Sədrəddin Soltan: "...Erməni kilsəsi həm də Çar Rusiyasının casus şəbəkəsi rolunu oynayıb"
Erməni Qriqoryan kilsəsinin əməlləri ifşa olunduqca çox gizli məqamlar ortaya çıxır. Eçimiədzinin revanşizmi, terroru dəstəkləməsi, korrupsiya ilə məşğul olması faktlarının üzə çıxmasının ardınca yeni dəlillər diqqəti çəkməkdədir.
Son zamanlar Ermənistanda və erməni mediasında tez-tez erməni kilsəsinin "xarici nüfuz" agenti adlandırılmasının şahidi oluruq. Ermənistan hökuməti tərəfindən kilsə "xarici nüfuz" agenti elan edilib. Bir sözlə, erməni kilsəsinə Ermənistanda xarici casus kimi baxılır.
Erməni kilsəsi hansı xarici, beynəlxalq dairələrin casusu rolunda çıxış edə bilər? Tarixdə necə idi, indi necədi? İndi erməni kilsəsi kimin casusudur?
"Birmənalı şəkildə Rusiyanın casusudur"
Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan "Bakı-Xəbər"ə bildirdi ki, SSRİ dövründə bütün kilsələr Moskvanın, yəni Pravoslav kilsəsinin xətti ilə idarə olunub. S.Soltanın sözlərinə görə, istər erməni, istər gürcü katolikosu, istər Ukrayna pravoslavlığı, istərsə də digər respublikardakı kilsələr olsun, hətta Azərbaycandakı pravoslav kilsəsi belə, Rusiyanın Pravoslav kilsəsinin nəzarəti altında olub və birgə fəaliyyət göstəriblər. S.Soltanın qeyd etdiyinə görə, bu səbəbdən də Ukraynada müharibə başlayanda ilk işlərdən biri Ukrayna Pravoslav kilsəsini Rusiya Pravoslav kilsəsindən ayırıb İstanbul Pravoslav kilsəsi ilə əlaqələrinin qurulması idi. "Erməni kilsəsinə gəldikdə isə, erməni kilsəsi tarixən Çar Rusiyasına işləyib. Ermənilərin indiki İran ərazisindən, yəni İsfahandan və başqa bölgələrdən Qafqaza köçürülməsi də erməni kilsəsi ilə Çar Rusiyası arasında aparılmış uzun müddətli çoxsaylı danışıqların nəticəsidir. Bundan başqa, erməni kilsəsi həm də Çar Rusiyasının casus şəbəkəsi rolunu oynayıb. Daim Çar Rusiyasına indiki İrandakı və Cənubi Qafqazdakı vəziyyətlə bağlı casusluq edib. Hətta 1813-1828-ci il Azərbaycan vəliəhdi Abbas Mirzə ilə Çar Rusiyası arasında olan müharibə zamanı da kilsə vəliəhdi və onun qoşunu satqınlığını edib. Yəni bütövlükdə kilsə ermənilərin guya milli maraqları uğrunda mübarizə aparmaq, torpaq əldə etmək və sair məsələləri qarşısına məqsəd qoymaqla həm də himayədarının, yəni Çar Rusiyasının casusu və yerdə xidmətçisi, qulluqçusu rolunda olub"-deyə S.Soltan bildirdi.
S.Soltan bildirdi ki, Ermənistanda Barat Qalstanyan adlı keşiş ortalığa çıxanda, təbii, yenə kilsə üzərinə şübhələr getməyə başladı. "Çünki 2018-ci il məlum may hadisələrindən sonra Nikol Paşinyan hökuməti ilə kilsə arasında ziddiyyət yarandı və bu ziddiyyət bu gün "müxalifət", "torpaqlar" adı altında Paşinyana qarşı davam etməkdədir. Qalstanyan kimdir? Qalstanyan İsfahandan Gümrüyə köçmüş erməni ailəsində anadan olub. Yəni o, İsfandan gəlmə ermənidir. Ona görə də, Baqrat Qalstanyanın başlatdığı "müxalifət" hərəkatı adı altında davam edən yürüşlərdə Ermənistanda bütün məsələlərlə, bir sıra hallarda Azərbaycan-Ermənistan münasibətləri ilə bağlı Tehran hakimiyyətinin irəli sürdüyü iddialar, məqamlar da var. Ermənistan hakimiyyəti, bu ölkədəki demokratik ruhlu sayılan bir sıra informasiya vasitələri ona görə də kilsəni casus və sifarişçi sayırlar. Kimindir, haranındır? Rusiyanınmı? Birmənalı şəkildə Rusiyanın casusudır. Çünki kilsəsin, daha doğrusu, Baqratın müdafiə etdiyi və onu dəstəkləyənlər Serj Sarkisyan və Robert Köçəryandır. Sarkisyan və Köçəryan isə 30 ildən çoxdur ki, Rusiyanın Azərbaycanda, Ermənistanda və bütövlükdə Cənubi Qafqazda sifarişlərini həyata keçirən fiqurlarıdır. Bu da həmin o dəstədəndir. Deməli, Baqratın başlatdığı hərəkat Rusiyanın, yaxud Rusiyadakı müxtəlif qüvvələri, ya da bunların Rusiyaya yarınmaq istədiyi növbəti cəhd idi"-deyə S.Soltan vurğuladı.
İradə SARIYEVA
