Azərbaycan Respublikasına dövlət səfərinə gələn Tacikistan Respublikasının Prezidenti Emoməli Rəhmonun mayın 23-də rəsmi qarşılanma mərasimi olub.
Tacikistan Prezidenti Emoməli Rəhmonu Azərbaycan Prezidenti İlham Əliyev qarşılayıb.
Azərbaycan nümayəndə heyəti Tacikistan Prezidentinə, Tacikistan nümayəndə heyəti isə Azərbaycan Prezidentinə təqdim olunduqdan sonra prezidentlərin təkbətək, ardınca geniş tərkibdə görüşü olub.
Görüşdə çıxış edən Prezident İlham Əliyev bildirib ki, bizim hədəfimiz bütün istiqamətlər üzrə fəal qarşılıqlı fəaliyyətdir: "Bildiyiniz kimi, Sizin səfərinizdən əvvəl biznes-forum olub. Tacikistanın Azərbaycanda Mədəniyyət Günləri keçirilir. Bütün bunlar münasibətlərimizi konkret məzmunla zənginləşdirir".
Prezident deyib ki, imzalanan sənədlər Azərbaycan-Tacikistan münasibətlərinin müqavilə-hüquq bazasını xeyli möhkəmləndirir: "Bu gün iqtisadi əməkdaşlıq məsələlərini ətraflı müzakirə etdik. Strateji Tərəfdaşlıq Bəyannaməsi ilə yanaşı, daha 13 sənəd, ümumilikdə 14 sənəd imzalanıb ki, onlardan bəziləri burada, bəziləri isə əvvəllər imzalanıb".
Prezident İlham Əliyev onu da qeyd edib ki, Tacikistan Prezidentini noyabrda keçiriləcək iqlim konfransında iştiraka dəvət edib və dəvət qəbul olunub.
"Biz bu beynəlxalq tədbirin keçirilməsinə fəal hazırlaşırıq və Tacikistanın aktiv iştirakını gözləyirik", - deyən dövlət başçısı tacik dostlarımızın bu konfransın uğurla keçirilməsinə və yaxşı nəticələr əldə edilməsinə böyük töhfə verəcəklərinə əminliyini ifadə edib.
Transxəzər nəqliyyat dəhlizinin Avropa və Mərkəzi Asiya üçün əhəmiyyətinə toxunan dövlət başçısı bildirib ki, Tacikistan Prezidenti ilə müzakirə olunan mövzulardan biri də Tacikistanın və Azərbaycanın nəqliyyat-logistika infrastrukturunun yeni imkanlarının nəzərə alınması ilə nəqliyyat sektorunda əməkdaşlıqdır: "Hesab edirəm ki, bu istiqamətdə səylərimizi birləşdirmək, addımlarımızı daha sıx əlaqələndirmək faydalı olacaq".
Daha sonra Prezident İlham Əliyevin və Tacikistan Prezidenti Emoməli Rəhmonun iştirakı ilə Azərbaycan-Tacikistan sənədlərinin imzalanması mərasimi olub.
Prezident İlham Əliyev və Tacikistan Prezidenti Emoməli Rəhmon "Azərbaycan Respublikası ilə Tacikistan Respublikası arasında strateji tərəfdaşlıq haqqında Bəyannamə"ni imzalayıblar.
Digər dövlətlərarası sənədlər hər iki ölkənin müvafiq qurumlarının rəhbər şəxsləri tərəfindən imzalanıb.
Sonra Azərbaycan və Tacikistan prezidentləri mətbuata bəyanatlarla çıxış ediblər.
Öncə Prezident İlham Əliyev çıxış edərək bildirib ki, Tacikistan Prezidenti Emoməli Rəhmonu qəbul etmək bizim üçün böyük şərəfdir:
"Bu gün nümayəndə heyətləri üzvlərinin iştirakı ilə geniş tərkibdə, həmçinin təkbətək görüş əsnasında qarşılıqlı fəaliyyətimizlə bağlı məsələlərin geniş spektrini müzakirə etdik, sənaye kooperasiyası, humanitar sahədə əməkdaşlıq üzrə iqtisadi xarakterli bir çox layihənin reallaşdırılmasına dair hökumətimizin üzvlərinə konkret tapşırıqlar verdik"- deyən dövlət başçısı bildirib ki, ilin sonunda Emoməli Rəhmon yenidən ölkəmizə səfər edəcək.
"Mən Tacikistan Prezidentini noyabrda keçiriləcək iqlim konfransında iştiraka dəvət etdim. Bu dəvət qəbul olundu. Biz bu beynəlxalq tədbirin keçirilməsinə fəal hazırlaşırıq və Tacikistanın aktiv iştirakını gözləyirik. Əminəm ki, tacik dostlarımız bu konfransın uğurla keçirilməsinə və yaxşı nəticələr əldə edilməsinə böyük töhfə verəcəklər" – o deyib.
Qarşılıqlı fəaliyyətimizin əsasında tarix boyu əməkdaşlıq etmiş, dost olmuş, birlikdə qurub-yaratmış xalqlarımızın iradəsi dayandığını deyən Prezident bu gün dövlətlərarası münasibətlərin ən yüksək səviyyəyə çatdığını vurğulayıb.
Azərbaycan Prezidenti daha sonra bildirib ki, bu gün sənaye kooperasiyası ilə bağlı məsələlər də ətraflı müzakirə olunub. Eyni zamanda nəqliyyat sektoru da diqqət mərkəzində olub. "Biz Orta Dəhlizi və onun bir hissəsi olan Transxəzər Nəqliyyat Dəhlizini Tacikistandan yükgöndərənlər üçün daha cəlbedici etmək məqsədilə logistika əlaqələrinə dair məsələləri ətraflı nəzərdən keçirdik. Mən həmkarıma məlumat verdim ki, Azərbaycan öz ərazisində bütün iri nəqliyyat və logistika layihələrini praktiki olaraq başa çatdırıb və bu gün müxtəlif istiqamətlərdə - Şərqdən Qərbə və əks istiqamətdə, Şimaldan Cənuba və əks istiqamətdə böyük həcmdə yükləri qəbul etməyə hazırdır" – o deyib.
Dövlət başçısı bildirib ki, təhlükəsizlik tədbirlərinin gücləndirilməsi və bu sahədə əməkdaşlığın inkişafı, təhsil, mədəniyyət və kənd təsərrüfatı ilə bağlı məsələlər də ətraflı nəzərdən keçirilib.
Çıxışının sonunda Azərbaycan Prezidenti Tacikistan Prezidenti və onu müşayiət edən nümayəndə heyətinin səfərinin faydalı olacağına əminliyini bildirib.
Prezident Emoməli Rəhmon Azərbaycan Prezidentinə səmimi qəbula görə təşəkkür edərək bildirib ki, bugünkü görüşlərin nəticələri ölkələrimizin əməkdaşlığını yeni inkişaf səviyyəsinə yüksəldəcək.
"Bu prosesin başlanğıcını Azərbaycan xalqının Ümummilli Lideri, çox hörmətli Heydər Əlirza oğlu Əliyev qoyub. Əminəm ki, bu gün əldə ediləcək razılaşmalar qardaş xalqlarımızın dərin maraqlarına cavab verəcək və Tacikistan-Azərbaycan münasibətlərinin möhkəm təməlinə çevriləcək"- İ.Rəhmon bildirib.
