Firdovsi Şahbazov: "Bütün bunların fonunda Azərbaycan üzərindən daşımalar artmaqdadır"
Prezident İlham Əliyev Tacikistan Prezidenti Emoməli Rəhmon ilə mətbuata bəyanatında bəyan edib ki, Azərbaycan bütün logistika layihələrini başa çatdırıb:
"Biz Orta Dəhlizi və onun bir hissəsi olan Transxəzər Nəqliyyat Dəhlizini Tacikistandan yükgöndərənlər üçün daha cəlbedici etmək məqsədilə logistika əlaqələrinə dair məsələləri ətraflı nəzərdən keçirdik. Mən həmkarıma məlumat verdim ki, Azərbaycan öz ərazisində bütün iri nəqliyyat və logistika layihələrini praktiki olaraq başa çatdırıb və bu gün müxtəlif istiqamətlərdə - Şərqdən Qərbə və əks istiqamətdə, Şimaldan Cənuba və əks istiqamətdə böyük həcmdə yükləri qəbul etməyə hazırdır".
Prezident Əliyev onu da qeyd edib ki, Transxəzər getdikcə daha çox əhəmiyyət kəsb edir: "Transxəzər nəqliyyat dəhlizi Avropa regionu və Mərkəzi Asiya regionu üçün getdikcə daha çox əhəmiyyət kəsb edir. Azərbaycan isə Avropa ilə Asiyanın qovuşuğunda yerləşən birləşdirici ölkə kimi özünün nəqliyyat infrastrukturu ilə, əlbəttə ki, bu məsələdə mühüm rol oynayır".
"Əldə olunan razılaşmalar hər iki ölkənin ticarət dövriyyəsinin əhəmiyyətli dərəcədə artırılmasına imkan verir"
Sözügedən məsələ ilə bağlı fikirlərini "Bakı-Xəbər"lə bölüşən iqtisad üzrə fəlsəfə doktoru Firdovsi Şahbazovun fikrincə, Azərbaycan bu yöndə üzərinə düşən işləri daha sürətlə yerinə yetirdi: "Belə ki, Bakı Beynəlxalq Dəniz Ticarət Limanının yükqəbuletmə qabiliyyəti 2018-ci ildə 15 milyon tona çatdırıldı. Hazırda bunun 25 milyon tona çatdırılması istiqamətində işlər gedir. Həmçinin Xəzər dənizi ilə yükdaşımaların sürətləndirilməsi və yüklərin həcminin artırılması məqsədilə gəmilər mütəmadi təmir edilir, donanma yeni gəmilərlə təchiz olunur. Məhz bütün bunların nəticəsidir ki, 2023-cü ildə dəniz nəqliyyatı ilə 1 milyard 800 milyon dollar dəyərində 2 milyon 500 min ton yük daşınıb. Bu isə 2022-ci ilin müvafiq dövrü ilə müqayisədə müvafiq olaraq 38,5 faiz və 2,5 dəfə çoxdur. Həmçinin Azərbaycan kapitalı hesabına Bakı-Tbilisi-Qars dəmir yolunun modernləşdirilməsi başa çatıb. Bununla yanaşı, ölkədaxili dəmir yolları da modernləşdirilib. Nəticədə BTQ-nin yükötürmə qabiliyyəti 1 milyon tondan, 5 milyon tona çatdırılıb. Horadiz-Ağbənd dəmir yolu isə gələn il hazır olacaq. Bütün bunların fonunda, Azərbaycan üzərindən daşımalar artmaqdadır. Çin və Orta Asiya ölkələri Azərbaycan üzərindən yüklərin daşınmasına önəm verir. Ona görə ki, məsafə baxımından bu yol daha qısadır. Tacikistan Prezidenti Emoməli Rəhmonun Bakı səfəri göstərdi ki, bu yöndə əlaqələr sürətlə inkişaf edəcək. Bakıda keçirilən Azərbaycan-Tacikistan biznes-forumu iqtisadi-ticari əlaqələrin inkişaf potensialının yüksək olduğunu göstərdi. İki ölkə arasında imzalanan müqavilələrinin və sazişlərin ümumi məbləği bütövlükdə 700 milyon dollardır. Əldə olunan razılaşmalar hər iki ölkənin ticarət dövriyyəsinin əhəmiyyətli dərəcədə artırılmasına imkan verir. Bu ilin ilk dörd ayında iki ölkə arasındakı ticarət dövriyyəsi 78 faiz artıb. Tacikistan Orta Dəhlizdən də fəal istifadə edir. Ölkə prezidentlərinin görüşündə Orta Dəhlizi və onun bir hissəsi olan Transxəzər Nəqliyyat Dəhlizini Tacikistandan yük göndərənlər üçün daha cəlbedici etmək məqsədilə logistika əlaqələrinə dair məsələlər ətraflı nəzərdən keçirilib. Bir sözlə, Tacikistanın prosesdə yaxından iştirak etməsi çox önəmli hadisədir".
Vidadi ORDAHALLI
