Elşən Manafov: "Bütün bunlar kilsənin siyasi hakimiyyət uğrunda mübarizəyə qatıldığının göstəricisidir"
Ermənistanda müxalif "Tavuş Vətənin uğrunda" Hərəkatı Tavuş yeparxiyasının baş yepiskopu Baqrat Qalstanyanın baş nazir postuna namizədliyini irəli sürüb.
Bunu İrəvanın Respublika meydanında keçirilən mitinqdə "Tavuş Vətənin uğrunda" Hərəkatın liderlərindən olan Qurgen Melikyan bəyan edib: "Bizi çox çətin mərhələ gözləyir. Biz bu çətinliyi dəf etməliyik. Başa düşməliyik: indi kim bu məsuliyyəti öz üzərinə götürsə, bu onun həyatında ən çətin xidmət olacaq. Ermənistan heç vaxt belə çətin vəziyyətdə hakimiyyəti dəyişməyib. Bu gün bizə bu məsuliyyəti öz üzərinə götürəcək, hamını birləşdirəcək biri lazımdır. Bu şəxs, əlbəttə ki, arxiyepiskop Baqrat Qalstanyandır".
Qalstanyan isə bildirib ki, heç vaxt məsuliyyətdən yayınmağa çalışmayıb. Onun sözlərinə görə, baş nazir postuna namizədliyini Bütün Ermənilərin Katolikosu ilə müzakirə edib və qərara gəlib ki, din xadimi kimi 30 illik fəaliyyətinə ara versin: "Ya görüşə könüllü gələcək (Paşinyan), ya da məcburən görüşəcək".
Görünən odur ki, kilsə siyasi hakimiyyət iddiasını ortaya qoyur. Maraqlıdır, nə gözlənilir?
"Paşinyanın mitinqçilərin ona ünvanlamış istefa tələbləri konteksində daşqınlardan ziyan çəkən rayonlarına getməsi..."
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov hesab edir ki, Ermənistanda etiraz aksiyalarının genişlənməsində Erməni Apostol Kilsəsinin rolu şəksizdir: "Erməni müxalifətinin Paşinyanla müqayisədə elektoral bazası kiçikdir. Bunu müxalifət və iqtidar arasında parlamentdəki qüvvələr nisbəti də təsdiq edir. Müxalifətin etriraz aksiyalarına daha böyük miqdarda adam cəlb etmək istəyi onu erməni kilsəsi ilə işbirliyinə getməyə sövq edib. Erməni Kilsəsinin Paşinyan iqtidarına qarşı çıxması isə, Paşinyanın əsrlərdən bəri kilsənin əlində kəsərli ideoloji silah olan Böyuk Ermənistan ideyasından imtina etməsi ilə bağlıdır. Yəni Ermənistan dövlətçiliyinin problemlərinə real Ermənistan konsepsiyasının maraqlarından yanaşması ilə əlaqədardır. Kilsə iqtidarın ona qarşı tətbiq edə biləcəyi hüquqi iradələrdan kənarda qalmaq üçün siyasi hakimiyyət uğrunda deyil, dəyərlər uğrunda mübarizə apardığını bəyan edir. Halbuki, Qalstyanın müvəqqəti hökumətin təşkili və özünün bu hökumətə başçılıq edə biləcəyi ilə bağlı iddiası kilsənin siyasi hakimiyyət uğrunda mübarizəyə qatıldığının göstəricisidir. Paşinyan Qalstyanın simasında erməni xalqının əzabkeş qəhrəmanı obrazının yaradılmasına yol verməmək üçün kilsə ilə münasibətləri hüquqi müstəvi üzərində davam etdirməyə çalışır. Parlamentin spikeri Alen Simonyanın çağırışı ilə kilsəyə qarşı bəlli tədbirlərin keçirilməsi, əslində hökumət tərəfindən iqtisadi təzyiq vasitələrinin tətbiqi anlamında qəbul oluna bilər. Ermənistanda dövlət kilsənin nəzarətində olan torpaqların bir hissəsinin müsadirə olunması, onların vergilərə cəlb olunması üçün tədbirlərə əl atib. Lakin bu xəbərdarlıq belə, Qalstanyanı geri çəkilməyə məcbur edə bilməyib. Digər tərəfdən, Qalstanyan din xadimi olduğundan, hökumətdə təmsıl belə oluna bilməz. Hərcənd o, Erməni Apostol Kilsəsinin baş yepiskopuna müraciət edərək, onun 30 illik dini xidmətdən azad olunmasını xahiş edib. Lakin onun baş nazir vəzifəsinə gətirilməsinə mane olan Ermənistanın konstitusiyasıdır. Qalstanyan Kanada vətəndaşıdır. O, bu ölkənin vətəndaşlığından imtina etsə belə, azı 4 il gözləməlidir. Bütün bunların konteksində Qalstanyanın baş nazir kürsüsünə gətirilməsi qanunvericiliyin tələbləri baxımından mümkün deyil. Paşinyanın mitinqçilərin ona ünvanlamış istefa tələbləri konteksində Ermənistanın daşqınlardan ziyan çəkən rayonlarına getməsi hökumətin vəziyyətə nəzarət etməsindən xəbər verir".
Vidadi ORDAHLLI
