Aydın Quliyev: "Bütün bunlardan ATƏT-in rəhbərliyi nəticə çıxarmalıdır və nəzərə almalıdırlar ki, Minsk qrupunun hələ də rəsmi saxlanılması həm də bölgədə gedən proseslərə bir təxribatdır"
"ATƏT-in Minsk qrupu və onunla əlaqədar olan bütün təsisatların ləğv edilməsinin vaxtıdır". Bunu Azərbaycan Prezidenti İlham Əliyev mayın 14-də ATƏT-in fəaliyyətdə olan sədri, Maltanın xarici, Avropa işləri və ticarət naziri İan Borqun başçılıq etdiyi nümayəndə heyətini qəbul edərkən deyib.
Prezident qeyd edib ki, Ermənistanın Azərbaycana qarşı hərbi təcavüzünün və torpaqlarımızın işğalının nəticələrinin aradan qaldırılması ATƏT-in yaranmasından bu təsisatın gündəliyində olmasına baxmayaraq, nə bu təşkilat, nə də ATƏT-in Minsk qrupunun həmsədrlik mexanizmi münaqişənin nəticələrinin aradan qaldırılması, Azərbaycan ərazilərinin işğaldan azad edilməsi, məcburi köçkünlərin geri qayıtması üçün heç nə etməyib. Bu illər ərzində ATƏT-in Minsk qrupunun həmsədrləri tərəfindən aparılan danışıqlar prosesi də Azərbaycan ərazilərinin işğalının davam etdirilməsinə xidmət göstərib.
Prezident 2021-ci ilin yanvarında ATƏT-in Minsk qrupunun Fransadan və Amerikadan olan həmsədrlərinin Bakıya səfəri zamanı onların üzünə demişdi ki, siz niyə gəlmisiniz, biz sizi çağırmamışıq.
Azərbaycan Prezidenti bu günlərdə də o mövqeyi təkrarladı ki, Minsk qrupu buraxılmalıdır. Prezident Əliyevin açıq tələbinə baxmayaraq, ATƏT rəhbərliyi hələ buna reaksiya verməyib, heç bir addım atmayıb. ATƏT-dən bir reaksiya, tərpəniş yoxdur, Minsk qrupunu buraxmırlar.
Niyə Minsk qrupunu buraxmırlar, o təsisatı niyə ləğv etmirlər? Bir qurum ki, işləmir, Azərbaycan da onu yaxına buraxmır, deyir ki, mənə vasitəçi lazım deyil, özüm problemi həll etmişəm.
"Görürsüz, ATƏT rəhbərliyinin ehtiyatsız və müəyyən qədər də səhlənkar yanaşması nəticəsində yaşamaqda davam edən ölü Minsk qrupunun saxlanılması bölgədə necə fitnəkar və təxribatçı hərəkətlər üçün ideya mənbəyi rolunu oynayır"
"Bakı-Xəbər" media qrupunun rəhbəri, politoloq Aydın Quliyev bizimlə söhbətində bildirdi ki, əslində ATƏT rəhbərliyi Minsk qrupunu Vətən müharibəsi başa çatan kimi dərhal buraxmalı idi. "Çünki BMT-nin mandatı altında "Dağlıq Qarabağ" münaqişəsinin həll edilməsi missiyası naminə təsis edilmiş və missiyasını yerinə yetirməmiş olan bir qurumu saxlamağın mənası yox idi. Halbuki, hələ müharibə bitəndən düz iki ay sonra, 2021-ci ilin yanvarında Azərbaycan Prezidenti ATƏT-in Minsk qrupunun iki həmsədr ölkəsinin nümayəndəsini qəbul edərkən çox açıq və kəskin tonla onlara "niyə gəlibsiniz, mən sizi dəvət etməmişəm" kimi mesaj verdi və Qarabağ münaqişəsinin artıq Azərbaycanın öz gücü ilə ilə tam həll edildiyini, bundan sonra Minsk qrupunun köhnə missiya, köhnə mandat altında fəaliyyət göstərməsinə heç bir ehtiyacın qalmadığını bildirmişdi. Bu sözlərdən sonra ATƏT-in rəhbərliyi təəssüf ki, Minsk qrupunu indiyə qədər hələ buraxmayıb və bu gün də onu formal, ölü vəziyyətdə olsa da, yaşatmaqda davam edir. Əslində, heç bir hüquqi və siyasi əsası olmayan Minsk qrupunun rəsmi qaydada buraxılmaması bu gün ATƏT-in özünə başucalığı gətirmir. Çünki dünyada ATƏT-ə qarşı hətta bəzən ittihamçı tonda suallar yaranmağına səbəb olur. Sual verilir ki, əgər münaqişənin həll olunmasında heç bir rolun olmadısa, münaqişəni Azərbaycan öz gücü ilə həll etdisə, olmayan bir münaqişənin həlli naminə yaradılmış bir ölü təşkilatı formal olaraq saxlamaqda məqsədiniz nədir? Suallar yaranır ki, ATƏT əgər Minsk qrupunu bugünə qədər ləğv etməyibsə, onun bölgədə gedən proseslərlə bağlı arxa və gizli niyyətlərinin olduğu barədə nəticəyə gəlməyə əsas vermirmi? Bütün bunlardan ATƏT-in rəhbərliyi nəticə çıxarmalıdır və nəzərə almalıdırlar ki, Minsk qrupunun hələ də rəsmi saxlanılması həm də bölgədə gedən proseslərə bir təxribatdır. Bu mənada təxribatdır ki, xüsusilə Minsk qrupunun hüquqi qaydada ləğv olunmaması Ermənistanda bütün revanşist dairələrə bir ilham verir, onları həvəsləndirir ki, əgər Minsk qrupu indiyə qədər buraxılmayıbsa, deməli, Azərbaycanla Ermənistan arasındakı "Dağlıq Qarabağ" münaqişəsi guya hələ həll olunmayıb, guya Azərbaycan-Ermənistan normallaşma prosesi lazımı nəticəni verməyəcək və guya Azərbaycanla Ermənistan arasında yenidən bir müharibə vəziyyəti yaranacaq, bu təqdirdə Minsk qrupu kimi bir vasitəçi quruma yenidən ehtiyac əmələ gələcək. Görürsüz, ATƏT rəhbərliyinin ehtiyatsız və müəyyən qədər də səhlənkar yanaşması nəticəsində yaşamaqda davam edən ölü Minsk qrupunun saxlanılması bölgədə necə fitnəkar və təxribatçı hərəkətlər üçün ideya mənbəyi rolunu oynayır"-deyə bildirən A.Quliyev vurğuladı ki, eyni zamanda Minsk qrupunun rəsmən buraxılmaması bəzi dövlətlərə hələ də onun adından sui-istifadə, manipulyasiya etmək imkanı verir. "Elə Ermənistanın özündə media orqanlarında biz tez-tez "ATƏT-in Minsk qrupunun Fransadan olan həmsədri", "ATƏT-in Minsk qrupunun Amerikadan olan həmsədri" kimi ifadələrinə rast gəlirik. Hansı ki, münaqişə yoxdursa ATƏT-in Minsk qrupunda Amerikanın hansı həmsədrlərindən söhbət gedə bilər? Fransanın hansı həmsədrindən söhbət gedə bilər? Hətta Amerika və Fransa, eləcə də Rusiya ATƏT-in Minsk qrupunda keçmiş həmsədrlərin adını dəyişərək Azərbaycan-Ermənistan normallaşması üzrə "Amerikanın xüsusi nümayəndəsi", "Fransanın xüsusi nümayəndəsi", "Rusiyanın xüsusi nümayəndəsi" kimi statuslar icad ediblər. Əlbəttə, bütün bunlar bölgənin işinə, Azərbaycan-Ermənistan normallaşma prosesinə izafi və ziyanlı müdaxilədən başqa bir şey deyil. Və bütün bu manipulyasiyaların da səbəbi odur ki, Minsk qrupu indiyə qədər ləğv olunmayıb. Minsk qrupunun ləğv olunması, dediyim kimi, birinci növbədə ATƏT-in özünün rəhbərliyinə başucalığı gətirəcək. Əgər onlar bu addımı atmayacaqlarsa onda Minsk qrupunu formal olaraq qüvvədə saxlamağın Azərbaycana real şəkildə heç bir ziyanı yoxdur. Onsuz da Azərbaycan onları nə vasitəçi kimi, nə də bölgədə hər hansı bir proseslərdə önəmli qüvvə kimi, iştirakçı kimi görmək və cəlb etmək istəmir. Dəfələrlə Azərbaycan bəyan edib ki, Ermənistanla normallaşma prosesində heç bir beynəlxalq təşkilatın və dövlətin timsalında vasitəçiyə ehtiyac yoxdur. Bütün bunların qabağında ATƏT-in rəhbərliyi Minsk qrupunu buraxmaq barədə ciddi şəkildə düşünməlidir. Oturub gözləməli deyillər ki, günlərin birində Azərbaycanın arxasınca keçmiş Minsk qrupunun üzvləri sayılan ölkələr də bir-bir bəyanat verib Minsk qrupunun tərkibindən çıxsınlar. Mən gözləyirəm ki, ilk növbədə Belarus prezidenti çox obyektiv mövqeyə malik olan bir şəxsiyyət kimi, dövlət başçısı kimi ölü Minsk qrupunun tərkibindən və Minsk konfransına ev sahibliyi edən ölkə statusundan yaxın zamanlarda imtina edəcək. Eləcə də digər ölkələr, o cümlədən Türkiyə, Çexiya, Slovakiya keçmiş Minsk qrupunun üzvülüyündən çıxmaq, imtina etmək haqqında bəyanatlar səsləndirəcəklər. Bu, fikrimcə, ATƏT-in nüfuzuna böyük bir zərbə olar. Ona görə, ATƏT rəhbərliyi hadisələrin belə səviyyəyə gəlib çıxmasını gözləmədən, məncə, Minsk qrupunun ləğv edilməsi ilə bağlı Azərbaycan Prezidentinin çağırışınamı, yaxud tələbinəmi deyim, məsuliyyətli yanaşmalıdır"-deyə A.Quliyev bildirdi.
İradə SARIYEVA
