Bu ilin noyabrında Bakıda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) könüllülərin iştirakını təşkil etmək üçün qeydiyyat prosesinə start verilib.
Ötən illər ərzində ölkəmizin ev sahibliyi etdiyi irimiqyaslı tədbirlərin icrasında olduğu kimi, könüllülər qlobal əhəmiyyətli COP29-un təşkilində də mühüm rol oynayacaqlar. Belə ki, konfransın təşkilati işləri ilə bağlı zəruri əməliyyatların icrası məqsədilə COP29 Azərbaycan Əməliyyat Şirkətinin fəaliyyəti çərçivəsində həm yerli, həm də xarici vətəndaşların, ümumilikdə isə 3000 könüllünün prosesə cəlb olunması gözlənilir. Könüllülük proqramı çərçivəsində COP29-a öz töhfəsini vermək, eləcə də təcrübə, işgüzar vərdiş və fərdi inkişafa yiyələnmək niyyətində olan könüllülərin layihəyə rahat və koordinasiyalı şəkildə qoşulmaları üçün www.volunteers.cop29.az onlayn qeydiyyat platforması istifadəyə verilib.
COP29-un Könüllülük proqramının əsas məqsədləri dayanıqlılıq səfirləri kimi çıxış edəcək könüllülərin unikal bacarıqlarının real həllərin dəstəklənməsinə yönəldilməsi, əməkdaşlıq mədəniyyətinin təşviqi üçün hər səsin eşidildiyi, hər töhfənin qiymətləndirildiyi inklüziv mühitin təmin edilməsidir. Bu məqsədlə seçim və təlimlər prosesi zamanı yüksək motivasiyalı və müştərək öhdəliklə bir araya gələn gənclərdən ibarət komanda formalaşdırılacaq.
Könüllülərin müasir tələblərə cavab verən fərqli sahələrdə işləmək bacarıqlarının inkişaf etdirilməsində COP29 Könüllülük proqramı xüsusi əhəmiyyət kəsb edir.
Tədbir həm də ölkədəki sosial fəallığın artmasına kömək edəcək
Proqram çərçivəsində komanda ruhunun təşviqi, kollektivdə işləmək və ünsiyyət bacarıqlarının təkmilləşdirilməsi məqsədilə müxtəlif tədbirlərin təşkili də nəzərdə tutulmuşdur. Bütün bunlar onu deməyə əsas verir ki, sözügedən tədbir həm də ölkədəki sosial fəallığın artmasına kömək edəcək.
Azərbaycanın beynəlxalq tədbirlərə ev sahibliyi etməklə böyük təcrübə qazanıb. Dünyanın ikinci ən böyük təşkilatı olan Qoşulmama Hərəkatına Azərbaycan 4 ildir ki, sədrlik edir. Ölkəmizin sədrliyi Qoşulmama Hərəkatına bir canlanma gətirib, qlobal əhəmiyyətli qərarların qəbul edilməsi ilə tarixə düşüb.
COP29 beynəlxalq konfrans kimi məsuliyyətli bir tədbirdir. Bu tədbirin keçirilməsinə az vaxt qalsa da, hazırlıq işləri yüksək səviyyədə təşkil olunur. Məsələ ilə bağlı ilk iclasın dövlətimizin başçısının rəhbərliyi ilə keçirilməsi bu tədbirin nə qədər məsuliyyətli olduğunun göstəricidir. Hesab edirəm ki, Azərbaycan COP29 tədbirini keçirməklə bu sahəyə də bir yenilik gətirəcək. Ölkəmizdə keçirilən bütün tədbirlər yeniliklərlə hər zaman beynəlxalq ictimaiyyəti təəccübləndirib. Bu tədbirdə də qlobal əhəmiyyətli təsiredici gücə malik qərarlar qəbul edilməklə Azərbaycan dünya tarixində yeni bir imza ilə fərqlənəcək.
Həm təcrübə qazanılır, həm də iştirakçılıq siyasi və sosial fəallığın artmasına stimul verir
COP29 Təşkilat Komitəsinin üzvü Pərvanə Vəliyeva hesab edir ki, vətəndaş cəmiyyəti iqlim dəyişikliyi ilə mübarizədə, iqlim dəyişikliyi ilə bağlı beynəlxalq danışıqlar proseslərində əsas rol oynayır.
O qeyd edib ki, Azərbaycan bütün maraqlı tərəfləri dinləmək və onların maraqlarına cavab verəcək mövqe formalaşdırmaq və yeni hədəf və təşəbbüslərlə qlobal iqlim problemlərinə diqqət yetirilməsi məsələlərini gündəmdə saxlayır:
"Vətəndaş cəmiyyəti dəyişiklik üçün katalizator rolunu oynayır, kütləvi hərəkatları stimullaşdırır və dünya liderlərini hərəkətlərinə görə məsuliyyətə cəlb edir. Vətəndaş cəmiyyətinin konstruktiv iştirakı, üzv dövlətlər, icmalar və əsas qruplar, eləcə də digər maraqlı tərəflər arasında çoxtərəfli dialoq COP29-un uğurla həyata keçirilməsi üçün əsas rollardan birini oynayacaq".
Bir daha məlum olur ki, Azərbaycan bu tədbirə ciddi hazırlaşır. Təbiidir ki, göstərilən təşəbbüslərin ölkədə sosial və siyasi fəallığın artması üçün də böyük faydası var. Həm təcrübə qazanılır, həm də iştirakçılıq siyasi və sosial fəallığın artmasına stimul verir.
30 ölkədən 107 QHT də müraciətə qoşulub
Vətəndaş cəmiyyətinin dünyadakı təmsilçiləri də bu tədbirə böyük maraq göstərir və dəstək ifadə verir. 106 ölkədən 2300 QHT-ni özündə birləşdirən Afrika Səhiyyə Təşkilatları Assosiasiyası (The Afrihealth Optonet Associationğ (AHOA) Azərbaycana COP29-la bağlı dəstək bəyanatı verib. Bəyanatı AHOA-nın rəhbəri Uzodinma Adiriece imzalayıb. AHOA-ya üzv və tərəfdaş olan 30 ölkədən 107 QHT də müraciətə qoşulub.Bəyanatda AHOA-nun Azərbaycanın iqlim dəyişmələri ilə bağlı qlobal fəaliyyətdə nümayiş etdirdiyi həqiqi fədakarlığı və liderliyi alqışlayır, bütün dünyanı iqlim dəyişikliyinə qarşı mübarizə aparmaq üçün COP29-un yaratdığı tarixi fürsətdən istifadə etməyə çağırır. Əminliklə demək olar ki, bu tədbiri keçirməklə Azərbaycan öz təcrübəsinin üzərinə əlavə təcrübə toplamış olacaq.
Məhəmmədəli QƏRİBLİYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
