Ramil Məmmədli: "Məqsəd odur ki, Ermənistanın silah arsenalını Fransa hesabına yeniləsinlər"
"Rusiya Ermənistanın son 4 ildə ödədiyi pula ekvivalent həcmdə silah göndərməyib". Bunu Ermənistanın Təhlükəsizlik Şurasının katibi Armen Qriqoryan deyib.
O bildirib ki, rəsmi Moskva ölkəsinə əvvəldən razılaşdırıldığı kimi daha böyük həcmdə silah-sursat tədarük etməli olduğu halda, öhdəliyini icra etməyib. Şura katibi bu məsələni Ermənistan üçün böyük problem adlandırıb. A.Qriqoryan vaxtilə ölkəsinin təhlükəsizliyinin Rusiyadan son dərəcə asılı vəziyyətdə olduğunu xatırladaraq bunları qeyd edib: "Biz həmin asılılığa son qoymaq üçün zəruri dəyişikliyi etməli idik və bunu da həyata keçirdik. Son dövrlər təhlükəsizlik sahəsində mühüm nəticələr əldə edilib. Əgər 2020-ci ildə alınan silahların 96 faizi Rusiyadan idxal edilirdisə, hazırda bu göstərici 10 faizədək azalıb".
"Erməni rəsmilərinin nə deməsindən asılı olmayaraq, Rusiya bu ölkəyə silah satmaqdan imtina etməyib"
Sözügedən məsələni "Bakı-Xəbər"ə şərh edən hərbi ekspert Ramil Məmmədli hesab edir ki, silah məsələsində A.Qriqoryan bir sıra məsələləri şişirdir: "Belə açıqlamalar daha çox siyasi motivlidir. A.Qriqoryan Paşinyanın komandasında Rusiyaya qarşı ən çox tənqidi mövqedən çıxış edən ölkə rəsmisidir. Ondan sonra ikinci yerdə dayanan parlament spikeri Alen Simonyandır. Bunlar sanki məqsədyönlü şəkildə belə açıqlamalar verirlər ki, Rusiya ilə körpülər yansın və Ermənistan Qərbə doğru getsin. Erməni rəsmilərinin nə deməsindən asılı olmayaraq, Rusiya bu ölkəyə silah satmaqdan imtina etməyib. Paşinyan hakimiyyəti Rusiyadan silah almaqda maraqlı olmadığı üçün belə açıqlamalar verilir. Onların məqsədi odur ki, Ermənistanın silah arsenalını Fransa hesabına yeniləsinlər. Fransa isə NATO ölkəsidir. Rusiyanın Ermənistanda hərbi bazaları var, bu ölkənin Türkiyə və İran sərhədlərini rus hərbçiləri qoruyur. Ermənistan KTMT-nin, Avrasiya İqtisadi İttifaqının üzvüdür. Ermənistan Cənubi Qafqazda yeganə ölkədir ki, orda Rusiyanın rəsmi hərbi bazaları var. Bütün bunların müqabilində Rusiya niyə Ermənistana silah satmasın və yaxud da müqavilədən irəli gələrək silahları vaxtında verməsin? Məgər Rusiya Ermənistanı itirmək istəyir? Bu baxımdan hesab edirəm ki, Qriqoryanın arqumentləri reallıqla uzlaşmır. Deyir 2020-ci ildə alınan silahların 96 faizi Rusiyadan idxal edilirdisə, hazırda bu göstərici 10 faizədək azalıb. Nəzərə alsaq ki, Ermənistanın silah arsenalının böyük hissəsi Rusiya istehsalıdır, o zaman həmin silahları, onların ehtiyat hissələrini axı necə qısa müddətdə digər ölkə istehsalı olan silahlarla əvəz etmək olar? Üstəlik, Ermənistanın böyük maliyyə resurslarının olmadığı bir şəraitdə. Bir sözlə, deyilənlər siyasi ritorikadır".
Vidadi ORDAHALLI
