Əli Orucov: "Moskva yaxşı bilir ki, ona bağlı olan müxalif qüvvələrin cəmiyyətdə nüfuzu yoxdur"
Rusiya Federasiya Şurasının Beynəlxalq Məsələlər üzrə komitəsi rəhbərinin birinci müavini Vladimir Cabarov bəyan edib ki, Rusiya Ermənistanda sabit vəziyyətin yaradılmasında maraqlıdır.
V.Cabarov Rusiya Federasiyasının respublikanın istənilən hökuməti ilə işləyəcəyini də bəyan edib. Cabarovun sözlərinə görə, Rusiya vəziyyəti diqqətlə izləyir, çünki Ermənistan "KTMT-dəki tərəfdaşımızdır, baxmayaraq ki, onlar son vaxtlar bu strukturu tərk etmək barədə getdikcə daha çox danışırlar".
Daha sonra o bunları qeyd edib: "Bundan əlavə, Avrasiya İqtisadi Birliyinin üzvüdür. Hələlik biz görürük ki, Paşinyan həm seçkilərdən sonra, həm də İkinci Qarabağ müharibəsindən sonra hakimiyyəti saxlayıb. Kifayət qədər güclü mövqeyə malikdir. Rusiya həmişə deyir ki, biz Ermənistanın təbii müttəfiqiyik və ümid edirik gələcəkdə də belə qalacağıq. Bizi bir-birimizdən uzaqlaşdırmaq cəhdi Ermənistanın özü üçün ən ağır nəticələrə səbəb olacaq, çünki ermənilərin Rusiyadan daha sadiq müttəfiqi yoxdur".
Maraqlıdır, Rusiya rəsmisi "Paşinyan kifayət qədər güclü mövqeyə malikdir" deməklə nə demək istəyir? Paşinyanın mövqeyinin bu qədər möhkəm olmağının etirafının arxasında nə dayanır, bunda məqsəd nədir? Doğrudanmı Rusiya Paşinyanın hakimiyyətini belə möhkəm hesab edir? Doğrudanmı onlar Ermənistanda sabitliyin olmasında maraqlıdılar? Nə qədər realdır ki, Rusiya Ermənistanda istənilən hakimiyyətlə işləməyə hazırdır?
"Paşinyanın nüfuzu nə qədər aşağı olsa da, Ermənistan ictimai rəyində Rusiyaya qarşı ciddi mənfi münasibət var"
Sözügedən məsələyə aydınlıq gətirən AMİP funksioneri Əli Orucov "Bakı-Xəbər"ə açıqlamasında qeyd etdi ki, Rusiya rəsmisinin səsləndirdiyi fikirlər formal xarakterlidir: "Rusiya rəsmisi bununla iz azdırır. Rusiya indiki hakimiyyətə müttəfiq kimi yanaşsaydı, Paşinyana qarşı olan qüvvələrin mitinqlərini dəstəkləməzdi. Demək olar ki, Rusiyanın bütün KİV-ləri aksiyaları keniş işıqlandırır, hökumətdən narazı olanların fikirlərini tirajlayır. Rusiya telekanallarında Paşinyanın ünvanına sərt, təhqiramiz fikirlər səsləndirilir. Hər vasitə ilə Paşinyanı və onun komandasını erməni cəmiyyətindən ayrı tuturlar, gözdən salırlar. Kiməsə sirr deyil ki, Erməni Kilsəsinin mitinqərinə Rusiya dəstək verir. Moskva yaxşı bilir ki, ona bağlı olan müxalif qüvvələrin cəmiyyətdə nüfuzu yoxdur. Söhbət sabiq prezidentlər Röbert Köçəryan, Serj Sarkisyan və onlara bağlı olan siyasi qüvvələrdən gedir. Onlara bağlı olan qüvvələr parlamentdə təmsil olunsalar da, cəmiyyətdə siyasi çəkiləri yoxdur. Ona görə də sözügedən qüvvələr Erməni Kilsəsinin arxasında gizlənərək hakimiyyəti devirmək istəyirlər. Mitinqlərin təşkilinə maliyyə dəstəyini Köçəryanla Sarkisyan və Rusiyadakı erməni lobbisi verir. Buna rəğmən, Paşinyanın devrilməsi şansları aşağıdır. Paşinyanın nüfuzu nə qədər aşağı olsa da, Ermənistan ictimai rəyində Rusiyaya qarşı ciddi mənfi münasibət var. Bunu Kreml də yaxşı bilir. Ona görə də belə açıqlamalar verməklə Ermənistan ictimaiyyətini sakitləşdirmək istəyirlər. Guya Rusiya Ermənistanda legitim hakimiyyəti dəstəkləyir. Əslində isə bu belə deyil".
Vidadi ORDAHALLI
