Yəhya Babanlı: "Ermənistanın fəallığı sülh sazişi üzrə cazibədar görünsə də, konkretliyi əks etdirmir"
Xarici işlər naziri Ceyhun Bayramov macarıstanlı həmkarı Peter Siyarto ilə keçirdiyi mətbuat konfransında Azərbaycan-Ermənistan normallaşma prosesinə toxunaraq qeyd edib ki, sülh sazişi layihəsi üzrə açıq qalan məsələlərin sayı azalıb:
"Ermənistan Azərbaycana sülh sazişi ilə bağlı növbəti layihəni təqdim edib. Ondan öncə Azərbaycan Ermənistana növbəti saziş layihəsi ilə bağlı redaksiyanı təqdim etmişdi. Onun üzərində Almatıda danışıqlar həyata keçirilmişdi. Bir neçə gün bundan öncə Ermənistan tərəfindən sülhlə bağlı növbəti layihəni almışıq. Onu qeyd edə bilərəm ki, orada sülh sazişi layihəsi üzrə açıq qalan məsələlərin sayında azalma mövcuddur. Bir sıra maddələr üzrə pozitiv inkişaf müşahidə edilməkdədir".
Ümumilikdə, sülh sazişi layihəsi üzrə açıq qalan məsələlərin sayında azalma sülh müqaviləsinin imzalanması ehtimalını artırırmı? Bütövlükdə bu amili ekspertlər necə dəyərləndirir?
"Məğlubiyyətə düçar olan bu qonşu dövlət öz taleyi ilə barışmalı və sülhə gəlməlidir"
Sözügedən məsələni "Bakı-Xəbər"ə şərh edən tarix elmləri üzrə fəlsəfə doktoru, politoloq Yəhya Babanlı buna bir neçə prizmadan yanaşdı: "Azərbaycanın xoş niyyəti və məramı bəllidir. Mövqeyi netdir. Azərbaycan tərəfinin sülh üçün atdığı addım bu gün olduğu kimi, əvvəllər də mövcud olub. Əfsuslar olsun ki, Ermənistan tərəfinin sözdə başqa, əməldə başqa hərəkət fəaliyyəti buna mane olub. Necə deyərlər, nəticəsiz qalıb. Ermənistanın fəallığı sülh sazişi üzrə cazibədar görünsə də, konkretliyi əks etdirmir. Yaxın perspektivi sual altına qoyur. Sülh səmimiyyət, anlayış və güzəşt tələb edir. Bəhanə, qeyri-müəyyənlik və iddia bu prosesə ziddir. Ona görə də hesab edirəm ki, Ermənistan üçün yaxşı fürsətdi. O mənada ki, öz mövqeyini nümayiş etdirsin. Azərbaycanın Cənubi Qafqaza və dünyaya sülh emal etməsi təşəbbüsünə qoşulsun. Eyni zamanda, COP29 çərçivəsində yaxından iştirak etsin. Nəzərə almaq lazımdır ki, hər bir halda bütün müharibələrin sonu və ya fasiləsi sülhlə yekunlaşır. Məğlubiyyətə düçar olan bu qonşu dövlət öz taleyi ilə barışmalı və sülhə gəlməlidir. Azərbaycanın regiondakı nüfuzundan yararlanmalı, sağlam münasibət qurmağa çalışmalıdır. Ermənistanın bundan başqa lüksü yoxdur. Özünü xəstə ideologiyadan xilas etməli, kilsə və diasporanın vurduğu yaranı müalicə etməli və sağaltmalıdır. Yoxsa daha acınacaqlı vəziyətlə üzləşə bilərlər. Bir sözlə, bugünkü çağırışlar - geosiyasi gerçəkliklər, tranzit və logistika məsələləri sülhü, birgəyaşayışı şərtləndirən amillərdəndi. Bu, Azərbaycan və Ermənistan arasında sülh açılımını labüd edir".
Vidadi ORDAHALLI
