Tural İrfan: "Bu əsassız iddianı səsləndirən kəs tarixə baxsın, tarixi araşdırsın və onda görəcək ki, danışdıqları ağ yalandan başqa bir şey deyil"
Rusiya Dövlət Dumasının deputatı, MDB işləri üzrə komitə sədrinin birinci müavini Konstantin Zatulin yenə də antiazərbaycan davranışlarını davam etdirir və ölkəmizə qarşı həqiqətə uyğun olmayan fikirlər söyləyir.
Erməni yalanlarını, saxtakarlıqlarını, əsassız ərazi iddialarını dəstəkləməklə kifayətlənmək istəməyən Zatulin bir az da irəliyə gedərək erməni Qriqoryan kilsəsinin lobbiçiliyini edir. O, mayın 30-da Moskvada "Lazarevski Klubu"nun 6-cı iclasında bir sıra hədyanlar danışıb.
Zatulin heç bir əsas olmadan Azərbaycanı Qarabağ ərazisində olan monastırların, kilsələrin adlarını dəyişməkdə, "erməni kilsəsini" albanlaşdırmaqda ittiham edib. Tarixi gerçəklikdən xəbərsiz olan erməni muzdlusu Zatulin elə ağ yalan danışıb ki, oxuyanda adam onun ağlına şübhə ilə yanaşmaya bilmir. Azərbaycanın öz halal ərazilərini işğaldan azad etməsini sinirə bilməyən bu ünsür iddia edib ki, guya Azərbaycan "erməni kilsə"lərini alban monastırı hesab edir. "Həqiqətən də, vaxtilə erməni kilsəsinin tərkibində alban kilsəsi olub və on minə yaxın udin var"-deyib. Udilərin alban kilsəsinin varisi olması faktını həzm edə bilməyən Zatulin unudur ki, onlar bu kilsənin varisləri kimi qələmə verilmir, gerçəkdən udilər alban kilsəsinin varisləridir. Guya Azərbaycan ermənilərin "Dadavank" adlandırdığı monastırın adını dəyişib Xudavəng qoyub. Əslində, o monastırın adı elə Xudavəng olub və adı ermənilər tərəfindən qanunsuz olaraq dəyişdirilib. Xudavəngin də alban xristian monastırı olmasının sübuta ehtiyacı yoxdur ki... Azərbaycan zəvvarlarının Xudavəngə ziyarətə getməsini "qanunsuz" və birbaşa "tarixi irsə qarşı cinayət" adlandıran Zatulin elə tarixi irspərəstdirsə, bəs onda nə üçün ermənilərin alban abidələrinin başına gətirdiyi müsibətləri dilə gətirmir? Demək məqsəd erməni yalanlarına daha bir dəstək vermək, alban irsinin əsl sahibləri olan udilərin hüquqlarını pozmaqdır. Qarabağdakı alban kilsə və monastırları erməni təcavüzü dövründə erməniləşdirilib və o abidələrə saxta erməni xaçkarları, başqa elementlər qoyulub. İndi isə ərazilərimiz də, monastırlarımız da azaddır və xristian zəvvarlar o monastırları rahatlıqla ziyarət edib ayinlər icra edirlər. Zatulin kimi erməniyanlıları da yandıran budur. Ona görə də əlinə keçən tribunadan erməni kilsəsinin lobbhiçiliyini edir. Bu isə başadüşüləndir.
"Zatulinin hansı yolun yolçusu olduğunu hər kəs bilir, bu baxımdan, onun bu dəfə dedikləri də cəfəngiyatdan başqa bir şey deyil"
Milli Cəbhə Partiyasının sədr müavini, ilahiyyatçı Tural İrfan "Bakı-Xəbər"ə şərhində bildirdi ki, bu cür siyasi bəyanatlarda tarix nəzərə alınmır. "Necə ki, qondarma erməni soyqırımı məsələsi ilə bağlı dəfələrlə Türkiyə qarşısına əsassız tələblər qoydular, bir çox müsəlman ölkələri də ermənilərə səsləndilər ki, arxivlər açılsın, buna da ermənilər razı olmadılar. Bu cür iddialarda tarixə, arxiv sənədlərinə əsaslanılsa ermənilərin bu iddiaları tamamilə ifşa olunar. Ona görə də Qafqaz Albaniyası tarixi bu məsələlərin isbatına kifayət edir ki, heç də tarixdə "Qafqaz Ermənistanı" olmayıb. Qafqaz Albaniyası olub. Qafqaz Albaniyası olubsa, bəs onun kilsəsi olmayıbmı? Şimali Azərbaycanda, eləcə də indiki Ermənistan ərazisində, Qərbi Azərbaycanda mövcud olan xristian abidələrinin, monastırların, kilsələrin əksəriyyəti Qafqaz Albaniyasına aiddir və orada aparılan arxeoloji qazıntılar, eləcə də tarixi faktlar bunu sübut edir. Hətta bu ərazilərdə qədim türk Tanrıçılıq dinlərinə mənsub abidələr də var ki, bu tamamilə ermənilərin bütün iddialarını puça çıxarır. Bu baxımdan hesab edirəm ki, bu cür məsələlərə bizim alimlərimiz daha kəskin cavab verməlidirlər. AMEA da daxil olmaqla, elmi qurumlarımız cavablar verməkdə aktiv olmalıdırlar. Rəhmətlik akademik Ziya Bünyadov bu kimi məsələləri çox açıq-aydın şəkildə ifşa edirdi, erməni iddialarını puça çıxarırdı. Təəssüflər olsun ki, indi bizim elə kəsərli söz deyən alimlərimiz yoxdur. Bu tamamilə cəfəngiyatdır, erməni kilsəsi deyə bir şey olmayıb. Bunlar sonradan qondarılmış bir məsələdir. Ermənilər tarixən burada yaşamaya-yaşamaya bu bölgədə erməni kilsəsi necə ola bilər?"
T.İrfan vurğuladı ki, İrəvandakı Cümə məscidini farslar "İran məscidi" kimi restavrasiya edib, hətta ora bir saxta lövhə də yapışdırıblar. Bunun da bir qədər dinin və məzhəbin eyniliyindən sui-istifadə cəhdi olduğunu deyən T.İrfan bildirdi ki, ermənilər də məhz xristian olduqları və alban-udi kilsəsinə məzhəb baxımından bir qədər yaxınlıq hiss olunduğu üçün bu yola əl atırlar: "Alban xaçı ilə erməni xaçı fərqlidir. Xaç Qafqaz Albaniyasında başqa cür olub. Buna da bir qədər dəyişiklik edib həmin abidələri guya erməni abidəsi kimi qələmə verməyə çalışırlar, əslində isə onlar alban abidələridir. Ermənilərin bu davranışları cəfəngiyatdır. Qafqaz Albaniyası olub, udilər də həmin o Qafqaz Albaniyasından qalmış bir xalq, bir əqidə daşıyıcısı kimi bu kilsələrin varisləridir, eyni zamanda Qafqaz Albaniyasının tarixi yadigarı
Azərbaycan bu kilsələrin sahibidir, varisidir. Qafqazda erməni kilsəsi deyilən bir nəsnə mövcud olmayıb. Onu sonradan qondarıblar, ondan siyasi məqsədlərə çatmaq, Türkiyə və Azərbaycan əleyhinə istifadə etmək, bütövlükdə isə Qafqazda təxribatları idarə etmək üçün Qərb gücləri, eləcə də o dövrkü Rusiya dövləti tərəfindən qondarılıb. Erməni kilsəsi də, erməni dövləti də o dövlətlər tərəfindən bölgədə təhlükə mənbəyi kimi qurulan bir məsələdir. Ona görə də hesab edirəm, bu iddiaların özü bir şantaj xarakteri daşıyır ki, guya erməni kilsələrini Azərbaycan albanlaşdırır. Bunlar hamısı cəfəngiyatdır, yalandır. Bu əsassız iddianı səsləndirən kəs tarixə baxsın, tarixi araşdırsın və onda görəcək ki, danışdıqları ağ yalandan başqa bir şey deyil. İkincisi də, alban kilsəsi erməni kilsəsinin yox, erməni kilsəsi alban kilsəsinin nəzdində fəaliyyət göstərib, yaxid ona tabe olub. Bu ola bilər. Çünki Qafqaz Albaniyasının bütün dövrlərinə, Cavanşirin zamanına, yaxud başqa bir vaxta aid tarixi mənbələrdə, orta əsr mənbələrində, müasir tədqiqatlarda, tarixi məxəzlərdə, nəşrlərdə də bu öz təsdiqini tapır. Açıq-aydın şəkildə hər şey göz qabağındadır. Moisey Kalankatlının Qafqaz Albaniyasına həsr etdiyi tarixi əsərdə də bunların hamısı özünü təzahür etdirir. Yəni Qafqazda erməni kilsəsi, erməni dini, erməni mədəniyyəti deyilən bir nəsnə olmayıb, bunun heç izi-tozu da yoxdur. Onlar Hindistandan və Babilistandan müxtəlif qaraçı tayfalarının tərkibi olaraq dünyanın müxtəlif ölkələrinə yayılıblar və Qafqaza da Gülüstan və Türkmənçay müqaviləsindən sonra İrandan, Türkiyədən və başqa ölkələrdən köçürülüb gətiriliblər. Onları bir yerə Ermənistan adlı dövlət yaratmaq üçün cəmləşdiriblər. Belə olduğu halda, indiki Ermənistanda qədim erməni kilsəsi necə mövcud ola bilər?"
O qeyd etdi ki, kiçik bir qövm olan ermənilərin Qafqaz Albaniyasına aid olan böyük tarixi memarlıq irsini qurub yaratmaq gücləri vardımı? "Bunun özü də absurddur"-deyə bildirən ilahiyyatçı hesab edir ki, o dövrdə burada çox az sayda erməni yaşamış olsa da belə, bir ovuc erməninin bu qədər möhtəşəm abidəni tikməyə gücü belə ola bilməzdi. "O abidələrin öz tarixi varisləri var. Həm bu tarixi abidələr, həm də kilsələr Qafqaz Albaniyasına məxsusdur. Buna nə siyasi, nə tarixi, nə də başqa yöndə bir irad ola bilər. hərtərəfli olaraq bu abidələr də, bu kilsələr də Qafqaz Albaniyasına aid olan irsdir. Ermənilərin əsla Qafqazda nə mədəniyyəti, nə tarixi irsi mövcud olmayıb"-deyə T.İrfan vurğuladı.
T.İrfan hesab edir ki, bu baxımdan Zatulinin də iddiaları cəfəngiyatdan başqa bir şey deyil: "Zatulinin hansı yolun yolçusu olduğunu hər kəs bilir, bu baxımdan, onun bu dəfə dedikləri də cəfəngiyatdan başqa bir şey deyil. O həmişə ermənilərin əlində alət olub və erməni lobbisinin pulu ilə qidalanıb. Hər şeydən əli çıxıb, indi də erməni kilsəsinə təəssübkeşlik edir, bu yolla təxribatçılıqla məşğul olur. Amma onun heç bir təxribatı baş tutası deyil, çünki gerçəklik dəyişməzdir. O adama bir daha xatırladaq ki, ermənilər alban kiləsinin irsini oğurlayıb saxtalaşdırıblar"-deyə T.İrfan bildirdi.
İradə SARIYEVA
