Elşad Həsənov: "Bundan sonra da ABŞ-ın İsrailə qarşı sərt addım atacağı real görünmür"
İsrailin baş naziri Benyamin Netanyahu Qəzzada müharibəyə son qoymaq üçün ABŞ prezidenti Cozef Bayden tərəfindən irəli sürülən çərçivə razılaşmasını terrorizmin qələbəsi və İsrailin təhlükəsizliyi üçün təhdid planı adlandırıb. Həmçinin ondan imtina edib.
Həmin plan da 3 mərhələdən ibarətdir. Birinci mərhələdə girovların azad edilməsi və 6 həftəlik atəşkəsin elan olunması. İkinci mərhələdə girovların qalan hissəsinin azad edilməsi və həmişəlik atəşkəs elan edilməsi. Üçüncü mərhələdə isə İsrail qoşunlarının Qəzzadan tamamilə çıxması.
Bax bunu Netanyahu inkar edərək qəbul etmədi. Maraqlıdır, bundan sonra necə olacaq? ABŞ İsrailə dəstək verməkdə davam edəcək, yoxsa etməyəcək? İsraildə də Netanyahu əleyhinə etirazlar başlayıb. Xüsusən də bundan sonra ABŞ İsrailə dəstək verəcək, yoxsa verməyəcək? Əsasən də hərbi yardım göstərəcək, yoxsa göstərməyəcək? Çünki dünya da qəbul edir ki, Baydenin təklifi yaxşı təklifdir, amma İsrail qəbul etmədi. Həm də burada ABŞ-ın siyasətində ziddiyətlərin olması özünü göstərir. Bir yandan sülh təklif edir, o biri yandan da İsrailin Misir sərhədindəki Filadelfiya dəhlizinin tutulmasını HƏMAS-a qarşı müharibənin məntiqinə uyğun hesab edir. Bir yandan İsrail Rəfahın hər yerlə əlaqəsini kəsir, o biri yandan da ABŞ deyir aparılan əməliyyatların məntiqinə uyğundur. Yəni ABŞ tamamilə ziddiyətli siyasət aparır. O baxımdan bütün bu ziddiyətləri ekspertlər necə dəyərləndirir?
"Bu, həm də Baydenin imicinə güclü zərbədir"
Sözügedən məsələni "Bakı-Xəbər"ə şərh edən siyasi ekspert Elşad Həsənov hesab edir ki, ABŞ-ın Fələsin siyasəti yanlış və ziddiyətlidir: "Bəli, Netanyahu ABŞ-ın irəli sürdüyü sülh təklifini rədd etdi. O bildirdi ki, biz sonuncu HƏMAS üzvünü məhv edənə qədər müharibə davam edəcək. Bu da, təbii ki, təəssüf doğurur. Çünki artıq İsrail daxilində də ciddi narazılıqlar var. Xüsusən müxalifət qüvvələri artıq günlərdir ki, mitinqlər keçirir və Netanyahunu istefaya çağırırlar. Eyni zamanda bir sıra dünya ölkələrində Fələstinə azadlıq mitinqlri keçirilir. Genosidə son qoyulması tələb edilir. Bütün bunlara baxmayaraq, Netanyahu qan tökməkdə davam edir. Ötən il oktyabrın 7-dən sonra Qəzzada ölənlərin sayı 40 min nəfəri keçib. Bu da tərəqqipərvər bəşəriyyətdə qıcıq və etirazlar doğurur. Ona görə də əksər ölkələr Fələstinin tanınmasını tələb edir. Bir sıra Avropa ölkələri Fələstinin müstəqilliyinin tanınmasına qərar veriblər. Bu mənada Netanyahunun apardığı siyasət doğru deyil və ABŞ da bu ölkəyə böyük təzyiq imkanlarına malik olduğu üçün gərəkən tədbirləri görməlidir. Ancaq Netanyahu Baydenin planından imtina etsə də, ABŞ İsrailə silah yardımını davam etdirir. Halbuki, Vaşinqton yardımı kəssə, İsrail Qəzzada genosidi dayandırmağa məcbur olacaq. ABŞ-ın riyakarlığı ondadır ki, bütün bunlara rəğmən İsrailə yardımı dayandırmır. O üzdən, bundan sonra da ABŞ-ın İsrailə qarşı sərt addım atacağı real görünmür. Bax Bişləşmiş Ştatların bu siyasəti ziddiyətli və qəbuledilməzdir. Düzdür, Netanyahunun səhv siyasəti onun sonunu gətirəcək. Ancaq öldürülən on minlərlə dinc sakin geri qayıtmayacaq. Bu, həm də Baydenin imicinə güclü zərbədir. Çünki hamı bilir ki, ABŞ İsrailin arxasında durmasa, bütün bu fəlakətlər yaşanmazdı".
Vidadi ORDAHALLI
