Təbriz Musayev: "Biz bizə məxsus olanı tələb edirik"
"Ermənistan Respublikası sərhəd delimitasiyasına məcbur edilməyib, lakin qeyd etmək lazımdır ki, bəli, Azərbaycan 4 kəndin qaytarılmasında israrlı idi". Bunu Ermənistan İctimai Televiziyasının efirində Baş nazir Aparatının İctimaiyyətlə əlaqələr və İnformasiya mərkəzinin direktoru Qor Tsarukyan Tavuş və Qazax rayonları arasında aparılan demarkasiya prosesindən danışarkən bildirib.
Azərbaycanın Ermənistanı hətta müharibə ilə hədələməsinə gəlincə, Tsarukyan deyib ki, rəsmi səviyyədə belə bir şey olmayıb, amma bu cür bəyanatlar ictimaiyyət tərəfindən səsləndirilib: "Azərbaycan delimitasiya prosesi aparılmadan, heç bir sərhəd xətti göstərilmədən kəndlərin qaytarılmasında təkid edirdi: kəndləri qaytarın, vəssalam! Erməni tərəfinin tələbləri nəticəsində biz məhz bu delimitasiya prosesinə başladıq, onun vasitəsilə Sovet İttifaqının dağılması zamanı mövcud və hüquqi əhəmiyyətli sərhəd xəttini dəqiq müəyyən etmək və delimitasiya aparmaq mümkün oldu. Proses Almatı sazişinə əsaslanan dövlət sərhədini müəyyənləşdirdi".
Göründüyü kimi, erməni rəsmisi danışıqların məzmununu təhrif edərək Ermənistanı konstruktiv tərəf kimi təqdim etməyə çalışır. Çünki Azərbaycan ilk əvvəldən bəyan edib ki, anklav olmayan 4 kənd qeyd-şərtsiz və delimitasiyadan asılı olmayaraq qaytarılmalıdır. Sadəcə, Ermənistan Azərbaycanın təzyiqləri qarşısında güzəştə getməyə məcbur oldu. Yəni Azərbaycan belə hesablamışdı ki, Ermənistan delimitasiya prosesini uzada bilər. Ona görə də məsələni belə qoymuşdu ki, delimitasiyanın nə vaxt başlamasından asılı olmayaraq 4 esklav olmayan kənd geri qaytarılmalıdır. Ermənistan görəndə ki, xoşluqla kəndlər geri qaytarılmasa Azərbaycan güc yolu ilə bunu edəcək, o zaman məcbur qalıb, delimitasiya prosesi ilə eyni vaxtda kəndlərin qaytarılmasını həyata keçirdi. Ona görə də Ermənistan diplomatiyası özünün məğlubiyyətini, zəifliyini bu tezislə ört-basdır etmək istəyir, delimitasiya məsələsini önə sürməklə görüntü yaradır ki, guya onlar qalib gəldilər.
"Ermənistan tərəfi məsələləri təhrif edərək Azərbaycan barəsində saxta "aqressor" obrazı yaratmaq istəyir"
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev "Bakı-Xəbər"ə açıqlamasında erməni tərəfinin arqumentlərinin əsasının olmadığını qeyd etdi: "Əvvəla, erməni tərəfi öz məkirli xislətinə uyğun olaraq, həmişə olduğu kimi, proseslərin mahiyyətini təhrif edir. Məsələ ondadır ki, Azərbaycan əgər anklav kəndlərlə bağlı tələblərlə çıxış etsəydi, o zaman erməni tərəfinin arqumentləri əsaslı görünə bilərdi. Söhbət Ermənistanın əhatəsində olan, Azərbaycanla birbaşa quru əlaqəsi olmayan kəndlərdən gedir. Axı Azərbaycan həmin kəndlərlə bağlı belə tələblərlə çıxış etməyib. Azərbaycanın tələbi eksklav olmayan, işğal altında olan 4 kəndin geri qaytarılması ilə bağlı olub. Bu ilin yanvarında Prezident İlham Əliyev yerli telekanallara müsahibəsində bildirdi ki, işğal altında olan 4 kənd qeyd-şərtsiz azad edilməlidir. Çünki həmin kəndlərin delimitasiyaya heç bir dəxli yoxdur. Ancaq Ermənistan tərəfi məsələləri təhrif edərək Azərbaycan barəsində saxta "aqressor" obrazını yaratmaq istəyir. Bununla dünyaya göstərmək istəyirlər ki, Azərbaycan 44 günlük müharibədən və antiterror əməliyyatlarından sonra guya davamlı olaraq Ermənistanla hədə dilində danışır. Ötən il Ermənistanı himayə edən dairələr, erməni lobbisi belə rəy formalaşdırmağa çalışırdı ki, guya Azərbaycan güc yolu ilə Zəngəzuru ələ keçirməyə hazırlaşır. Bu kampaniyanın təsiri altına düşən İran belə olacağı halda müdaxilə edəcəyi ilə bağlı ölkəmizi təhdid edirdi. Ancaq bütün bu deyilənlərin boş bir şey olduğu ortaya çıxdı. İndi də həmin dövlətlər və qüvvələr delimitasiya ətrafında manipulyasiya ilə məşğuldular ki, ay aman, Azərbaycan prosesi yoxuşa doğru aparır. Halbuki, biz bizə məxsus olanı tələb edirik. Baxmayaraq ki, indiki Ermənistan bizə məxsus tarixi ərazilərdə yaradılıb. Ancaq Azərbaycan Konstitusiyasında Ermənistana yönəlik ərazi iddiası öz əksini tapmayıb. Ermənistan Konstitusiyasında isə bu, öz əksini tapıb. Bax budur, məsələnin mahiyyəti".
Vidadi ORDAHALLI
