Sahil Kərimli: "Dövlətimizi bu siyasətdən yayındırmaq iqtidarında olan elə bir qüvvə yoxdur"
Rusiya xarici işlər nazirinin müavini Mixail Qaluzin müsahibəsində bildirib ki, Qərb payızda Gürcüstanda Maydan təşkil edə bilər: "Oktyabrda Gürcüstanda keçiriləcək seçkilər kontekstində Qərb ölkələrinin nümayəndələrinin vəziyyəti gərginləşdirmək cəhdlərini görürük".
O əlavə edib ki, məqsəd dəyişikliyin Maydan ssenarisini reallaşdırmaqdır. Nazir müavini Qərbi Rusiya sərhədləri yaxınlığında daha bir gərginlik mənbəyi yaratmaqda ittiham edib.
Belə çıxır ki, Qərb Cənubi Qazqaz ölkələri içərisində yalnız Azərbaycanda öz şəbəkəsini işlədə bilmir. Ermənistan və Gürcüstanı bacardığı qədər qarışdırır. Bu planları da əsasən seçki vaxtlarında həyata keçirir. Azırbaycanda da növbədənkənar parlament seçkiləri gözlənilir. Həmin dönəmdə Qərb burda da hansısa təxribatçı planlara əl ata bilərmi?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, son dövrlərdə Qərb, ABŞ və Avropa dairələri Cənubi Qafqazda nüfuz etmək üçün, orda gedən siyasi proseslərdə öz ambisiyalarını həyata keçirmək məqsədilə müxtəlif təxribatlar törədir: "Həm Gürcüstanda, həm də Ermənistanda bu gün baş verən kütləvi iğtişaşlar, etiraz aksiyaları, hakimiyyət nümayəndələri ilə qarşıdurmalar bölgəyə nəzarəti əldən verməmək çabalarıdır. Biz bu gün Qərbin bu istiqamətdə nəinki geri çəkilməsinin, hətta bir addım da önə getmək istədiyinin şahidi oluruq. Xüsusilə də Gürcüstanda xarici agentlər haqqında qanunun Qərbin dirənişlərinə baxmayaraq qəbul edilməsi ondan xəbər verir ki, Qərb Cənubi Qafqazda baş verən proseslərə nüfuz edə bilmir, həmin ölkələrin daxili işlərinə qarışmaq iqtidarında deyil. Təbii ki, bu gün Gürcüstanda həmin qanun hətta prezidentin vetosuna baxmayaraq qəbul edildi və qarşıda Gürcüstanda həm parlament, həm də prezident seçkiləri olacaq. Belə olduğu halda Qərb müxtəlif təxribatlarını yenidən davam etdirəcək və çalışacaq ki, bu seçkilər üzərindən öz maraqlarını, istəklərini təmin etsin. Əlbəttə ki, Qərbin Azərbaycana qarşı da qərəzli mövqe tutduğunu, daxili proseslərin qarışdırılması istiqamətində məkrli planlarının zaman - zaman şahidi olmuşuq. Bu gün də buna cəhdlər var. Bildiyimiz kimi, son dövrlərdə Azərbaycan hüquq-mühafizə orqanları Qərbin bu planlarının qarşısını xüsusi peşəkarlıqla alıb. Qərbin müxtəlif QHT - lər vasitəsilə həmin QHT -lərə vəsait köçürülməsi, maddi dəstək göstərilməsi, qrant ayırması yolu ilə ictimai-siyasi sabitliyi pozmaq cəhdlərinin bu gün də şahidiyik. Ancaq Azərbaycan dövləti daim qətiyyətli, vaxtında çevik tədbirləri nəticəsində müdaxilələrin qarşısını alıb. Təbii ki, payızda Azərbaycanda da seçkilər olacaq. Bu seçkilər zamanı da Qərbin hər zamanki ampluada olduğunun şahidi ola bilərik. Qərb bu seçkilərdə də Azərbaycanda öz istəklərinə nail olmaq üçün müəyyən təxribatlar törədə bilər. Mən yenə də xüsusi vurğulamaq istəyirəm ki, Qərbin artıq Azərbaycana nüfuz etmək imkanları məhdud dairədədir. Çünki Azərbaycan dövləti güclüdür, qüdrətlidir və müstəqil siyasət yeridir. Dövlətimizi bu siyasətdən yayındırmaq iqtidarında olan elə bir qüvvə yoxdur".
Məhəmmədəli QƏRİBLİ
