Akif Nağı: "Baqrat camaatı bu cür sözlərlə aldadır, kütlə psixologiyası ilə oynayır"
Qarabağ məsələsinin kökündən həll olunduğunu bütün dünya da, Ermənistan hökuməti də birmənalı olaraq qəbul etdi, Qarabağın Azərbaycanın ayrılmaz tərklib hissəsi olduğunu Baş nazir Nikol Paşinyan öz imzası ilə bəyan etdi.
Artıq dünyada normal düşüncəsi olan hər kəs etiraf edir ki, Azərbaycan öz gücünə ərazilərini işğaldan azad edərək torpaqları üzərində suvernliyini təmin etdi.
Amma nədənsə, hələ də erməni Qriqoryan kilsəsi başda olmaqla Ermənistandakı revanşist qüvvələr və bəzi diaspor təmsilçiləri reallığı qəbul etmək istəməyib xam xəyallara düşürlər.
Özünü "Vətən üçün Tavuş" hərəkatının "lideri" sayan üzdəniraq arxiyepiskop Baqrat Qalstanyan İrəvana hərəkət etdikdən və burada ciddi uğursuzluğa düçar olduqdan sonra indi də Qarabağ məsələsini qurdalamağa başlayıb. Bu həmin keşişdir ki, Vətən müharibəsi dövründə də, sonrakı zamanlarda da Qarabağla bağlı hədyanlar səsləndirib.
Baqrat Qalstanyan jurnalistlərə deyib ki, "ermənilərin Qarabağa qayıtması üçün alətlər hakimiyyətin əlindədir".
Qalstanyan qeyd edib ki, Qarabağ sakinlərinin Ermənistandakı həyatı və onların Qarabağa qayıtması ilə bağlı məsələlər müzakirə olunub. "Arxiyepiskop" "bütün bu müzakirələr istəklər səviyyəsindədir, çünki lazımi vasitələr səlahiyyətlilərin əlindədir"-deyib.
"Hər şey haqqında danışa bilərik, amma istəklər reallaşacaqmı?". O, həmçinin çıxış yolunu Paşinyanın istefasında görüb.
Bunların hər şeydən əli üzülüb, indi də "Qarabağın qaytarılması", yaxud ermənilərin geri qayıtması məsələsindən yapışıblar. Revanşist keşiş yenə də Qarabağın "qaytarılmasından", bu alınmasa ermənilərin geri qaytarılmasından danışıb. Unudur ki, heç kəs erməniləri Qarabağdan qovmayıb, onlar özləri könüllü şəkildə gediblər. Ermənilərin geri - Qarabağa qayıtması isə Azərbaycanın irəli sürdüyü şərtlərdən aslıdır, Qərbi azərbaycanlılar geriyə öz ata-baba yurdlarına döndükdən sonra bu məsələ həll oluna bilər.
Qeyd edək ki, Qarabağdan getmiş bəzi separatçılar da yenə "Qarabağdan əl çəkmədiklərini" deyirlər.
"Özü də başa düşür ki, boş-boş danışır, insanları müəyyən yalançı vədlərlə ümidləndirir"
Azad Vətən Partiyasının sədri Akif Nağı "Bakı-Xəbər"ə bildirdi ki, keşiş Baqrat çox oyunlardan çıxdı, hələ bundan sonra da yəqin, müəyyən oyunlardan çıxacaq. "Çünki onu oyuna atanların məqsədləri var, axıra qədər də ondan istifadə etmək fikrindədirlər. Onun heç bir cəhdi alınmadı. İrəvanda aksiya keçirməyə çalışdı, Paşinyanın istefası məsələsini qoyur. Narazılıq var, insanların incə hisslərinə toxunur, kilsənin adından çıxış edir. Bunlar müəyyən mənada insanları hərəkətə gətirir, aksiyalarda iştirak edirlər. Amma hər kəs başa düşür ki, o marionetdir, ortaya atılan oyuncaq bir fiqurdur, müəyyən məsələləri onun vasitəsilə yoxlayırlar, yəni əhali nəyə necə reaksiya verir, xaricdən hansı reaksiyalar var. Ermənistanda da hakimiyyətə gəlmək istəyən müəyyən qüvvələr var, bu onlar tərəfindən ortaya atılıb. Eyni zamanda xaricdə də müəyyən qüvvələr, ayrı-ayrı ölkələr var ki, Ermənistanda situsiyanı nəzarətə götürmək istəyir.
Onlar növbəti variantı da yoxlayırlar, Ermənistanın 4 kəndi Azərbaycana qaytarılmasına qarşı hay-küy saldılar, amma Ermənmistan hakimiyyəti də mövqeyində dayandı. Baqratın özünü də Kirant kəndinə buraxmadılar. "Müxailf" deputatlar özlərini ora çatdırmaq istədi, müxtəlif ictimaiyyətçilər, elm adamları Azərbaycana qaytarılan kəndlərə gəlmək istəyirdilər ki, camaatla görüşsünlər, amma Ermənistan hökuməti onları geriyə qaytardı. Bu cəhdləri də alınmadı. Əvvəl camaat Baqratın sözünə qulaq asdı, amma gördülər ki, bu boş, mənasız sözlərdir, o ciddi adam deyil. Son açıqlamasında da deyir ki, guya Paşinyanın istefasına nail olcaq, guya onun başqa yolu yoxdur. Baqrat camaatı bu cür sözlərlə aldadır, kütlə psixologiyası ilə oynayır. İnsanlar da adətən bu cür çağırışlara reaksiya verirlər. Bütün bu vasitələr bitdi, 4 kəndlə bağlı məsələ söndü, artıq orada sərhəd dirəkləri basdırılıb, Ermənistanla Azərbaycan arasında proseslər davam edir. İndi başqa bir variant axtarır ki, bəlkə öz avantürasını bu yolla davam etdirsin. Gündəmdə qalması üçün istifadə etdiyi bütün metodlar iflasa uğradığı üçün indi də Qarabağ məsələsindən, ermənilərin ora qaytarılmasından yapışıb. Erməniləri heç kim oradan qovmayıb. Azərbaycan hökumətinin mövqeyi ondan ibarətdir ki, ermənilər ora qayıdıb yaşaya bilərlər, amma şərtə görə, onlar Azərbaycan vətəndaşlığını, Azərbaycan konstitutsiyasını qəbul etməlidirlər, onu etmirlərsə, onların üzlərinə qapı bağlıdır. Digər tərəfdən, Azərbaycan sonsuz şəkildə onları gözləmək fikrində deyil, Xankəndi tarixən Azərbaycan şəhəri olub, indi də o statusu özünə qaytarıb. Təmiz Azərbaycan şəhəri olaraq öz mövcudluğunu davam etdirəcək"-deyə A.Nağı qeyd etdi.
A.Nağı bildirdi ki, Azərbaycan prosesləri normal şəkildə davam etdirir, tikinti-quruculuq işləri gedir, Qarabağ Universiteti yaranıb, artıq ermənilər ora qayıtmaq haqqını itirdiklərini bilirlər, qayıtmağa onların heç bir hüququ yoxdur. "Keşiş Baqrat da hər şeyi bilir. Açıqlmasında da bildirib ki, biz bunu söz olaraq deyirik. Ermənilərin ora qayıtması bizim ixtiyarımızda deyil, bu, Ermənistan hökumətinin səlahiyyətindədir. Baqrat özü də başa düşür ki, boş-boş danışır, insanları müəyyən yalançı vədlərlə ümidləndirir. Başa düşdüyü bir məsələ də var, onu etiraf etmir ki, ermənilər Qarabağdan daha əllərini üzüb, ora qayıtmaq istəmirlər...".
Baqratın dediklərinin cəfəngiyat olduğunu deyən A.Nağının sözlərinə görə, indiyə qədər o ciddi bir tezisə müraciət etməyib, hansı fikri deyirsə, hansı açıqlamanı verirsə bir müddətdən sonra sabun köpüyü kimi dağılıb gedir, təsirini itirir. "Bu onun ən uğursuz açıqlamalarından biridir. Çünki Ermənistanda da tam şəkildə başa düşürlər ki, artıq ermənilərin Qarabağa qayıtması mümkün deyil"-deyə A.Nağı bildirdi.
Qarabağdan köçüb gedən ermənilərdən erməni kilsəsinin, müəyyən xarici qüvvələrin və dövlətlərin Azərbaycana qarşı istifadə etməyə çalışdığını deyən A.Nağının sözlərinə görə, hələ bundan sonra da onlardan alət kimi yararlanmağa çalışanlar olacaq, bütün bunlar isə nəticəni dəyuşməyəcək, Qarabağ Azərbaycanın BMT tərəfindən tanınmış hissəsidir və dövlətimiz orada böyük işlər həyata keçirir.
İradə SARIYEVA
