ABŞ-ın sabiq prezidenti Donald Tramp, prezident seçkilərində qalib gələcəyi təqdirdə, ABŞ-ın 35-ci prezidenti Con Kennedinin qətli, 11 sentyabr terror aktı və milyarder Cefri Epşteyn haqqında sənədləri dərc edəcək.
Tramp bu haqda "Fox News"a müsahibəsində deyib. "Mənim qisasım uğurlu olacaq. Bunlar pis insanlardır. Bunlar xəstə insanlardır. Mən olmasaydım, eyni şeyi başqasına edərdilər"- deyə Tramp bildirib.
Trampın barəsində danışdığı Cefri Epşteyn milyarderdir. Onun bu açıqlaması şantajdırmı, yoxsa əsaslı bir məsələdir? Şantajdırsa kimə yönəldir? Cefri Epşteyn kimdir və keçmiş prezident bu hədəni kimə yönəldir?
Kollec dərəcəsi olmayan müəllim…
Cefri Epşteynlə bağlı internet üzərindən araşdırma apardıq və qarşımıza onunla bağlı diqqət çəkən məlumatlar çıxdı. Vikipediya açıq ensiklopediyasında Cefri Epşteyn ABŞ maliyyəçisi və cinayətkarı kimi təqdim edilir. 1953-cü ildə Nyu-Yorkun Bruklin rayonunda doğulan və burada böyüyən Epşteyn, kollec dərəcəsi olmamasına baxmayaraq, peşəkar həyatına Manhettendə Dalton məktəbində müəllimlik etməklə başlayıb. Məktəbdən qovulduqdan sonra bank və maliyyə sektoruna daxil olub, Bear Stearns-də müxtəlif vəzifələrdə çalışıb və nəhayət öz şirkətini yaradıb. Epşteyn elit sosial dairəni, bir çox qadın və uşaqları öz işlərinə cəlb edirdi; sonra o və onun bəzi tərəfdaşları həmin qadın və uşaqları cinsi istismar edib.
Prokurorların "serial seks ovçusu" adlandırdığı iş adamı…
2019-cu ildə amerikalı milyarder Cefri Epşteyn cinsi istismar məqsədilə insan alverində ittiham olunub. Həmin dövrdə 66 yaşı olan milyarder məhkəmə qarşısına çıxarılaraq, haqqında həbs qərarı verilib.
Xarici mətbuatın yazdığına görə, Epşteyn həmçinin insanları cinsi istismara məruz qoymaq məqsədilə hiylə qurub onları aldatmaqda günahlandırılıb.
Vəkili Cek Qoldberger deyirdi ki, o özünü təqsirli bilmir, ittihamları da rədd edir. Yetkinlik yaşına çatmayan qızlarla seksual münasibətlərdə təqsirləndirilən maliyyəçi məhkəmədə bildirirdi ki, indi qurban kimi təqdim olunan qızlar, əslində, könüllü şəkildə münasibətdə olublar. O isə həmin qızların 18 yaşdan böyük olduğunu düşünüb.
Qeyd edək ki, Epşteyn Parisdən gələrkən təyyarə Nyu-Cersi ştatında yerə enən kimi saxlanılmışdı.
"The New-York Times" qəzeti yazırdı ki, Epşteynin keçmiş prezident Bill Klintonla, həmçinin Ağ Evin hazırkı rəhbəri Donald Trampla yaxşı əlaqələri olub.
Epşteyn 2007-2008-ci illərdə də yetkinlik yaşına çatmayan qızların xidmətindən istifadə etməkdə günahlandırılırdı. Həmin vaxt o, əməlini etiraf etmiş və bu üzdən 13 ay həbsxanada saxlanılmışdı.
Milyarder 2019-cu ildə də növbətu dəfə eyni məsələyə görə həbsə məhkum edilir. O zaman milyarderlə bağlı mətbuatda tükürpədən faktlar yer alırdı. Amerikalı milyarder Cefri Episteyn saxlandığı kamerada ölü tapılır. Mətbuata görə, prokurorların "serial seks ovçusu" adlandırdığı iş adamının ölümü ilə gündəm qarışır və cürbəcür iddialar yayılır. Episteyn, yetkinlik yaşına çatmayan qız uşaqlarını və çox sayda insanı cinsi istismarda və seks məqsədli insan qaçaqçılığı etməkdə ittiham olunurdu.
Epşteynin müəmmalı ölümü və yeni iddialar...
KİV-ə görə, Epşteynin ölümündən sonra "qurama" teoriyaları ortaya atıldı. Sosial mediada belə versiyalar yayıldı ki, Epşteyn başqa məşhur şəxslərin adlarının ortaya çıxmasının əngəllənməsi üçün öldürülüb, hətta ölümü də quramadır. Ölümündən sonra həbsxana yetkililərindən alınan məlumatda deyilirdi ki, Epşteyn 10 avqust 2019-cu il saat 06.30-da kamerasında ölü tapılıb. Həbsxana işçiləri onu həyata qaytarmağa çalışsalar da, xəstəxanaya aparılan milyarderin öldüyü açıqlanıb.
Yetkililər Epşteynin intihar etdiyini düşündüklərini dedikləri halda, rəsmi ölüm sənədinin açıqlanmadığı bildirilirdi. O dövrdə yayılan iddialara görə, Epşteynin həbsxanada rahatlığını təmin etmək üçün məhkumlara rüşvət verdiyi və beləcə təhlükədən uzaq qalmağı planlaşdırdığı ortaya çıxıb. Epşteynin kiçik hücrədən qurtulmasına kömək etmək üçün vəkilinə də külli miqdarda pul verdiyi və 12 saata qədər görüşə gəlməsini istədiyi bildirilirdi. Bu uzun görüşmə saatlarında ehtiyatdakı bütün yemək və içkilərin tükəndiyi də deyilirdi.
Trampın yaydığı video...
Elə həmin günlərdə ABŞ-ın keçmiş prezidenti Tramp Twitterdə mühafizəkar komediyaçı Terrence Villiamsın Epşteynin ölümü ilə bağlı keçmiş prezident Bill Klinton və keçmiş xarici işlər naziri Hillari Klintonu cavabdeh saydığı videonu paylaşmışdı. Tramp mesajında Epşteynin intihar nəzarətində olduğu zaman öldüyü iddia edilirdi.
Epşteyn haqqında federal cinayət işi bağlanmışdı. Amma ona təzminat davası açmağın hələ də mümkün ola biləcəyi deyilirdi. Məhkəmə sənədlərinə görə, Epşteynin Manhetten, Palm Beach, New Mexiko və Parisdə evleri, Kariblərdə adası, ən azı 15 maşını və özəl təyyarəsi olub.
Milyarderə qarşı təcavüz iddiası…
Mətbuatda yazılırdı ki, Cenifer Araoz adlı bir qadın 15 yaşındaykən Epşteynin ona təcavüz etdiyini iddia edərək, məhkəməyə müraciət etmişdi. Aroaz, Epsteynin ölümündən sonra verdiyi açıqlamada aşağıdakıları demişdi: "Epşteynin qurbanları ilə məhkəmədə üzləşə bilməyəcəyi üçün əsəbi və kədərliyəm. Bizlər həyatımızın sonuna qədər bu travma ilə yaşamağa məcburuq. Amma Epşteyn etdiyi cinayətlərin və o qədər insana yaşatdığı iztirabların nəticələri ilə əsla üzləşməyəcək".
Prokurorların məhkəmənin gedişi zamanı Epşteynin köməkçiləri və işçilərinə qarşı da cinayət işi aça biləcəyi deyilirdi. Məhkəmə sənədlərində Epşteyn üçün "masaj edən qadınları təşkil edən" üç işçisi barədə də danışılırdı. Məhkəmə sənədində zərərçəkənlərdən birinin vəkili olan Robbie Kaplan isə bildirirdi ki, "Epşteyn və cinayət ortaqlarının qurbanları ümidlərini ititməməlidir. Biz var gücümüzlə ədalətin öz yerini tapması üçün cəhdlər göstərməklə qalmayıb, yol verilən bütün cinayətlərin dünyaya çatdırılmasını təmin edəcəyik. Gənc qızlarımızın və ya kişilərimizin bir daha bu cür şeylər yaşamaması üçün bu cinayətləri ifşa etmək məcburiyyətindəyik".
Qadınları bir-biri ilə məcburi evləndirən Epşteyn…
Mətbautda milyarderlə bağlı başqa bir ilginc fakt da yayılıb. Yazılanlara görə, C.Epşteyn 2013-cü ildə 2 qadını bir-biriylə zorla evləndirmək istəyib. Qadınlardan biri ABŞ vətəndaşı, digəri isə Şərqi Avropadan olub. Qadınlar çirkin niyyətli milyarderin həbsindən bir ay öncə boşandıqlarını deyirdilər. Ketlin Doe adlı bir başqa qurban isə Epşteynin ona təzyiq edərək, başqa bir qadınla evlənməsini istədiyini bildirmişdi.
Ketlin Doe eyni cinsdən bir qadınla evlənməsi üçün Epşteynin ona 20 min dollar təklif etdiyini bildirirdi. Qadınlar boşanmadan öncə Epşteynə aid bir binada yaşadıqlarını deyirdilər. Katlin həmçinin iddia edirdi ki, Epşteyn ondan bakirəliyini istəyib və buna məcbur edilib. Nyu Yorkdakı federal prokurorlar onun 2002-2005-ci illər arasında Nyu Yorkdakı evi və Floridadakı malikanəsində aralarında 14 yaşındakı qız uşaqlarının da olduğu, yetkinlik yaşına çatmayan insanlarla pul qarşılığında cinsi münasibətlər qurması ilə bağlı iddianaməni də keçən ay gündəmə gətirmişdi.
Bitib-tükənməyən iddialar, 13 illik həbs…
Mətbuata görə, Epşteynə 2007-ci ildə də buna bənzər ittihamlar yönləndirilmişdi. Həmin vaxt prokurorluqla anlaşan və insan alveri ittihamlarını qəbul edən Epşteyn ehtimal edilən ömürlük həbs cəzası əvəzinə, yuxarıda qeyd edildiyi kimi, 13 ay həbsə məhkum olmuşdu.
ABŞ mediasına görə, 2019-cu ilin 6 iyulunda Epşteynin malikanəsində aparılan axtarışda külli miqdarda nağd pul, çoxlu sayda brilyant, adına alınmış, yaşayış yeri olaraq Səudiyyə Ərəbistanın qeyd olunduğu vaxtı keçmiş bir saxta pasportla yüzlərlə gənc qadının intim fotoları tapılmışdı.
O da qeyd edilir ki, Epşteyn həmin ilin 23 iyulda boynunda izlər tapıldığı üçün intihar nəzarətinə götürülmüşdü. İzlərin intihar cəhdi, yoxsa hücuma məruz qaldığı üçün yarandığı isə aydınlaşmamışdı.
Cinayətkar, pedofil, "seks ovçusu" milyarder barədə bu gün də müəmmalı söhbətlər, iddialar davam edir. Trampın da müsahibəsində Epşteynin ölümü haqda danışması müxtəlif suallar yaradır. Tramp açıqlayıb ki, prezident seçiləcəyi təqdirdə milyarderlə bağlı sənədləri dərc edəcək. Təbii, gözləntilər odur ki, Epşteynin ölümünün gerçək səbəbi üzə çıxacaq. Fikrimizcə, Tramp bu sənədləri dərc etməklə indiyə qədər davam edən müəmmaya son qoyacaq, sözsüz ki, sənədlər dərc ediləndə müxtəlif məşhurların, ABŞ siyasilərinin, dövlət adamlarının da adlarının ortaya çıxması gözlənilməz deyil... Bu açıqlamadan, yəqin ki, çoxları özünə aid mesajı alıb. Gəlin, hadisələrin davamını gözləyək...
İradə SARIYEVA
