Elşad Həsənov: "Hazırkı çətin dövrdə hər bir dövlətin öz təhlükəsizliyini qoruması çox vacib məsələlərdən biridir"
Mayın 24-də Bişkekdə MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 54-cü iclası öz işinə başlayıb. Bu barədə Qırğızıstan KİV məlumat yayıb.
Qeyd olunub ki, Qırğızıstan prezidenti Sadır Japarov iclas iştirakçıları ilə görüşüb.
Rusiya Federal Təhlükəsizlik Xidmətinin mətbuat xidmətinin yaydığı məlumata görə, tədbir çərçivəsində MDB ölkələrində vəziyyətin destabilizasiyası və konstitusiya quruluşunun zorakı yolla dəyişdirilməsi üzrə xaricdə döyüş hazırlığı və təcrübə keçmiş şəxslərin aşkarlanması və qarşısının alınması üzrə birgə tədbirlər müəyyən ediləcək.
"Tədbir iştirakçıları terrorizm və dini ekstremizmlə mübarizə sahəsində, o cümlədən terrorizmlə mübarizə üzrə beynəlxalq məlumat bankı çərçivəsində məlumat mübadiləsinin təkmilləşdirilməsi yollarını müəyyənləşdirəcək. Birliyin Antiterror Mərkəzi tərəfindən MDB-nin terrorizmlə və ekstremizmin digər təzahürləri ilə mübarizə üzrə 2023-2025-ci illər üçün əməkdaşlıq proqramının 2023-cü ildə icrasının yekunlarına dair hesabat Şura üzvlərinə təqdim olunacaq", - Rusiya Federal Təhlükəsizlik Xidmətinin məlumatında deyilir.
MDB ölkələrində xaricdə zorla hakimiyyəti dəyişmək təlimi keçmiş şəxslərlə mübarizənin yeni mərhələsi başlayır və bu mübarizə Azərbaycanı da əhatə edir.
"Azərbaycana qarşı pozucu qüvvələrin planlarının həyata keçməsi mümkün deyil"
Təhlükəsizlik üzrə ekspert Elşad Həsənov baki-xeber.com-a "Hazırkı çətin dövrdə hər bir dövlətin öz təhlükəsizliyini qoruması çox vacib məsələlərdən biridir. Çünki xarici təhdidlər çoxdur. Mən Azərbaycanla bağlı bunları demək istəyirəm ki, xarici dövlətlərin Azərbaycanla bağlı maraqları çox böyükdür. Ona görə də son illərdə bizim təhlükəsizlik orqanlarının apardığı çox böyük işləri alqışlayıram. Mayın 24-də Bişkekdə MDB-yə üzv dövlətlərin təhlükəsizlik və xüsusi xidmət orqanları rəhbərləri Şurasının 54-cü iclası keçirilib. Bildirim ki, Moskvada MDB üzrə antiterror mərkəzi yaradılıb, biz də həmin o mərkəzin üzvüyük və bizim də orada nümayəndəmiz var. Yəni kəşfiyyat və əks-kəşfiyyat məlumatları əldə olunan zaman bizə aid olan məsələləri biz qəbul edirik və ona qarşı tədbirlər görürük. Eyni zamanda bizim əlimizə də, tutalım, Rusiya, Orta Asiya ölkələri və başqa dövlətlərlə bağlı çox məxfi məlumatlar keçir, həmin məlumatı da biz gizli, şifrələnmiş xətlərlə üzv ölkələrə ötürürük. Yəni bu qəbul olunmuş qaydadır. Orada Bortnikovun çıxışında bildirilir ki, Krokus Sitidə törədilən terror aktı "Xorasan camaatı"nın işidir, ancaq burda Ukrayna xüsusi xidmət orqanlarının da rolu olub. Yadımıza salaq, bizim vətəndaşlarımız arasında da xeyli sayda insan müxtəlif yollarla, xüsusilə dini ekstremizm xətti ilə ölkədən kənara çıxarılır, əsasən İran ərazisinə aparılır, ordan da Suriyaya "islam dini yolunda" cihada aparırlar. Onların beyinlərini o qədər yuyurlar ki, bu insanlar bu yolda özlərini qurban verməyə də hazır olurlar. Yəni Azərbaycandan da onlarla, yüzlərlə adam xaricə çıxarılıb və onlar orda döyüş hazırlığı keçirlər, onları da sonra gizli yollarla Azərbaycana qaytarırlar ki, gələcəkdə ölkəmizdə dini xurafat yaysınlar, "islam ölkəsi" yaratsınlar. Yəni o ölkələrin özlərinin maraqlarına uyğun işlər görsünlər, ölkə daxilində çaxnaşmalar salsınlar, partlayışlar, terror-təxribat hadisələri törətsinlər.
Məhz bayaq dediyim kimi, təhlükəsizlik orqanlarının sayıqlığı nəticəsində ölkəmizdə bu işlərin qarşısı çox operativ və lazımi qaydada alınır, bu haqda da Dövlət Təhlükəsizlik Xidməti tərəfindən vaxtaşırı olaraq geniş ictimaiyyətə məlumatlar verilir. Onlar dəstə-dəstə tutulublar, süçlarını etiraf ediblər, bunlar da televiziayada göstərilib. Təhlükəsizlik orqanları bunların qarşısını vaxtında almasa onlar ölkə daxilində müxtəlif təxribatlar, terror hadisələri törədə bilərlər"-deyə bildirdi.
E.Həsənovun sözlərinə görə, millət vəkili Fazil Mustafaya qarşı törədilən terror da elə bunun bir nəticəsidir, tərkib hissəsidir. "Çünki həmin pozucu qüvvələrin, xaricdə təlim keçmiş şəxslərin Azərbaycan daxilində də əlaqələri var və onlardan istifadə edirlər. Yenə də deyirəm, həm beyinlərin yuyulması vasitəsilə, həm də pul müqabilində onlardan istifadə etməyə çalışırlar. Bu doğrudan da Azərbaycanda da var. Azərbaycan da bunun qarşısını alır"-deyə bildirən E.Həsənovun bildirdiyinə görə, təhlükəsizlik orqanlarının əməkdaşları öz işlərini operativ şəkildə və layiqincə həyata keçirir, eyni zamanda bütövlükdə xalqımız özü də bunun necə təhlükəli olduğunu dərk etməli, başa düşməlidir ki, onun gələcəyi necə olmalıdır. "Dünya, demək olar ki, qarışıb, hər yerdə müharibə, təxribatlar, yanğınlar, partlayışlar törədilir. Siz Cənubi Qafqaz ölkələrinə baxın, İrəvanda iğtişaşlar, mitinqlər gedir, Gürcüstanda neçə vaxtdır mitinqlər, narazılıqlar, iğtişaşlar baş verir. Cənubi Qafqazda bir dənə sabit ölkə varsa o da Azərbaycandır və bu da bizi çox sevindirir. Azərbaycan dövlətinin rəhbərliyinin apardığı düzgün siyasətin və hüquq-mühafizə orqanlarının, xüsusilə də təhlükəsizlik orqanlarının gecə-gündüz apardıqları məqsədyönlü işin nəticəsində bu sabitlik yaranıb. Bu sabitliyi də xalq olaraq hər birimiz qorumalıyıq, sabitliyin təmin olunması üçün, lazım gələrsə, bildiyimiz hər hansı bir məlumatı aidiyyəti dövlət orqanlarına çatdırmalıyıq ki, bu hadisələr baş verməsin. Yəni bu mənada xalqımız həmişə ayıq-sayıqdır. Ona görə də hesab edirəm ki, Azərbaycana qarşı planlaşdırılan həmin aksiyalar heç bir nəticə verməyəcək. Çünki bizim güclü dövlətimiz, güclü liderimiz var və güclü təhlükəsizlik orqanlarımız hüquq-mühafizə orqanları ilə əlbir olaraq iş aparırlar, belə şeylərin də qarşısı alınır. Ona görə də Azərbaycana qarşı pozucu qüvvələrin planlarının həyata keçməsi mümkün deyil"-deyə E.Həsənov bildirdi.
İradə SARIYEVA
