Aydın Hüseynov: "Bu, yaşıl həmrəyliyin ən yaxşı nümunəsi sayıla bilər"
Neft İxrac edən Ölkələr Təşkilatı (OPEC) Azərbaycana COP29-un keçirilməsində tam dəstək təklif edir. Bu barədə OPEC-in baş katibi Haysam Əl-Qays OPEC-in Vyanada yerləşən baş ofisində COP29 ərəfəsində keçirilən yüksək səviyyəli dialoqda deyib.
Onun sözlərinə görə, OPEC-Azərbaycan münasibətləri "qızıl era"sını yaşayır.
O qeyd edib ki, bu əlaqələrin möhkəmliyi Əməkdaşlıq Bəyannaməsi və Əməkdaşlıq Xartiyası çərçivəsində davam edən əməkdaşlıq sayəsində nəzərə çarpır. Baş katib, həmçinin, Azərbaycanın COP-a inklüziv yanaşmasını və bütün, o cümlədən neft sahəsi ilə bağlı rəyləri nəzərə almasını yüksək qiymətləndirib və bu konstruktiv yanaşmanın OPEC və ona üzv ölkələrin nöqteyi-nəzəri ilə uyğun gəldiyini qeyd edib: "Azərbaycan Respublikasının Prezidenti İlham Əliyevin neft sənayesinə dair hamı tərəfindən qəbul edilmiş yanaşmamımızı açıqlayaraq neft və qazı "Tanrıdan verilən böyük nemət" adlandırması bizi olduqca ruhlandırdı".
Yeri gəlmişkən, Prezident İlham Əliyev "Parçalanmış dünyanın bərpası" mövzusunda XI Qlobal Bakı Forumunun açılış mərasimindəki çıxışında demişdi ki, neft və qaz sərvətlərinə sahib olmağımız bizim günahımız deyil və biz buna görə tənqid edilməməliyik. Prezidentin fikrincə, bizi tənqid etməyə cəhd göstərənlər və bu qlobal tədbirə ev sahibliyi etmək şərəfinə bizi layiq görənlər anlamalıdırlar ki, bizim niyyətimiz iqlim məsələlərinə töhfə verməkdir. Artıq yaşıl keçidlə bağlı bütün gördüyümüz işlərin praktiki nəticələri var. O baxımdan OPEC Azərbaycana COP29-un keçirilməsində tam dəstək təklif etməklə, Prezident Əliyevin yanaşmasını dəstəklədi.
"OPEC-in COP29-a dəstək verməsi ölkəmizdə "yaşıl enerji"yə sərmayə cəlbedicliyini artıracaq"
Sözügedən məsələ ilə bağlı fikirlərini "Bakı-Xəbər"lə bölüşən millət vəkili Aydın Hüseynovun fikrincə, OPEC-in COP29-a dəstək verməsi ölkəmizdə "yaşıl enerji"yə sərmayə cəlbediciliyini artıracaq: "BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının – COP29-un 2024-cü ildə ölkəmizdə keçirilməsi ilə bağlı qəbul olunmuş qərar həm də bu gerçəyin etirafıdır. Azərbaycanın bir çox nüfuzlu beynəlxalq tədbirlərə ev sahibliyi etməsi ölkəmizin beynəlxalq aləmdə artan nüfuzunun göstəricisidir. Dünyanın ən böyük beynəlxalq konfransında 180-dən çox dövlətin nümayəndəsi iştirak edəcəyi üçün bu tədbir nəhəng yüksək səviyyəli tədbir hesab olun bilər. Eyni zamanda, bu etibarlı tərəfdaş mövqeyi ölkəmizin kifayət qədər siyasi nüfuzundan irəli gələrək hörmət əsasında formalaşır. Azərbaycanın ən böyük siyasi və iqtisadi platformalarda rəhbər orqanlarda təmsil olunması ölkəmizə olan rəğbətdən qaynaqlanır. Çərçivə Konvensiyasının Tərəflər Konfransının 29-cu sessiyası Azərbaycan üçün həm də siyasi baxımdan önəm daşıyır".
Millət vəkili qeyd etdi ki, hazırda dünyanın ən nüfuzlu təşkilatları, o cümlədən Dünya Bankı, OPEC, qeyri-OPEC, Avropa Bankı və digər qurumlar COP29-la bağlı Azərbaycana bütün dəstəyi verməyə hazır olduğunu bəyan etməkdədir: "Ötən gün Vyanada keçirilən görüşdə OPEC-in baş katibi Haysam Əl-Qays Azərbaycanın ətraf mühitin qorunması ilə bağlı təşəbbüslərini yüksək dəyərləndirməklə Azərbaycanla COP-29 çərçivəsində əməkdaşlıq edəcəklərini bildirib. Bu, bir daha Avropanın enerji təhlükəsizliyində əhəmiyyətli rol oynayan Azərbaycanın COP29-u da yüksək səviyyədə təşkil etmə bacarığına olan inamın ifadəsidir. OPEC-in COP29-a dəstək verməsi kartel ölkələri ilə Azərbaycan arasında faydalı münasibətlərin növbəti təzahürü sayıla bilər. Bu gün OPEC "Yaşıl iqtisadiyyat"a böyük önəm verir, sərmayələr cəlb edir. Xüsusilə ətraf mühitin mühafizəsi, ekologiya, "yaşıl enerji" sahələrində ixtisaslaşan qurumlarla sıx əməkdaşlıq edir. O cümlədən, iqlim dəyişmələrinə həsr edilmiş konfranslara dəstək verir. OPEC ölkələrindən Birləşmiş Ərəb Əmirliyi və Səudiyyə Ərəbistanı Azərbaycanda "yaşıl enerji" qurucluluğu istiqamətində davamlı proqrmalara start verib. Ötən il həmin ölkələrin şirkətləri ilə Günəş və külək enerjisinin istehsalına dair saziş imzalanıb. O baxımdan bu, yaşıl həmrəyliyin ən yaxşı nümiunəsi sayıla bilər".
Vidadi ORDAHALLI
