Sülhməramlılar Qarabağdan çıxdı - oyuna baş konsulluq girir...
Əli Mustafa: "Gələcəkdə Qarabağın yenidən ermənilərə qaytarılması üçün Rusiya sanki özünün strukturunu, kommunikasiyalarını yaradır"
Rusiya Xankəndidə yaxın vaxtlarda baş konsulluğunun açılışı üçün hazırlıqlara başlayacaq və bu işdə Azərbaycanın dəstəyinə ümid edir.
Bunu Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidovun rəhbərlik etdiyi nümayəndə heyəti ilə görüşdə Rusiya Federasiya Şurasının Beynəlxalq Əlaqələr Komitəsinin rəhbəri Qriqori Karasin deyib:
"Mən ikitərəfli məsələlərdən yaxın gələcəkdə Xankəndidə baş konsulluğun açılmasını qeyd edərdim və bu işdə dəstəyinizə ümid edirəm".
Onun sözlərinə görə, bu baş konsulluğun 2024-cü ildə açılması yaxşı olardı:
"Bu bizə qarşılıqlı konsulluq üzrə fərqi aradan qaldırmağa imkan verəcək".
Maraqlıdır ki, əvvəl Rusiya Qarabağın mərkəzindəki təmsilçiliyini sülhməramlılar vasitəsilə edirdi, indi isə bunu baş konsulluqla əvəzləməyə çalışır. Rusiyanın Xankəndidə baş konsulluq açmaq niyyəti nə ilə bağlıdır?
Müstəqil siyasətçi Əli Mustafa "Bakı-Xəbər"ə açıqlamasında bildirdi ki, Rusiyanın Xankəndidə konsulluq və ya baş konsulluq açmaq istəyi sürprizdir: "Cəmiyyətin əksər təbəqələrinin bu məsələyə münasibəti müsbət deyil. Bu onunla bağlıdır ki, Qarabağda hər hansı rus icması, yaxud Rusiya ilə əlaqələri konsulluq səviyyəsində təmin edəcək zəruri hal yoxdur. Bu gün Xankəndidə məskunlaşma çox aşağı səviyyədədir. Təbii ki, burda məskunlaşan insanlar da Azərbaycan vətəndaşları olacaq. Onların isə Rusiya ilə hansısa konsulluq vasitəsilə əlaqə yaratmaq zərurəti olmadığına görə belə bir istəyin xoş məramdan qaynaqlandığını demək çox çətindir. Düzdür, Rusiya burada bərabərlik yaratmağa çalışır. Guya bizim Rusiyada olan konsulluqların sayı ilə eyniləşdirmək istəyir. Ancaq bu formal bir bəhanədir. Əvvəla, Azərbaycanın ərazisi də, Azərbaycanda yaşayan rusların sayı da adekvat deyil. Rusiya daha böyükdür, orada daha çox azərbaycanlı yaşayır. Bu, Rusiyanın özünün siyasətindən, günahından qaynaqlanan bir haldır ki, azərbaycanlılar məcbur olub Rusiyaya köçüblər. Rusiya bir növ insan resurslarımızın ora köçməsini, orda yaşamasını istəyib. Bu baxımdan Rusiyada yaşayan azərbaycanlıların çox olması bizim təqsirimiz deyil. Ona görə də, orda Azərbaycan konsulluqlarının sayının çox olması normaldır. Burada yaşayan rusların böyük əksəriyyəti Rusiyaya köçüb. Qarabağda, Xankəndidə isə hansısa rusun yaşaması barədə hələ ki, məlumatım yoxdur. Amma mütləq hansısa bərabərlik yaratmaq zərurəti varsa, o zaman Şirvan, Naxçıvan və ya digər şəhərlərdə belə bir konsulluq açıla bilər. Qarabağda Rusiyanın baş konsulluq açmaq istəyi isə heç də xoş olmayan niyyətlərdən xəbər verir. Gələcəkdə Qarabağın yenidən ermənilərə qaytarılması üçün Rusiya sanki özünün strukturunu, kommunikasiyalarını yaradır. Demək, ruslar yenidən ora erməniləri qaytarmaq, bununla da həm bizə, həm Ermənistana təsir etməyə çalışır. Ona görə də bu heç də xoş olmayan bir istəkdir. Rusiya artıq anlamalıdır ki, Azərbaycan müstəqil, suveren bir dövlətdir. Diplomatik münasibətlər yalnız dövlətlərin qarşılıqlı istəyi ilə baş verməlidir. Bu istək isə Rusiyanın imperiya siyasətindən imtina etmədiyini ortaya qoyur. Qarabağ üzərindən gələcəkdə hansısa siyasi memarlıqla məşğul olduğu göz qarşısındadır. Mən düşünürəm ki, Azərbaycan tərəfi buna rədd cavabı verməlidir. Qarabağda, Xankəndidə nə Rusiyanın, nə də başqa bir dövlətin diplomatik qurumuna ehtiyac var. Ehtiyac olan Qarabağın azərbaycanlılar, Qarabağdan, Qərbi Azərbaycandan qovulmuş azərbaycanlılar tərəfindən məskunlaşmasını təmin etməkdir. Nə vaxtsa erməninin ora qayıtması məsələsi gündəmə gələrsə, o halda mütləq Qərbi Azərbaycandan qovulmuş azərbaycanlıların da Ermənistana qaytarılması məsələsi həll edilməlidi. Ondan sonra artıq konsulluq məsələsi də gündəmə gələ bilər".
Məhəmmədəli QƏRİBLİ
