Aydın Hüseynov: "Bu faktor Azərbaycana olan inam və etibarı daha da artırır"
Prezident İlham Əliyev Bakı Ekspo Mərkəzində Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz - "Caspian Oil&Gas" və 12-ci Xəzər Beynəlxalq Energetika və Yaşıl Enerji - "Caspian Power" sərgilərinin açılış mərasimindəki çıxışında bəyan edib ki, son 30 il ərzində imzalanmış bütün müqavilələrdə bir söz belə dəyişilməyib:
"Bizim sözümüz imzamız qədər dəyərlidir. Son 30 il ərzində imzalanmış bütün müqavilələr tam şəkildə icra olunub. Onların hamısı parlament tərəfindən ratifikasiya olunub və qanun şəklində imzalanıb. Orada bir söz belə dəyişilməyib. Bu etibar onilliklər ərzində qazanılıb. Bunun nəticəsidir ki, biz bu gün bərpaolunan enerji sahəsində növbəti sürətli inkişafın şahidiyik".
"Bütün bunların nəticəsidir ki, böyük xarici şirkətlər ölkəmizin "yaşıl enerji" sektoruna həvəslə sərmayə qoyur"
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Hüseynov hesab edir ki, bu faktor Azərbaycana olan inam və etibarı daha da artırır: "Əvvəla, Bakıda keçirilən Enerji Həftəsi olduqca mühüm iqtisadi hadisələrlə yadda qaldı və tədbirin açılış mərasimində çıxış edən Prezident İlham Əliyevin nitqi müasir enerji siyasətinin müəyyən edilməsi baxımından tarixi əhəmiyyət kəsb edən mesajlarla zəngin oldu. 37 ölkədən 300-dək şirkətin iştirak etdiyi və özündə üç mühüm tədbiri birləşdirən Bakı Enerji Həftəsinə qatılan müxtəlif ölkələrin nümayənələrinin təmsil olunduğu tədbirlərdə səslənən bu fikirlər qlobal enerji ailəsinə böyük bir ehtiramın, hörmətin nümunəsi kimi qarşılandı. Tədbirlərdə Azərbaycanın uğurlu neft strategiyası, neft bumundan sonra Avropa bazarlarına qaz nəqli ilə Xəzər regionunda yeni bir cığırın açılması, Bakı-Tbilisi -Ceyhan, Bakı-Tbilisi-Ərzurum layihələrini icrası, TANAP, TAP kəmərlərini reallaşdıran Azərbaycan Cənub Qaz dəhlizinin enerji koridoru kimi əhəmiyyəti vurğulandı. Azərbaycanın Mərkəzi Asiya-Xəzər regionunun təşəbbüskar və avanqard ölkəsi kimi bölgənin yanacaq resiurslarının Qərbə nəqlində daşıyıcı missiyaya malik rolu yüksək dəyərləndirildi. Ümumilikdə, həqiqətən də ötən müddət ərzində imzalanan bütün beynəlxalq müqavilələrə Azərbaycan hansısa formada müdaxilə etməyib. Elə ölkələr var ki, orada imzalanan beynəlxalq kontraktlar sonra təftiş edilir. Bu isə həmin ölkələrə olan etimadı sarsıdır. Nəticədə həmin ölkələrin iqtisadiyyatında bir sıra fəsadlar yaranır. Xarişi şirkətlər sərmayə yatırmaqdan imtina edir və s. Azərbaycan 1994-cü ilin 20 sentyabrında xarici neft şirkətləri ilə imzaladığı neft kontraktlarından üzübəri bütün öhdəliklərə sadiq olub. Bunun nəticəsidir ki, müxtəlif dövrlərdə bir sıra meqa layihələr reallaşdırıb. Xarici tərəfdaşlar həvəslə bu layihələrə sərmayə qoyurlar. Niyə? Ona görə ki, inam var. Yaxşı bilirlər ki, qoyduqları vəsaitlər batmayacaq. Bütün bunların nəticəsidir ki, indi böyük xarici şirkətlər ölkəmizin "yaşıl enerji" sektoruna həvəslə sərmayə qoyur".
Vidadi ORDAHALLI
