Əli Mustafa: "Çox güman ki, Avroparlamentə keçirilən seçkilərdə Makronun partiyası uduzacaq"
Məlum olduğu kimi, bu il iyunun 6-9-da Avropa İttifaqı Şurası Avropa Parlamentinə (AP) seçkilər keçiriləcək. Məlumat üçün qeyd edək ki, Avropa Parlamentində 705 deputat yeri var. Onlar 5 il müddətinə seçilir. AP-yə sonuncu seçki 2019-cu ilin mayında keçirilib.
Bu arada aparılan sorğu zamanı məlum olub ki, fransalı respondentlər qəti "anti-Avropa" mövqeyində qalıblar. Başqa sözlə, altı min nəfərin iştirak etdiyi sorğuların nəticələri Fransa prezidenti Emmanuel Makronun lehinə deyil. Makron mərkəzçi qüvvələri təmsil edir. Bu dəfə gənclır çox fəallaşıblar. Ancaq gəncıər ifrat sağçı qüvvələrə çox meyllidir. Yəni Marin Le Penin rəhbərlik etdiyi Fransanın ifrat sağçı Milli Birlik partiyasına rəğbət bəsləyirlər.
O baxımdan maraqlıdır, Makronun İntibah koalisiyasını iyunda Avroparlament seçkilərində nə gözləyir? Makronu seçkilərdə hansı məğlubiyyət gözləyir?
"Çünki millətçi meyl nəinki Avropanın əksər ölkələrində, ümumiyyətlə dünyada son illər artmaqdadır"
Sözügedən məsələni "Bakı-Xəbər"ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, bütün bunlar Makron üçün yaxşı heçnə vəd etmir: "Bəli, Avropa Parlamenti beş ildən bir birbaşa seçilir. Orada üzv dövlətlərin əhalinin sayına görə kvotası var. Bir qayda olaraq, seçkilər proporsional seçki sistemi əsasında, yəni partiya siyahısı əsasında keçirilir. Fransaya gəldikdə isə, bu ölkənin nüfuzu həm Avropada, həm də dünyada mənfi istiqamətdədir. Faktiki olaraq, Fransa Afrika ölkələrindən qovulur. Eyni zamanda koloniyalarda anti-Fransa ovqatı getdikcə alovlanır. Ona görə də çox güman ki, Avroparlamentə keçirilən seçkilərdə Makronun partiyası uduzacaq. Böyük ehtimalla, seçkilərdə radikal sağçılar qalib gələcək. Çünki millətçi meyl nəinki Avropanın əksər ölkələrində, ümumiyyətlə dünyada son illər artmaqdadır. Yəni bu, son vaxtlar ümumi olan ənənəvi tendensiyadır. O baxımdan hesab edirəm ki, bu seçkilərdə başqa təsir imkanları tətbiq olunmayacaqsa, manipulyasiya edilməyəcəksə, Avropa Parlamentində sağçı-millətçi qüvvələr üstünlük qazanacaq. Budəfəki parlamentdə onların ağırlıq qazanacağı ehtimalı yüksəkdir. Çünki bunu həm aparılan rəy sorğuları, həm də ümumi tendensiya göstərir".
Vidadi ORDAHALLI
