Bəzi Qərb ölkələrinin digər dövlətlərin daxili işlərinə müdaxilə cəhdi getdikcə daha təhlükəli xarakter alır. Hətta bəzi dövlətlər bu fonda terror və sui-qəsdlə də hədələnir. Hər halda, Gürcüstanın baş naziri İrakli Kobaxidzenin dedikləri bunun əyani təsdiqidir.
O, Avropa İttifaqının təhdid və hədələrinə məruz qalıb. Buna səbəb gürcü hakimiyyətinin "Xarici təsirin şəffaflığı haqqında" qanunun qəbulunda israrlı olmasıdır.
Son günlərə qədər Qərb ən müxtəlif formada bu qanunun qəbuluna əngəl olmağa çalışıb. Lakin nəticə hasil olmadığından artıq şantaja və hədələrə al atılır. Bununla bağlı İrakli Kobaxidze qeyd edir ki, "Xarici agentlər haqqında" qanunla bağlı müzakirələr zamanı Avropa komissarlarından biri onu Slovakiyanın baş naziri Robert Fitsonun həyatına son sui-qəsd nümunəsi ilə qorxudub: "Hətta Qərbdən uzun müddətdir davam edən şantaj fonunda Avropa komissarlarından biri ilə telefon danışığında mənə qarşı hədə heyrətləndirici idi. Avropa komissarı mənimlə söhbətində bu qanuna veto aradan qaldırılarsa, Qərb tərəfdaşlarının görə biləcəyi bir sıra tədbirləri sadalayıb və daha sonra qeyd edib: "Fitso ilə hansı hadisənin baş verdiyini gördünüz, çox diqqətli olmalısınız". Kobaxidze deyib ki, Slovakiyanın baş naziri Robert Fitsoya sui-qəsd cəhdi ilə bağlı ölkələrdən birinin xüsusi xidmət orqanlarının izi aşkarlanıb və bu dövlət qlobal müharibə tərəfdarları ilə xüsusilə sıx bağlıdır. Xatırladaq ki, Fitsoya bir həftə bundan əvvəl silahlı sui-qəsd edilib və ona beş dəfə atəş açılıb. Öz növbəsində Gürcüstan müxalifəti "Gürcü arzusu" hökumətini Moskvaya işləməkdə ittiham edir. Avropa Komissiyasının təmsilçisi Kobaxidzenin iddiasına cavab olaraq "Politico" portalına bunun "həqiqət olmadığını", rəsmi cavabın tezliklə veriləcəyini bildirib. Sözçü bunu da deyib ki, Kobaxidze iddiasını əsaslandırmaq üçün heç bir sübut təqdim etməyib. Gürcüstanın ən böyük müxalifət partiyası – Birləşmiş Milli Hərəkatın lideri Tina Bokuçava baş naziri "addımbaşı şübhəli qəsd nəzəriyyələri səsləndirməkdə" ittiham edib: "Son həftələrdə Gürcüstanda keçirilən etirazlar göstərdi ki, gürcü cəmiyyəti öz gələcəyini Avropada görür. Bu uydurma iddialar çətin ki, nəyisə dəyişsin".
Qeyd edək ki, Avropa İttifaqının bir neçə ölkəsi – Estoniya, Çexiya, Niderland və İsveç Gürcüstan iqtidarı "Xarici agentlər haqqında" qanunu qəbul edəcəyi təqdirdə Tiflisə sanksiyalar qoyulmasına çağırıb. Avropadakı diplomatik mənbələr bildirir ki, söhbət həm də Gürcüstanla Avropa İttifaqı arasında vizasız gediş-gəliş rejiminin dayandırılmasından gedir. Gürcüstanda qalmaqallı qanun layihəsinə qarşı etirazlar artıq bir aydan çoxdur davam edir. Müxalifət və vətəndaş cəmiyyəti fəalları bildirirlər ki, sözügedən qanun Rusiyanın "xarici agent" qanununun analoqudur. Qanun layihəsini parlamentə təqdim etmiş hakim "Gürcü arzusu" partiyası isə israr edir ki, bu qanun ifadə azadlığı da daxil azadlıqlara qarşı nəzərdə tutulmayıb və onun qəbulundan məqsəd sadəcə olaraq, xarici maliyyələşdirmənin şəffaflığının təmin olunmasıdır. İqtidar qanunun qəbul edilməsində israrlı görünür. Qanun üçüncü və sonuncu oxunuşda qəbul edilsə də, Gürcüstan prezidenti Salome Zurabişvili ona veto qoyub. Lakin "Gürcü arzusu" partiyası parlamentdə mütləq çoxluğa malikdir və prezidentin vetosu asanlıqla ləğv oluna bilər. Bunun üçün səsvermənin artıq gələn həftə keçiriləcəyi gözlənilir. Avropa İttifaqı liderlərinin bu məsələyə gələn həftə baxacaqları istisna olunmur. Gürcüstana qarşı mümkün sanksiyalar məsələsi təkcə Aİ-də müzakirə olunmur. Bundan əvvəl bir sıra ABŞ siyasətçiləri bir neçə dəfə Gürcüstan hökumətinə xəbərdarlıq ediblər. Onlar deyiblər ki, Gürcüstana qarşı bir sıra məhdudlaşdırıcı tədbirlər, o cümlədən maliyyə aktivlərinin dondurulması, sözügedən qanunla bağlı olan məmurlara və onların ailə üzvlərinə viza qadağanının qoyulması kimi məhdudiyyətlər tətbiq oluna bilər. "Politico" nəşri də yazır ki, amerikalı senatorlar xarici agentlər haqqında qanuna görə Gürcüstan rəhbərliyinə qarşı sanksiyaların tətbiqi, eləcə də demokratiyanın dəstəklənməsi və "zərərli kənar müdaxilələrə" qarşı mübarizə məqsədilə Gürcüstanda fəaliyyət göstərən QHT-lərə daha 50 milyon dollar ayrılması haqqında qanun layihəsi hazırlayıblar. Məhdudiyyətlər haqqında qanun layihəsi demokrat Cin Şahin və Respublikaçı Cim Riş tərəfindən hazırlanır. Sanksiyaların "Gürcüstanın Avro-Atlantik inteqrasiyasına mane olması", "korrupsiya, insan hüquqlarının pozulması və xarici agentlər haqqında qanunun qəbuluna cəhd və ya onun qəbuluna kömək edən tədbirlərə" görə tətbiq edilməsi təklif edilir. Məhdudiyyətlərə Gürcüstan rəhbərliyinin nümayəndələrinin Birləşmiş Ştatlara girişinə qadağa, insan hüquqları və təhlükəsizlik məsələlərinin müzakirə olunduğu ABŞ-Gürcüstan strateji dialoqunun dayandırılması da daxildir. ABŞ dövlət katibi Entoni Blinken də bildirib ki, ölkəsi və Avropa İttifaqı Gürcüstana qarşı xarici agentlər haqqında qanun layihəsinə görə tədbir görməyi planlaşdırır. O, Nümayəndələr Palatasının Xarici Əlaqələr Komitəsinin iclasında Gürcüstanda baxılan qanun layihəsini şərh edərkən deyib: "Biz buna cavab olaraq nə edə biləcəyimizi çox diqqətlə nəzərdən keçiririk".
Nahid SALAYEV
