Məlum olduğu kimi, bu günlərdə SOCAR şirkətinin İstanbuldakı ofisi etirazçıların hücumuna məruz qalıb. "Cumhuriyet" qəzetinin yazdığına görə, "Fələstin üçün min gənc" adlı qrup neft şirkəti ofisinin divarlarına qırmızı boya atıb.
Hadisə yerində çəkilən videolarda bir qrup şəxsin ofisin giriş qapılarını sındırmağa çalışdığı görünür. Daha sonra yayılan fotolarda binanın girişinin polis tərəfindən mühafizə olunduğu əks etdirilib.
Qəzetin yazdığına görə, fəallar "soyqırımçı İsrailə neft verən SOCAR önündə intifada səsimizi ucaltmaqda davam edirik!", "Bu qanlı ticarətə imkan verməyəcəyik" kimi şüarlar səsləndiriblər. "Cumhuriyet" qəzetinin xəbərində o da deyilir ki, fələstinyönlü qrup bu hadisəni özünün sosial media hesabında da qeyd edib: "Qatil İsrail Fələstində soyqırımı edərkən Türkiyə və Azərbaycan əl-ələ bu soyqırıma milyonlarla barrel neft daşımaqdadır". Videoda boğazına ənənəvi Fələstin yaylıqlarını bağlamış bir qrup şəxsin şirkətin binasına daxil olmağa çalışdığı, lakin mühafizəçilər tərəfindən qarşılarının kəsildiyi görünür. Ekspertlər isə qeyd edirlər ki, burada əsas məqsəd Türkiyə və Azərbaycana qara yaxmaq, ölkələrimiz arasında münasibətlərə xələl gətirməkdir. Burada həmçinin müəyyən nüanslar da diqqət çəkir. Məsələn, aksiyaçılar Azərbaycanı İsrailə neft tədarük etməkdə günahlandırıblar ki, bu da, sözün əsl mənasında, absurd yalandır. Çünki SOCAR İsrailə ümumiyyətlə neft satmır. Yalnız Azərbaycan nefti yox, bütövlükdə dünya neft bazarında bütün şirkətlər mallarını treyderlərə satırlar. Treyderlərin isə sonrakı mərhələdə nefti kimə satdığına şirkətlər nəzarət etmir. Bütün bunların fonunda, məlum təxribatçı aksiyanın təşkilatçıları Azərbaycanı İsrailin əsas neft təchizatçılarından biri kimi təqdim etməklə SOCAR-ın timsalında bütövlükdə Azərbaycanı Türkiyə ictimai rəyində nüfuzdan salmağa, regionda sülh və sabitlik qarantoru kimi çıxış edən müttəfiqliyimizi sarsıtmağa çalışırlar. Lakin öz milli maraq və mənafelərini müdafiə və təmin etməyə yönəlmiş müstəqil xarici siyasət həyata keçirən Azərbaycan və Türkiyə isə müştərək dəyərlərə söykənən sıx əlaqələri daha da inkişaf etdirməkdə və dərinləşdirməkdə israrlıdır. Bu kimi cılız cəhdlər mövcud reallığı dəyişə bilməz. Məsələ ilə bağlı "Haber Global" kanalı da maraqlı süjet hazırlayıb. Burada qeyd edilir ki, Türkiyə ilə Azərbaycan arasındakı dərin birliyi məhv etməyi hədəfləyənlər Qəzzaya dəstək bəhanəsi ilə hücuma keçiblər.
O da vurğulanır ki, neftin Türkiyə üzərindən İsrailə satıldığı ilə bağlı böhtan atan terror təşkilatının tərəfdarları Türkiyənin İstanbul şəhərində yerləşən Azərbaycan Dövlət Neft Şirkətinin mərkəzinə hücum ediblər. Hücumçular pəncərələri sındırıb, qapıları yerindən çıxarmağa və hədə-qorxu gəlməyə çalışıblar. Qəzzaya dəstək adı ilə çıxış edən marjinal qrupların əsas hədəfi Azərbaycan-Türkiyə dostluğu olub: "SOCAR-ın Türkiyə üzərindən neft satması ilə bağlı böhtan atan "Fələstin üçün min gənc" adlı qrup İstanbulda böyük təxribat törədib. Fələstinin tərəfdarı kimi çıxış edən bu qrup Qəzzanı bəhanə edərək, yalan və böhtanla Azərbaycanı ləkələməyə çalışır. Nümayişləri təşkil edən struktura baxdıqda, onların əlaqələri tez bir zamanda üzə çıxır. Onların bir çoxunun İraq və Suriyada Türkiyəni hədəf alan terror təşkilatlarını açıq şəkildə dəstəklədikləri görünür. Bu da əsl hədəfin Qəzza olmadığını bir daha ortaya qoyur". Milli Məclisin deputatı Vüqar İskəndərov da bildirir ki, Azərbaycanın əldə etdiyi uğurlar çoxlarını ciddi şəkildə narahat edir: "Son nəticədə, uğurlarımıza kölgə salmaq istəyən bu qara qüvvələr bizə vahid cəbhədən hücum etməyə də çəkinmirlər. Baxmayaraq ki, başqa vaxtı onlar bir-birini "şeytan", yaxud da "terrora dəstək verən" kimi təqdim edirlər. SOCAR-ın İstanbuldakı ofisinə hücum edənlərin dərdi Fələstin deyil". Deputat "report"a açıqlamasında qeyd edib ki, Azərbaycana eyni ssenari üzrə eyni koordinatdan hücuma cəhd edilib: "Belə deyək ki, bu qüvvələr yenə də bizə qurşaqdan aşağı zərbə vurmaq istəyiblər. Amma yenə də özləri özlərini ifşa ediblər. Çünki bu qüvvələrin addımları, əslində "dəvəquşu siyasəti"nə bənzəyir. Etrazçların fələstinli tərəfdarı olduğu şübhə doğurur. Daha doğrusu, əldə edilən bəzi məlumatlara əsasən, "Azərbaycanı İsrailə neft tədarük etməkdə" günahlandıran və SOCAR-ın İstanbuldakı ofisinə vəhşicəsinə hücum edənlər Türkiyədə kök salmış və İran tərəfindən dəstəklənən qruplaşmalardır. Təbii ki, bu qruplaşmaların da dərdi Fələstin deyil. Onların cəhdləri iflasa uğrayacaq. Əvvəla ona görə ki, Türkiyə-Azərbaycan qardaşlığını sarsıltmağa heç bir qüvvənin gücü çatmaz. Digər tərəfdən isə, bu təxribatçıların iddialarının tamamilə yalan olduğu gün kimi ortadadır... Təsəvvür edin ki, Türkiyədə kök salmış və İran tərəfindən dəstəklənən qruplaşmalar əsassız iddialarla cəmiyyəti aldadır və çirkin aksiya keçirirlər. Və okeanın o tayından idarə edilən sayt və radiolar da bu aksiyanı bəh-bəhlə tirajlayırlar. Halbuki, hətta bu aksiyada iddia edilənlər əsaslı olsaydı belə, okeanın o tayındakılar müttəfiqləri olan İsraili dəstəkləməli, bu aksiyanı tirajlamamalıydılar. Ancaq biz bunun əksini görürük. Səbəb isə. bir daha deyirəm ki, bəllidir. Söhbət Azərbaycana qarşı haqsız hücumlardan gedəndə "şeytan" da, "terrorçu" da unudulur. Daha doğrusu, dünənə kimi bir-birini bu adlarla ittiham edənlər bu gün eyni cəbhədən boylanırlar".
Ramil QULİYEV
