Abutalıb Səmədov: "Artıq Putinin gələcək mətbuat üçün verəcəyi bəyanatın müəyyən tezisləri hazırlanır"
Rusiya Prezidenti Vladimir Putin və baş nazir Mişustin Ermənistan Baş naziri Nikol Paşinyanı ad günü münasibətilə təbrik ediblər. Bu barədə Ermənistan Nazirlər Kabineti məlumat yayıb.
"Rusiya-Ermənistan münasibətləri çoxəsrlik dostluq və qarşılıqlı hörmət ənənələrinə əsaslanır", - Putin təbrikində qeyd edib.
Rusiya lideri Paşinyana cansağlığı, xoşbəxtlik, firavanlıq və hökumət fəaliyyətində uğurlar arzulayıb.
Qeyd edək ki, Paşinyanı ad günü münasibəti ilə indiyə qədər yalnız Belarus lideri Lukaşenko, Qazaxıstan lideri Tokayev və Rusiya lideri Putin təbrik edib. Ermənistanın fəaliyyətini dondurduğu KTMT ölkələrinin Paşinyana bu diqqəti nə ilə bağlıdır?
N.Paşinyanın qərbli dostları isə hələ ki, onu təbrik etməyiblər. Putinin təbrik mətnindəki Paşinyana ünvanlan sözləri səmimi saymaq olarmı?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, Rusiya prezidentinin və Baş nazirinin Paşinyanı ad günü münasibəti ilə təbrik etmələri, çoxəsrlik erməni-rus münasibətlərini xatırlamaları, təbii ki, səmimi təbrik sayıla bilməz: "Bu, əslində son xəbərdarlıqdı. Rusiya rəhbərləri Paşinyana bir daha Rusiya-Ermənistan münasibətlərinin çoxəsrlik tarixini xatırlatdılar. Ermənistana Rusiya hesabına nail olduğu uğurlar barədə düşünməsini məsləhət gördülər. Rusiyanın əvəzolunmaz olduğunu, bütövlükdə Qərbin Rusiyanı əvəz etmək gücündə olmadığını başa salmağa çalışdılar. Çox güman ki, canlı təmaslarda da bu məsələlər barədə bir az daha geniş danışılıb. Ermənistandan Rusiyaya işləmək üçün gedənləri xatırladıb, onların hər il Rusiyadan Ermənistana nə qədər pul göndərdikləri deyilib. Həqiqətən də bu ciddi bir məsələdir. Çünki ötən il ermənilər tarixlərinin rekordunu əldə etdilər və 4 milyard dollara yaxın Ermənistana pul göndərdilər. Bu, MDB ölkələri içərisində ən yüksək göstəricidir. Hətta Ermənistan Çini də keçdi. Bu, təbii ki, çox ciddi rəqəmdir. Paşinyan bu barədə düşünmək məcburiyyətindədir. Digər məsələlər də nəzərə alınmalıdır. Rusiyanın Ermənistanın xarici ticarət dövriyyəsində aldığı öhdəliyə görə, 36 faiz Rusiyanın payına düşür. Bu da çox ciddi rəqəmdir. Rusiyanın Ermənistan iqtisadiyyatında malik olduğu müəssisələr, onların Ermənistandakı çəkisi və s. şirin dillə Paşinyana xatırladıldı. Ona görə də bu heç cür səmimi təbrik sayıla bilməz. Görünür, Belarus prezidentinin təbrikində də bu məqamlar dönə-dönə təkrar olunur. Paşinyan özü bütün bunları bilir. Ona görə də Avrasiya İqtisadi Birliyində iştirakını davam etdirəcəyini dəfələrlə bildirib. Ancaq KTMT-nin son iclasında da iştirak etmədi, üzvlük haqqını da ödəmədi. Burada mövqeyi qətidir. Məqsəd yalnız Avrasiya İqtisadi Birliyində iştirak etmək, ordan mümkün qədər faydalanmaqdır. Ancaq Rusiya da buna imkan verməyəcək. Ermənistanın istədiyini götürməsinə, digər qurumlardan iştirakdan imtina etməsinə Rusiya razı olmayacaq. Mən güman edirəm ki, bu son xəbərdarlıq da heç bir nəticə verməyəcək. Paşinyan artıq öz seçimini edib. O özü də yaxşı bilir ki, bu gün Ermənistanda baş verən çevriliş cəhdinin arxasında da Rusiya dayanıb. Heç təsadüfi deyil ki, Rusiya rəsmiləri, xüsusilə də Xarici İşlər Nazirliyinin sözcüsü Zaxarova Ermənistanda baş verənlərlə bağlı narazılığını bildirmədiyi kimi, Ermənistanın və ermənilərin daxili işidir deyərək mövzudan kənar qalıb. Ancaq orda daxildən çox xaricin rolu daha qabarıq diqqəti cəlb edir. Paşinyanın geriyə yolu yoxdur, onun seçimi bəllidir. Yəqin düşünür ki, itirə biləcəyinin hamısını, yaxud hamısına yaxınını artıq itirib. Qarabağ Azərbaycanın tam nəzarətindədir və orda artıq erməni yoxdur. Delimitasiya işləri başlayıb. Bu da Azərbaycanın istəkləri ilə addım - addım icra olunur. Qərb bundan artığına imkan verməz ki, Rusiya Ermənistan üçün əlavə problemlər yaratsın. Bu səbəbdən Paşinyanın geri dönmək kimi fikri və şansı yoxdur. Kəskin addımlar atılıb, körpülər yandırılıb. Ona görə də, bu müraciətlər təsirsiz qalacaq. Rusiya hələ ki, müəyyən qədər vaxt qazanmağa çalışır, Ukrayna ilə bağlı məsələni yekunlaşdırmaq istəyir. Ancaq o da hələ yekunlaşana oxşamır. İlin sonuna kimi hərbi əməliyyatlar davam edəcək. Görünür, bu son xəbərdarlığı etmək ehtiyacı hiss etdilər. Sonradan Putin uzun çıxışlarını etməli və deməlidir ki, Ermənistanla münasibətləri qorumaq üçün Rusiya ardıcıl addımları atdı. Rusiya çox çalışsa da, Paşinyan bunu anlamadı. Artıq Putinin gələcək mətbuat üçün verəcəyi bəyanatın müəyyən tezisləri hazırlanır. Burada, şübhəsiz ki, Paşinyanın ad günü ilə bağlı təbrik də xüsusi yer tutacaq".
Məhəmmədəli QƏRİBLİ
