Rövşən Məhərrəmov: "Ukraynanın bu addımları müharibəni daha da uzadacaq"
Prezident Vladimir Zelenski Pentaqonun rəhbəri Lloyd Ostin ilə görüş keçirib, görüşdə, xüsusilə Ukraynanın aktual hərbi ehtiyacları müzakirə edilib. Bu barədə Zelenski X səhifəsində yazıb.
Ukrayna prezidenti ilə Pentaqon rəhbəri arasında görüş Sinqapurda keçirilən Şanqri-La müdafiə forumu çərçivəsində baş tutub.
"Biz əsas məsələləri müzakirə etdik: ölkəmizin müdafiə ehtiyacları, Ukraynanın hava hücumundan müdafiə sisteminin gücləndirilməsi, F-16 koalisiyası və ikitərəfli təhlükəsizlik sazişinin hazırlanması", - deyə Zelenski bildirib.
O, həmçinin ABŞ prezidenti Co Baydenə Rusiya ərazisinə Amerika silahları ilə zərbələr endirmək üçün vacib qərar qəbul etdiyinə görə təşəkkür edib.
"Biz ABŞ-dan Ukraynanın həyati müdafiəsini və siyasi dəstəyini yüksək qiymətləndiririk", - deyə Zelenski əlavə edib.
Məlum olduğu kimi, bir sıra Alyans ölkələri - ilk növbədə ABŞ və Almaniya Ukraynaya ötürülən silahlarla, lakin məhdudiyyətlərlə Rusiya ərazisindəki hərbi obyektlərə zərbələr endirməyə icazə verib.
Avropa Komissiyası bəyan edib ki, beynəlxalq hüquq normalarına əsasən, Ukrayna özünü açıq təcavüzdən, xüsusən də Rusiya Federasiyası ərazisindəki hərbi obyektlərə zərbələr endirməklə müdafiə etmək hüququna malikdir.
NATO-nun baş katibi Yens Stoltenberq də Ukraynanın Rusiya ərazisini vurmaq hüququnda israr edir və daha çox müttəfiqin razılaşdığını deyir.
Rusiya deyirdi ki, Qərb ölkələrinin silahları ilə onıarı vursalar ciddi tədbirlərə əl atacaq. Bunu hətta özünün "qırmızı xətti" də adlandırırdı.
Görünən budur ki, bir çox ölkələr buna icazə verib, ancaq Rusiyanın səsi gəlmir. Bunun səbəbi nə ilə bağlıdır?
Hərbi-siyasi şərhçi, ehtiyatda olan polkovnik Rövşən Məhərrəmov "Bakı-Xəbər"ə açıqlamasında bildirdi ki, ABŞ-da demokratlarla respublikaçılar arasında ciddi problemlər yaşanırdı: "Bunun ucbatından 6 ay müddətində Ukraynaya ciddi maliyyə dəstəyi ayrılmadı. Həmin problemlər aradan qaldırıldıqdan sonra ABŞ Ukraynaya 61 milyard dəyərində maliyyə yardımı ayırdı. Onun çox böyük hissəsi silahlanmaya həsr edildi. Bu müddət ərzində Ukraynanın silahlı qüvvələri xeyli zəiflədi. Silah qıtlığı göz qabağındaydı. Yalnız Avropanın bəzi ölkələri tətəfindən cüzi silah verilirdi. Bu da Ukrayna üçün kifayət etmirdi. Rusiya bundan istifadə edərək, bir neçə istiqamətdən hücuma keçdi və nailiyyətlər əldə etdilər. Ukrayna ordusu 11 yaşayış məntəqəsindən geri çəkilməyə məcbur oldu. Hazırda Ukraynaya silah təminatı bərpa olunub. Əvvəl deyilmişdi ki, bu silahlar Rusiya ərazısında istifadə olunmasın. Ancaq Rusiya Xarkov kimi gözəl şəhərin mərkəzini bombalayır. ABŞ bu səbəbdən qərar verdi ki, Ukraynaya təqdim olunan silahlardan Ukrayna ərazısində istifadə olunsun. Həmin silahlardan artıq bəzi zərbələr endirilib. Ukrayna ordusu bəzi yaşayış məntəqələrini azad etməyə başlayıb. Ruslar Ukraynanın dərinliklərini hədəf seçdiyi üçün ABŞ və Qərb koalisiyası buna adekvat cavabın verilməsini uyğun sayıb. Bu gün F-16-lardan söhbət gedir. Onlar əldə olunsa, Ukrayna üstünlük qazanacaq. Rusiya hədə tonunda çoxlu bəyanatlar verib. Lakin müasir silahlara qarşı əməliyyat apara bilmədiyini üzə çıxarır. Çıxılmaz vəziyyətdə qalan Rusiya dünyanı atom silahı ilə hədələyir. Güman edirəm ki, bu yalnız blefdir. Çünki ABŞ açıq bəyan edib ki, Rusiya həmin silahı istifadə edərsə, adekvat cavab alacaq. Ukrayna çalışır ki, öz dövlət sərhədinə çıxsın. Bu səbəbdən də Rusiyanın dərinliyindəki strateji obyektlər vurulur. Əsasən də həmin şəhərlərdəki hərbi aerodromlar hədəf alınır. Bu, müharibənin sonu demək deyil. Əksinə, Ukraynanın bu addımları müharibəni daha da uzadacaq".
Məhəmmədəli QƏRİBLİ
