Əli Mustafa: "Bu o deməkdir ki, tarixi Ermənistan bir mifdir"
"Tarixi və real Ermənistan arasında sərhədlərin müəyyənləşdirilməsi şəxsən mənim üçün çox ağrılı mövzudur". Bu sözləri parlamentdə "hökumət saatı"nda Ermənistanın Baş naziri Nikol Paşinyan deyib.
Nikol daha sonra bunları qeyd edib: "Getdiyimiz yol bizi konkret sərhədləri olan konkret dövlətə aparır. Bu məğlubiyyət deyil, şüurumuzun hisslərimiz üzərində böyük qələbəsidir. İndi Ermənistanda özəyini dövlət, suverenlik və müstəqillik təşkil edən dövlət ideologiyası formalaşır. Bu, Ermənistan vətəndaşları üçün tarixi nailiyyətdir. Kirantsda çəkilən yol sadəcə yol deyil, tarixi Ermənistandan real Ermənistana gedən yoldur. İki aya hazır olacaq".
Belə görünür ki, Paşinyan ictimai rəyi reallıqlarla hesablaşmağa və bunu qəbul etməyə çağırır. Bu, həm də o anlama gəlir ki, Ermənistan bu reallıqları qəbul etməsə nəticələri bu ölkə üçün daha ağır olacaq.
"Ermənilərdən maşa kimi istifadə edilib və buna da nail olmaq üçün onlara daha böyük vədlər veriblər"
Sözügedən məsələni "Bakı-Xəbər"ə şərh edən Demokratik Dəyişim Partiyası Təşkilat Komitəsinin sədri Əli Mustafanın fikrincə, Paşinyan ilk Ermənistan dövlət başçısıdır ki, artıq çox şeyi gerçək anlamağa başlayıb: "Yəni real politik mənasında. Dünyada nə baş verdiyini dərk edir. İndiyə qədərki Ermənistanın nə olduğunu anlayır. O cümlədən, bu dövlətin Rusiya uzantısı, proksisi olduğunu bilir. O üzdən, bütün bunları sankı cəmiyyətə demək istəyir. Əslində Paşinyanın dediklərində maraqlı həqiqətlər ortaya çıxır. Nikol erməni cəmiyyətinə demək istəyir ki, tarixi Ermənistanı bizə sırıyıblar. Yalançı, böyük Ermənistan xülyası ilə onları qonşuları ilə düşmən ediblər. Erməniləri başqa bir millətin coğrafiyasına yığıblar və həmin millətlə bizi qarşı-qarşıya qoyublar. O cümlədən, ermənilərdən maşa kimi istifadə edilib və buna da nail olmaq üçün onlara daha böyük vədlər veriblər. Əslində bu gün real Ermənistanın belə sərhədlərində o qədər kəndlər, evlər var ki, orada heç erməni yaşamır. Vaxtilə Ermənistanda azərbaycanlıların yaşadığı kəndlər hələ də boşdur. Yəni hazırkı Ermənistanın ərazisini doldurmağa erməni çatmır. Ona görə də böyük Ermənistan xülyası ilə yaşamaq sadəcə xəstə təfəkkürün təsiri altına düşmək deməkdir. Ancaq digər tərəfdən vacib olan odur ki, Paşinyan ibrətamiz bir ifadə işlədir. O qeyd edir ki, Kirantsda çəkilən yol sadəcə yol deyil, tarixi Ermənistandan real Ermənistana gedən yoldur. Bu o deməkdir ki, tarixi Ermənistan bir mifdir. Qondarma "soyqırım" uydurub erməni-türk düşmənçiliyini yemləyiblər. Daha sonra ermənilərdən bizə və Türkiyəyə qarşı istifadə ediblər. Əslində Ermənistandan regiona təsir etmək üçün forpost kimi istifadə ediblər. İndi Paşinyan Ermənistanı forpost ölkə statusundan çıxarmaq istəyir. Bununla demək istəyir ki, ilk dəfədir şansımız olduğu üçün normal müstəqil dövlət quraq. İmperiya uzantısı deyil, müstəqil dövlət qursunlar. Anlayır ki, bu da Azərbaycan-Ermənistan sərhədinin qurulmasından keçir. Çünki bilir ki, Ermənistan tarixi Azərbaycan ərazilərində qurulub. Ona görə də reallıqdan çıxış edərək cəmiyyəti buna hazırlamağa çalışır".
Vidadi ORDAHALLI
