Ramil Məmmədli: "Buna nə Ermənistanın imici, nə də imkanları..."
Mayın 20-də Ermənistanın xarici işlər naziri Ararat Mirzoyan Vyanada "Gələcəyin formalaşdırılması" mövzusunda keçirilən Nüvə Təhlükəsizliyi üzrə Beynəlxalq Konfransda (ICONS 2024) iştirak edib.
Mirzoyan çıxışında silahlı münaqişələr zamanı dinc nüvə obyektlərinin toxunulmazlığına və təhlükəsizliyinə qeyd-şərtsiz hörmət edilməsinin zəruriliyi ilə bağlı məsələni qaldırıb:" Bu baxımdan Ermənistan dinc nüvə obyektlərinin təhlükəsizliyini təmin etmək üçün minimum olaraq baş direktor tərəfindən təqdim olunan "Yeddi əvəzedilməz sütun"un əhəmiyyətini xatırladır. Bunu nəzərə alaraq, Ermənistan MAQATE-nin baş direktoru və əməkdaşlarının fədakar və yorulmaz səylərini bir daha yüksək qiymətləndirir. Məqsədimiz sülh məqsədləri üçün nəzərdə tutulmuş nüvə obyektlərinə silahlı hücumları və hücum təhdidlərini qadağan edən beynəlxalq hüquqi qüvvəyə malik müqavilənin hazırlanması prosesinin intensivləşdirilməsi zərurətinin beynəlxalq anlaşmasına və tanınmasına nail olmaqdır.Yekun olaraq, bütün dünyada nüvə təhlükəsizliyinin möhkəmləndirilməsi, nüvə silahının yayılmaması və nüvə enerjisindən dinc məqsədlərlə istifadə kimi ümumi məqsədlərə sarsılmaz sadiqliyimizi bir daha təsdiq etmək istərdim. Qoy bu konfrans bizi daha təhlükəsiz və daha möhkəm gələcəyə doğru hərəkət etdirərək yenilənmiş əməkdaşlıq və innovasiyalar üçün katalizator rolunu oynasın".
Əslində Mirzoyanın bu məsələni qaldırmaqda məqsədi başqadır. O, gözəl bilir ki, Azərbaycan heç vaxt onun ərazisindəki atom elektrik stansiyasını hədəf almayacaq. Ancaq belə rəy yaratmaq istəyir ki, güya Azərbaycan nə vaxtsa bu addımı ata bilər. Bu, həm də Rusiyanın əleyinə olan təklifdir. Çünki Qərb təbliğatı durmadan deyir ki, Rusiya hər an Ukraynadakı Zaporojets atom stansiyasına zərbə endirə bilər. Məhz buna görə Mirzoyan həm də Qərbə yarınmaq yolunu tutub ki, güya belə təhlükə həm Azərbaycandan, həm də Rusiyadan gələ bilər.
Hərbi-siyasi şərhçi Ramil Məmmədli "Bakı-Xəbər"ə açıqlamasında bildirdi ki, Azərbaycan və Rusiyanın heç vaxt belə niyyəti olmayıb: "Rusiya belə məqsəd güdsəydi, deyilən obyektə istənilən vaxt zərbəni endirərdi. Müharibənin gedişi ərzində biz belə faktı görmədik. Çünki belə bir addımın atılması bəşəriyyətə qarşı olunan cinayət sayıla bilər. Rusiya etdiyi müharibəyə hətta başqa ad qoyub, buna xüsusi əməliyyat deyir. Özünün haqlı olduğuna dair rəy yaradır. Hansısa atom satnsiyasını hədəfə almağın bəşəriyyət üçün ciddi təhlükəsi var. Belə hal yaşanarsa bundan yalnız Ukrayna deyil, bütün yaxın ölkələr əziyyət çəkmiş olacaq. Dünyadakı təbliğat maşını da belə hücumu edən ölkənin əleyhinə işləmiş olacaq. Yəni kimsə bilə-bilə özünü haqsız vəziyyətə salmaz. Rusiya bunu etmək istəsə, elə arsenalında olan atom bombasından istifadə edər. Ermənistanda fəaliyyət göstərən "Metsamor" isə region üçün ekoloji fəlakət yaradır. Bunun təsirlərini biz və qardaş Türkiyə hiss edir. Təsadüfi deyil ki, Azərbaycan uzun müddət bu stansiyanın bağlanması tələbi ilə beynəlxalq kampaniya apardı. Azərbyacan, hətta müharibə etdiyi dönəmdə belə, Ermənistanın heç bir mülki infrastrukturuna zərbə endirmədi. Onlar isə Bərdə, Gəncə kimi döyüş bölgəsindən uzaq rayonlardakı yaşayış binalarını hədəfə aldı. Nəticədə mülki vətəndaşlar həlak oldu. Demək istəyirəm ki, belə addımları Mirzoyanın təmsil etdiyi dövlət ata bilər, biz yox. Azərbyacan bəşəri fayda olan bütün proqramlarda yaxından iştirak edir. Təsadüfi deyil ki, ölkəmiz məhz ekologiya sahəsində COP29 kimi mühüm tədbirə ev sahibliyi edəcək. Yaxşı olardı ki, Ermənistan sülh istiqamətində öz üzərinə götürdüyü öhdəlikləri yerinə yetirsin. Onun kiməsə xoş gəlsin deyə, güya bəşəriyyəti narahat edən problemləri qabartmasına heç bir ehtiyac yoxdur. Buna nə Ermənistanın imici, nə də imkanları imkan verir".
Məhəmmədəli QƏRİBLİ
