Turab Rzayev: "Baş nazirin bu yeni açıqlaması da Avropa ilə iplərin tamamilə qopduğunu göstərir"
Gürcüstanın Baş naziri İrakli Kobaxidze şok açıqlama verib. O bildirib ki, onunla söhbətində Avropa komissarlarından biri onu Slovakiyanın baş nazirinin həyatına qəsd nümunəsi ilə qorxudub.
Kobaxidze deyib ki, ölkəsində qəbul olunan "xarici təsir" qanununa görə verilən bu mesajı şəxsən özünə təhdid kimi qiymətləndirir:
"Əminəm ki, həmin qüvvələrin Gürcüstanla bağlı planı bu dəfə də iflasa uğrayacaq. Ölkəmiz mövcud sabitliyi qoruyub saxlaya biləcək və inkişafa doğru addımlamaqda davam edəcək".
Belə çıxır ki, demokratiyadan dəm vuran Avropa rəsmiləri onlara tabe olmayan dövlət başçıları ilə belə terror dilində danışır?
Siyasi şərhçi Turab Rzayev "Bakı-Xəbər"ə açıqlamasında bildirdi ki, biz burada Gürcüstan hökuməti ilə Avropa İttifaqı arasında yavaş-yavaş körpülərin yandırılması prosesinə şahid oluruq: "Təbii ki, biz şəxsi görüşdə nələrin baş verdiyini bilmirik. Burada hər iki tərəf öz mövqeyinə sığınacaq. Açıq şəkildə ad çəkilsə, Avropa rəsmiləri bunu qəbul etməyəcək. Gürcüstan hökuməti də birbaşa baş nazirin həyatının təhdid olunması ilə bağlı ittiham edəcək. Amma bu faktın baş verməsində əsl məsələ odur ki, əgər belə bir faktın mövcudluğu doğrudursa, Gürcüstanla Avropa İttifaqı arasındakı münasibətlər o səviyəyə gəlib çatıb ki, açıq şəkildə Gürcüstanın baş nazirinə hədə - qorxu gəlinir. Digər tərəfdən, Gürcüstanda əsas fiqur məhz baş nazir yox, hakim partiyanın yenidən rəhbərliyə qayıdan İvanişvilidir. Böyük ehtimal, bunu Avropada yaxşı başa düşürlər. Gürcüstan hakimiyyəti artıq açıq şəkildə Qərbi baş nazirin həyatına sui - qəsddə ittiham edirsə, onun ardınca da ictimaiyyətə bu barədə məlumat verirsə, bu o deməkdir ki, Gürcüstan hakimiyyəti qəti şəkildə öz yolunu seçib. Əslində bu bizim üçün yenilik deyil. Saakaşvili hakimiyyətinin sonuna yaxın Qərblə Rusiya arasında bir yaxınlaşma mövcud idi. Həmin dövrdə ABŞ düşünürdü ki, Gürcüstana daha mülayim bir siyasətçi gələrsə, bu, ABŞ - la Rusiya arasında problemləri həll edə bilər, Gürcüstanda daha mülayim bir keçid mərhələsi ola bilər. Bir kontent formalaşmışdı. İvanişvili və onun müttəfiqləri hər iki tərəf - həm Rusiya, həm də ABŞ arasında ortaq fiqur kimi nəzərdə tutulmuşdular. Amma zaman keçdikcə Gürcüstanda İvanişvili gücləndi. İlk öncə Xazaratseni zəiflətdi. Bilirsiz ki, Xazaratsenin limanları ABŞ şirkəti ilə işlətmə icazəsi vardı. Bu icazə ləğv edildi, birbaşa Rusiyaya verilməsi təhlükəli olduğu üçün, işlətməni Çinə verdilər. Çin də qlobal mübarizədə Rusiya tərəfindən çıxış edir. Yəni Gürcüstan addım - addım Rusiya və Çinə doğru getməyə başladı. Rusiya ilə sərhədlərin açılması, aviareyslərin bərpası və s. bütün bunlar artıq onu göstərir ki, Gürcüstan öz seçimini edib. Sonuncu baş nazir seçkisində yeni baş nazir açıq şəkildə Qərbi ittiham etdi və yollarının Rusiya - Çin yolu olduğunu bildirdi. İndi də biz bu istiqamətin davamını görürük. İvanişvili mitinqlərdə, efirlərdə birbaşa çıxış edir, Qərbi ittiham edir. Mən düşünürəm ki, bunlar Avropa İttfaqına, NATO kursuna, Atlantik məkana inteqrasiya kursuna ziddir. Siz əgər davamlı olaraq Avropa İttifaqını və ABŞ - ı ittiham edirsizsə, Çinə, Rusiyaya inteqrasiya yolu tutursuzsa, o istiqamətdə əlaqələri genişləndirəcəyinizi iddia edirsizsə, o zaman burda heç bir Avropa İttifaqı, NATO - ya inteqrasiyadan söhbət gedə bilməz. Əslində baş nazirin bu yeni açıqlaması da Avropa ilə iplərin tamamilə qopduğunu göstərir".
Məhəmmədəli QƏRİBLİ
