Daşdəmir Əliyev: "Ukrayna Rusiya dərinliklərinə daha intensiv hücumlar edərsə, müharibə daha ciddi fazaya qədəm qoyacaq"
Rusiya Xarici İşlər Nazirliyinin rəsmi nümayəndəsi Mariya Zaxarova növbəti dəfə ABŞ tərəfini ələ salıb, rişxənd obyektinə çevirib. Rusiya XİN sözçüsü ABŞ-a Ukraynanın Moskvadakı Amerika səfirliyinə hücuma icazə verməsini təklif edib.
Diplomat öz Telegram kanalında Ukrayna Silahlı Qüvvələrinə ABŞ silahları ilə Rusiya ərazisinə zərbələr endirmək çağırışına münasibətini dərc edib.
Zaxarova qeyd edib ki, Maykl Makkol ABŞ Konqresində keçirilən dinləmələrdə Ukraynanın Amerika silahları ilə Rusiya ərazisinin dərinliklərinə zərbə endirməsinə icazə verməyə çağırıb: "Mən Maykl Makkal üçün ilk növbədə üzərində işləmək lazım olan "Rusiya dərinliyinin" ünvanını dərc edirəm: Moskva, pl. Donetsk Xalq Respublikası, 1, s. 1-9 (ABŞ səfirliyi)"
O, həmçinin əlavə edib ki, Makkal Rusiya Xarici İşlər Nazirliyinin Dövlət Protokolu Departamentindən Rusiyadakı amerikalı diplomatların avtoparkı barədə də təfərrüatları ala bilər.
Bunun ardınca Rusiya xarici işlər naziri Sergey Lavrov bildirib ki,
Ukrayna ABŞ silahları ilə Rusiya ərazisini vurur.
O qeyd edib ki, Amerika silahları artıq Rusiya ərazisində – Ukraynadakı münaqişə zonasından kənarda müxtəlif hədəflərdə istifadə olunur:
"ABŞ və digər Qərb ölkələri tərəfindən Kiyevə verilən silahlar artıq Rusiya ərazisindəki mülki hədəflərə zərbələr endirir".
ABŞ Ukraynaya Qərb silahlarından Rusiyaya qarşı istifadəyə icazə versə nə baş verəcək?
Lavrov açıq etiraf edir ki, Ukrayna onları Qərb silahları ilə vurur. Yəni Lavrov hesab edir ki, artıq Ukrayna Qərb silahlarından istifadə edir.
Hərbi-siyasi şərhçi, ehtiyatda olan polkovnik-leytenat Daşdəmir Əliyev "Bakı-Xəbər"ə açıqlamasında bildirdi ki, hazırda Ukrayna cəbhəsində yeni situasiya yaranıb: "Rusiya durmadan irəliləyir. ABŞ və Qərb məğlubiyyətini qaçılmaz hesab etdiyi Ukraynanı Rusiya qarşısında qorumaq barədə artıq düşünmür. Əksinə, Ukraynanın sadəcə Qərb ərazilərini yeni sərhədlər çərçivəsində dövlət olaraq saxlamağın yollarını axtarır. İndi Qərbin qarşısında Ukrayna və Rusiyanı bu varianta razılaşdırmaq üçün müəyyən manevrlər edilməkdədir. Bu səbəbdən də açıq bəyanatlar səsləndirirlər. Rusiya da bilir ki, Ukraynaya silahı ABŞ və Qərb verib. Ancaq bu açıq etiraf olunmurdu. Bəs birdən-birə nə oldu ki, silah verənlər bunu etiraf etdilər? Təbii ki, Ukraynanı özlərindən daha asılı vəziyyətə salmaq, Kiyevə görə Rusiyanın onları açıq hədəfə aldığını göstərmək istəyirlər.
Bunu Zelenski gözəl anlayır. Ona görə də bəyanat verib ki, Ukrayna Silahlı Qüvvələri Qərb silahları ilə Rusiya ərazisinə zərbə endirməyib.
Onda sual olunur: bəs hansı silahlardan istifadə ediblər?
Kreml Qərbdən sülh danışıqları ilə bağlı verilən mesajlara reaksiyasında bu önəmli məqama eyham vurur. Rusiyanın sülh danışıqlarının kiminlə aparılacağını anlamadığı vurğulanır. Yəni Ukraynada növbəti prezident seçkiləri savaş ucbatından keçirilmədiyi üçün Kreml Zelenski hakimiyyətinin legitimliyini şübhə altına alır. Bu o deməkdir ki, sülh danışıqları başlasa belə, Rusiyanın Qərb qarşısında şərtləri ağır olacaq.
Almaniyanın federal kansleri Olaf Şolts Ukrayna Silahlı Qüvvələrinin Rusiya ərazisinə hücum etmək üçün Qərb silahlarından istifadə etməsi ideyasına qarşı çıxıb.
Şolts bildirib ki, o, Ukraynadakı münaqişədə Qərb silahlarının tətbiqi sahəsini genişləndirmək üçün hələ heç bir səbəb görmür. Kansler xatırladıb ki, alman silahlarının tədarükü ilə bağlı dəqiq qaydalar var, Ukrayna ilə razılaşdırılıb və işləyir. Göründüyü kimi, bu məsələdə Qərb ölkələri arasında da fikir ayrılığı var. Alman kanslerinin açıqlamasından belə qənaətə gəlirik ki, silah vermək olar, ancaq "ağını çıxarmaq" olmaz. Ukrayna Rusiya dərinliklərinə daha intensiv hücumlar edərsə, müharibə daha ciddi fazaya qədəm qoyacaq".
Məhəmmədələi QƏRİBLİ
