Bəhruz Quliyev: "Ayrı-ayrı ölkələrdə separatçıları, terrorçuları dəstəkləyən Qərb dünyası, nədənsə, Fələstinin müstəqil dövlət kimi tanınmasına qısqanclıqla yanaşıb"
Kollektiv Qərbin müsəlman dünyasına ikili standartlarla yanaşması inkaredilməz faktdır. Bu özünü Fələstinə münasibətdə də uzun illər açıq-aşkar göstərib. Baxın, Qəzza bölgəsində müharibə başladı, İsrail Qəzzaya hücum etdi, qan su yerinə axdı, nə qədər insan həyatını, ev – eşiyini, sağlamlığını itirdi.
Bütün bunlardan sonra bəzi Qərb dövlətləri Fələstinin müstəqilliyini indi-indi tanımağa başlayıb. Onun müstəqilliyini İspaniya, İslandiya, Norveç, Sloveniya, tanıdı. Bir sözlə, son zamanlar Fələstinin tanınması ilə bağlı Avropa dövlətlərində bir dalğa başlayıb.
Qeyd edək ki, Sovet dövründə Fələstini keçmiş sosialist düşərgəsinə üzv olan ölkələrin bir neçəsi tanımışdı. Macarıstan, Bolqarıstan, Çexoslovakiya və başqaları sosialist dövlətləri olaraq Fələstinin müstəqilliyini tanıyıblar. Çünki sovet hökuməti Fələstini müdafiə edirdi. Uzun müddət seyrçi mövqeyində qalan Qərb dövlətlərinin indi "buzu açılır". Müharibə başlayandan sonra bəzi Avropa dövlətləri Fələstini müstəqil dövlət kimi tanımağa başlayıb. Halbuki, Azərbaycan müstəqil olandan bugünə kimi Fələstinin dövlət olmaq hüququnu tanıyıb. BMT-nin qərarıdır ki, Fələstin dövlət olmalıdır. Amma Qərb dövlətlərinin onun müstəqilliyinin müharibə başlayandan sonra tanımağa başlaması Avropanın ikili standartlarla işlədiyini bir daha sübut edir.
İndiyə qədər tanımırdılar, indi nə oldu ki, aləm bir-birinə qarışandan, qan su yerinə axandan sonra bunlar Fələstinin dövlət olmaq hüququnu, Fələstin xalqının haqqını, hüququnu tanımağa başlayıblar? Bu Avropanın ikili standartlarının bir nümunəsi deyilmi? Avropa ölkələrinin Fələstini dövlət kimi tanıması gecikmiş addım deyilmi?
"Digər Avropa dövlətləri isə əvvəlki ikiüzlü siyasətlərini sürdürməkdədirlər"
"Səs" qəzetinin Baş redaktoru, siyasi analitik Bəhruz Quliyev "Bakı-Xəbər"ə şərhində "Avropanın da daxil olduğu Qərb dünyası bütün zamanlarda ikili stantartlardan istifadə edərək xalqların, dövlətlərin taleyüklü məsələlərində qeyri-müəyyən siyasət yürüdüb. Beynəlxalq qanunlar qərblilər üçün lazımsız kağız parçası təsiri bağışlayıb. Avropa ölkələrinin Fələstin dövlətini tanıması məsələsində də böyük fikir ayrılığı var. Bu, Avropa İttifaqının İsrail-Fələstin münaqişəsinə dair vahid bir mövqeyə gəlməsini çətinləşdirir. İspaniya, İrlandiya və Norveçin qərarı Avropa daxilindəki mövqelərin fərqli olduğunu və hər bir ölkənin xarici siyasətində fərqli yanaşma olduğunu göstərir"-deyə bildirdi.
Siyasi analitik qeyd etdi ki, Fələstinin bir dövlət kimi tanınması üçün beynəlxalq sənəd də var: "Fələstin Yaxın Şərqdə de-yure suveren dövlətdir. 1947-ci ildə BMT-də Fələstinin ayrı-ayrı yəhudi və ərəb dövlətlərinə bölünməsinə və Qüdsün (Yerusəlimin) BMT nəzarəti altında xüsusi statusa malik ayrıca bir şəhərə çevrilməsinə səs verilib. Bu plan yəhudi liderləri tərəfindən qəbul edilsə də, ərəblər buna razı olmadıqları üçün hələ də həyata keçirilməyib. Fələstin dövləti 2012-ci ildən BMT-də qeyri-üzv müşahidəçi statusuna malikdir. Ayrı-ayrı ölkələrdə separatçıları, terrorçuları dəstəkləyən Qərb dünyası, nədənsə, Fələstinin müstəqil dövlət kimi tanınmasına qısqanclıqla yanaşıb. Görünən budur ki, fələstinlilər dövlət qurmaq üçün böyük itkilər verməli imiş. Belə olmasaydı, Avropa dövlətləri ötən ilin oktyabr ayında kulminasiya nöqtəsinə çatan İsrail-Fələstin münaqişəsinə qədər iki xalq arasında yüz ildən artıq davam edən savaşa son verərdilər. Bugünə qədər İsrailə verdikləri hərbi dəstək əvəzinə, bölgədə sülhün təmin olunmasına çalışardılar. Amma Avropa İttifaqına daxil olan "qoca qitə" ölkələri on minlərlə fələsinlinin ölməsindən, yüz minlərlə insanın yaralanmasından, bir milyondan artıq sakinin qaçqın düşməsindən sonra sanki "qəflət yuxusu"ndan ayılıblar. Düzdür, ötən əsrin 80-ci illərində sosialist düşərgəsinə aid olan Avropa dövlətləri Fələstini dövlət kimi tanımışdılar, bu gün isə 3-4 dövlət bunu edib. Digər Avropa dövlətləri isə əvvəlki ikiüzlü siyasətlərini sürdürməkdədirlər".
İradə SARIYEVA
