci katibi vəzifəsindən azad edilib.
O, 16 avqust 1989-cu ildən 13 sentyabr 1991-ci ilə qədər Azərbaycan SSR Dövlət Təhlükəsizlik Komitəsinin sədri vəzifəsində işləyib. İddialara görə, "Böhran" silahlı qruplaşmasının liderlərindən olub. Təşkilatın, xüsusən milli azadlıq hərəkatında rol oynamış Azərbaycan Xalq Cəbhəsindən qaynaqlanan təhlükəsizlik təhdidlərinə qarşı çıxmaq üçün yaradıldığı bildirilir.
Çox maraqlıdır, həmin dönəmdə milli azadlıq hərəkatında fəal olan şəxslər
uzun müddət Azərbaycan DTK-sına rəhbərlik etmiş, milli azadlıq hərəkatına qarşı amansız mübarizə aparmış, "naxçıvanşına" adı ilə əslən Naxçıvandan olan vəzifəli adamlara qarşı "repressiya " həyata keçirmiş Vaqif Hüseynovu necə xatırlayır?
Milli Azadlıq Hərəkatının tanınmış üzvlərindən olan tarix üzrə fəlsəfə doktoru Bünyamin Qəmbərli "Bakı-Xəbər"ə açıqlamasında bildirdi ki, 80 - ci illərin sonu, 90 - cı illərin əvvəlində həm Azərbaycanda, həm də keçmiş sovetlər ittifaqının bir çox yerlərində mərkəzdənqaçma meylləri çox gücləndi, xalqların öz müqəddəratını təyin etmə məsələsi əsas hədəf oldu: "Bu zaman Moskva bir neçə tərəfdən həmin müstəmləkədə saxladığı xalqlara təsir etməyə çalışırdı. Onun biri Sovet İttifaqı kommunist partiyası xətti idi. Digəri isə iqtisadi məsələlərlə bağlıdır. Üçüncü isə xüsusi xidmət orqanı olan Dövlət Təhlükəsizlik Komitəsi ilə bağlıdır. Dövlət Təhlükəsizlik Komitəsi bir çox məsələlərdə həm yerlibazlığı qızışdırırdı, həm də region, din məsələsini ortaya atırdı. Məqsəd qarışıqlıq yaratmaqla milli azadlıq hərəkatını zəiflətmək idi. Həmin müddətdə Dövlət Təhlükəsizlik xidmətinin başında Vaqif Hüseynov dayanırdı. Təbii ki, Moskvanın bütün göstərişlərini sorğusuz - sualsız icra etməyə çalışırdı. Deyə bilərlər ki, ölüb, daha ondan danışmağa dəyməz. Ancaq mən düşünürəm ki, əli Azərbaycan xalqının qanına bulaşmış hər bir adam Azərbaycanın düşmənidir. 20 yanvarda əli olan hər bir Moskva rəhbərliyində olan adamın adı çəkilirsə, onun əlaltısı olan Azərbaycandakıları da deməliyik. Əks halda xalqımız növbəti 20 yanvarlara, növbəti mart, oktyabr çevrilişlərə düçar ola bilər. Vaqif Hüseynov da Azərbaycan xüsusi orqanına rəhbərlik edən bir adam kimi Azərbaycanda həm xalq hərəkatını boğmağa, həm də naxçıvanlıları gözdən salmağa çalışırdı. Qarşıdurma yaratmaqla proseslərə təsir göstərməyə çalışırdı. Digər tərəfdən, Vaqif Hüseynov və Azərbaycanın ovaxtki rəhbərləri xalq hərəkatını məqsəddən yayındırmaq üçün Heydər Əliyevlə bağlı qəzetlərdə sistemli məqalələr çap etdirir, dırnaq arası analizlər yazdırırdılar. Bu gün təbii ki, Azərbaycan dövləti müstəqildir, öz Qarabağ məsələsindən də müəyyən qədər qurtulub. Bunları yaşayan bir insan kimi deyə bilərəm ki, biz o günləri, o günlərdə əlləri olanları unutsaq tarix bizi bağışlamaz, yeni problemlərlə üzləşərik. Vaqif Hüseynov və onun kimi bu xalqa düşmən olanların hər biri bu işlərdə günahkardı. Xatırlayırsızsa, uzun müddət sonra Azərbaycan hakimiyyəti Vaqif Hüseynovu tələb etsə də, Moskva vermədi. Çünki Vaqif Hüseynov həm sirr dağarcığı idi, həm də təzyiq vasitəsi idi. Moskva onu vermirdisə, demək Moskva üçün vacib və önəmli olub. Bütün bunlara baxmayaraq, mən düşünürəm ki, Azərbaycan tarixi yazılanda, xüsusilə son dövrlər obyektiv yazılsa, bir çoxları - Ayaz Mütəllibov, Vaqif Hüseynov və digərlərinin Azərbaycana qarşı olan hərəkətləri çılpaq şəkildə ortaya qoyulmalıdır".
Məhəmmədəli QƏRİBLİ
