Şakir Ağayev: "Bu zirvə toplantısı bütövlükdə ada dövlətlərinin həyatına, onların iqlim dəyişiklikləri ilə mübarizəsinə də öz töhfəsini vermiş olacaq"
"İnkişaf etməkdə olan kiçik ada dövlətləri iqlim dəyişikliyinin təsirlərinə daha həssasdır". Bu fikir Azərbaycan Prezidenti İlham Əliyevin Kiçik Adalar üzrə İnkişaf etməkdə olan Dövlətlərin "Dayanıqlı inkişaf üçün istiqamətin müəyyən olunması" mövzusunda Antiqua və Barbudada keçirilən 4-cü Beynəlxalq Konfransının iştirakçılarına müraciətində yer alıb.
İqlim dəyişikliyinin həmin dövlətlərin Dayanıqlı İnkişaf Məqsədlərinə nail olmaq istiqamətində irəliləyişinə də mane olduğunu vurğulayan dövlət başçısı qeyd edib: "COP29-a sədrliyimiz zamanı iqlim dəyişikliyinin İnkişaf etməkdə olan kiçik ada dövlətləri üçün yaratdığı problemlərin həlli prioritetlərimiz arasında olacaq. Biz Bakıda keçiriləcək COP zamanı İnkişaf etməkdə olan kiçik ada dövlətlərinin Zirvə toplantısını keçirməyi planlaşdırırıq. İnkişaf etməkdə olan kiçik ada dövlətlərinin səslərinin yüksək və aydın eşidilməsini təmin etmək üçün əlimizdən gələni edəcəyik".
"Müxtəlif ölkələrin təmsilçilərinin də birbaşa iştirak etdiyi tədbir çərçivəsində…"
"Novoye vremya" qəzetinin baş redaktoru Şakir Ağayev "Bakı-Xəbər"ə şərhində bildirdi ki, COP29 çərçivəsində inkişaf etməkdə olan kiçik ada dövlətlərinin Zirvə toplantısını keçirməyisinin planlaşdırılması çox mühüm bir hadisədir. Bu təklifin, təşəbbüsün Azərbaycan tərəfdən irəli sürülməsinin böyük əhəmiyyəti olduğunu deyən Ş.Ağayev hesab edir ki, bu, ada dövlətlərinin müasir tarixində ayrıca bir səhifə açacaq. "Təbii ki, kiçik ada dövlətlərinə bu cür münasibət göstərilməsi, COP29 zamanı onların zirvə toplantısının keçirilməsi bu dövlətlərin müstəqillik uğrunda mübarizəsinə mühüm töhfə verəcək. Ada dövlətlərinin neokolonializmə qarşı mübarizəsində böyük bir dəstək olacaq. Eyni zamanda da bu zirvə toplantısının keçirilməsi iqlim dəyişikliyinin inkişaf etməkdə olan kiçik ada dövlətlərində yaratdığı problemlərin aradan qaldırılmasına əvəzsiz dəstək kimi qiymətləndirilməlidir. COP29 beynəlxalq BMT tədbiridir və onminlərlə adam bu tədbirdə iştirak edəcək. Müxtəlif ölkələrin təmsilçilərinin də birbaşa iştirak etdiyi tədbir çərçivəsində belə bir zirvə toplantısının keçilməsi onların beynəlxalq aləmdə səslərinin yüksəldilməsinə, iqlim dəyişikliyi ilə bağlı üzləşdikləri problemlərə diqqətin artırılmasına nail olmağa dəstək olacaq"-deyə Ş.Ağayev bildirdi.
O vurğuladı ki, bu, ada dövlətlərinin iqlim dəyişiklikləri ilə mübarizəsinə dəstək olmaqla yanaşı. həm də onların hüquqlarının, azadlıqlarının siyasi və başqa tərəflərdən müdafiəsinə mühüm bir töhfə olacaq. O qeyd etdi ki, Azərbaycan Yeni Kaledoniyanın timsalında bunu göstərib. "Azərbaycan Qoşulmama Hərəkatına sədrlik edərkən iqtisadi cəhətdən zəif, kasıb dövlətlərin həyatında mühüm rol oynayıb, belə dövlətlərə xüsusi diqqət ayırıb. Müstəqillik uğrunda mübarizə aparan xalqlara dəstək olub. Proses bu gün də davam edir.
Cənab Prezidentin müraciətində də bu açıq-aydın özünü göstərir. Belə dövlətlərin hətta sonda tanınmasında da, qlobal dünyada onların yer tutmasında da bu zirvə toplantısı əhəmiyyətli rol oynayacaq. Azərbaycan məhz bu məqsədi qoyub ki, inkişafda olan ada dövlətləri daha da inkişaf etsin, müstəqilliklərinə nail olsunlar. Bu zirvə toplantısı bütövlükdə ada dövlətlərinin həyatına, onların iqilim dəyişiklikləri ilə mübarizəsinə də öz töhfəsini vermiş olacaq"-deyə Ş.Ağayev qeyd etdi.
İradə SARIYEVA
