Elşad Musayev: "Tərəflərin geri çəkilmək niyyəti olmasa da, bütün hallarda üstünlük, güc Paşinyanın tərəfindədir"
Ermənistan Baş naziri Aparatı İrəvandakı aksiyalar zamanı qanun pozuntularına yol verən keşiş Baqrat Qalstanyan və digər kilsə xadimlərinə xəbərdarlıq edib.
Aparat rəhbərinin müavini Taron Çaxoyan yaydığı məlumatda bildirib ki, dövlət əleyhinə siyasətlə məşğul olan din xadimləri bunun siyasi bədəlini ödəməyə hazır olmalıdırlar. "Kilsəni siyasi platformaya çevirənlər və dini xidməti siyasətlə əvəz edənlər heç kimdən üstün deyillər və dövlət əleyhinə apardıqları siyasətin bütün bədəllərini ödəyəcəklər", - ölkə rəsmisi vurğulayıb.
Xatırladaq ki, Ermənistanda bir müddətdir Azərbaycanla sərhədlərin delimitasiyası prosesinə etiraz edən müxalifətçilər etirazlar keçirir. Onlar Ermənistanla Azərbaycan arasında sərhəd dirəklərinin quraşdırılmasına, Qazaxın işğal altında olan bir neçə kəndinin Azərbaycana qaytarılmasına, ümumilikdə sülh prosesinə mane olmağa çalışırlar.
Bütün bu deyilənlərin fonunda, Ermənistanda hakimiyyət kilsəyə qarşı nə kimi tədbirlər görmək imkanlarına malikdir? O cümlədən, nə kimi tədbirlər görəcəyi gözlənilir?
"Kilsə böyük vəsaitlərə malik olduğu üçün hakimiyyət buna maliyyə nəzarətini təmin etmək istəyir"
Sözügedən məsələ ilə bağlı fikirlərini "Bakı-Xəbər"lə bölüşən Böyük Azərbaycan Partiyasının sədri Elşad Musayev hesab edir ki, kilsə faktiki olaraq siyasətlə məşğul olur və hökumətin işinə müdaxilə edir: "Məlum olduğu kimi, Ermənistanda Baqrat Qalstyanın rəhbərliyi altında etiraz aksiyaları davam edir. Keşiş xeyli müddətdir ki, ətrafına müəyyən adamları toplayıb və sərt siyasi bəyanatlar verir. Onun ətrafında olan qüvvələr isə kilsə, xaricdəki erməni diasporu və parlament müxalifətidir. O müxalifət ki, 20 il hakimiyyətdə olub və bu dövr ərzində ölkəni talayıb. Söhbət Röbert Köçəryan və Serj Sarkisyanın timsalında mövcud olan "Qarabağ klanı"ndan gedir. Bu qüvvələrin cəmiyyətdə tərəfdarları az olduğu üçün keşiş Baqratın arxasında gizlənərək Paşinyanı devirmək istəyirlər. Etiraz aksiyasında müəyyən şəxslər həbs edilsə də, Paşinyan onlara qarşı genişmiqyaslı sərt tədbirlər görmür. O cümlədən, Baqratın özünə qarşı sərt tədbirlər görülmür. Ancaq son vaxtlar müəyyən səslər çıxır. Çünki kilsə faktiki hökumətin işlərinə qarışır, siyasətlə məşğul olur. Kilsə ilə Paşinyan arasında qarşıdurmalar var, amma hər halda din incə məsələdir. O üzdən, görünür, Ermənistan hökuməti hələlik müəyyən qədər məsələlərə dözümlü yanaşır. Ancaq bu, hər zaman belə olmayacaq. Ermənistan hüquq-mühafizə orqanları Baqrata və onu dəstəkləyənlərə qarşı sərt tədbirlər görəcək. Həmçinin kilsə böyük vəsaitlərə malik olduğu üçün hakimiyyət buna maliyyə nəzarətini təmin etmək istəyir. Çünki bununla bağlı şəffaflıq yoxdur. Görünən odur ki, tərəflərin heç biri bir-birinə güzəştə getmir. Digər tərəfdən kənardan, Rusiyadan və digər yerlərdən Baqrata mənəvi dəstək verilir. Ona görə də Ermənistanda faktiki olaraq iki qütb üz-üzə durub. Burada heç kəsin geri çəkilmək niyyəti yoxdur. Ancaq bütün hallarda üstünlük, güc Paşinyanın tərəfindədir. Ona görə də, fürsət düşən kimi, Baqratın hərəkatını dağıdacaqlar".
Vidadi ORDAHALLI
