Elşən Mustafayev: "Azərbaycan ən yüksək səviyyədə diplomatik mədəniyyətini nümayiş etdirir"
Məlum olduğu kimi, mayın 19-da göyərtəsində İran prezidenti İbrahim Rəisi və onu müşayiət edən nümayəndə heyətinin olduğu helikopter qəzaya uğrayıb. Hadisə nəticəsində helikopterdəkilərin hamısı həlak olub.
İranın prezidenti İbrahim Rəisi və onu müşayiət edən nümayəndə heyətinin helikopter qəzasında həlak olması ilə əlaqədar bəzi ölkələrdə matəm elan olunub. Bildirilib ki, İranda beş, Suriya və Livanda üç, Tacikistanda iki, İraq, Türkiyə, Hindistan və Pakistanda bir günlük matəm elan olunub. Son iki gündür sosial şəbəkələrdə Azərbaycanın bu hadisəyə görə niyə matəm elam etməməsi ciddi müzakurə olunur. Təbiidir ki, bu sualın cavabı var. Ölkəmiz hər zaman faciə və fəlakətlə üzləşən dövlətlərin yanında olub. Onlara lazımi mənəvi, texniki, hətta maddi dəstəyini belə əsirgəməyib. Araşdırdıqda həm də məlum olur ki, müstəqillikdən bu tərəfə Azərbaycanda digər ölkələrdə baş verən faciəli hadisələrə görə matəm elan etmə praktikası yoxdur.
Ötən il qardaş ölkəmiz olan Türkiyədə dəhşətli zəlzələ baş verdi, 50 mindən çox insan həlak oldu. Azərbaycan matəm elan etmədi, ancaq həm dövlət, həm də xalq olaraq zəlzələdən əziyyət çəkənlərin yanında olduq. Yəni bizim bu hadisəyə görə matəm elan etməməyimiz hansısa ölkəyə olan münasibətimizdən yox, ənənəvi siyasi kursumuzdan irəli gəlir.
Beynəlxalq məsələlər üzrə şərhçi Elşən Mustafayev "Bakı-Xəbər"ə açıqlamasında bildirdi ki, hansısa ölkənin digər dövlətdə baş verən faciəyə görə mütləq matəm elan etməsi kimi öhdəliyi yoxdur: "Azərbaycan belə hadisələrlə bağlı daim öz həssaslığını ortaya qoyur. Azərbaycan dövləti və xalqı müsəlman qonşumuz İran İslam Respublikasının kədərinə şərik olduğunu təkcə sözdə ifadə etmədi, həm də əməlləri ilə isbat elədi. Bu da dövlətimizin nə qədər humanist olduğunu bir daha nümayiş etdirdi. Azərbaycan dövlətinin də bir sıra hallarda cənub qonşusu ilə incikliyi olub. Amma bu özünü son hadisədə göstərmədi.
İran Prezidentinin helikopterinin qəzaya uğraması xəbərinə ilk reaksiya verən dövlət başçılarından biri məhz Prezident İlham Əliyev oldu.
Mayın 21-də Prezident İlham Əliyev İran İslam Respublikasının ölkəmizdəki səfirliyində olub, İran İslam Respublikasının Prezidenti Seyid İbrahim Rəisinin, xarici işlər naziri Hüseyn Əmir Abdullahiyanın və digər müşayiət edən şəxslərin helikopter qəzasında faciəli surətdə həlak olmaları ilə əlaqədar başsağlığı verib, matəm kitabına ürək sözlərini yazıb. İran İslam Respublikasının ölkəmizdəki səfirliyinin müvəqqəti işlər vəkili Seyid Cəfər Ağayi ilə söhbət edən Prezident deyib ki, Seyid İbrahim Rəisinin faciəli şəkildə həlak olması bizim hamımızı dərindən sarsıtdı.
Milli Məclisin Sədri Sahibə Qafarova parlamentin 21 may tarixli iclasında helikopter qəzasında həlak olanlarla bağlı başsağlığı verdi, daha sonra sədrin təklifi ilə qəza nəticəsində həlak olanların xatirəsi bir dəqiqəlik sükutla yad edildi. Həmin gün Azərbaycan XİN rəhbər Ceyhun Bayramov və İran İslam Respublikasının xarici işlər naziri vəzifəsini icra edə Əli Bağeri Kani arasında telefon danışığı baş tutub. Telefon danışığı zamanı iki ölkə liderləri arasında sərhəddə baş vermiş görüşün tarixi əhəmiyyət daşıdığı, strateji layihələrin işə salınmasının, nəqliyyat, iqtisadiyyat, energetika sahəsində planların reallaşması üçün birgə səylərin bundan sonra da davam etdirilməsinin vacibliyi qeyd olunub.
Bundan əlavə, Baş nazir Əli Əsədovun İran İslam Respublikasına səfər edəcəyi barədə məlumat açıqlanıb. Nazirlər Kabinetindən bildirilib ki, mayın 22-də Azərbaycan Prezidentinin tapşırığına uyğun olaraq Baş nazir Əli Əsədovun rəhbərlik etdiyi nümayəndə heyəti İran İslam Respublikasının Prezidenti İbrahim Rəisinin, xarici işlər naziri Hüseyn Əmir-Abdullahianın və digər müşayiət edən şəxslərin helikopter qəzasında faciəli surətdə həlak olmaları ilə əlaqədar Tehran şəhərində keçirilən rəsmi anım mərasimində iştirak edəcək. Nümayəndə heyətinə xarici işlər naziri Ceyhun Bayramov, Milli Məclisin Azərbaycan-İran parlamentlərarası əlaqələr üzrə işçi qrupunun üzvləri və digər rəsmi şəxslər daxildir. Azərbaycan ən yüksək səviyyədə diplomatik mədəniyyətini nümayiş etdirir, həm də bunlar insani münasibət baxımından önəmli addımlardır".
Məhəmmədəli QƏRİBLİ
