Faiq Ələkbərli: "Azərbaycanı qaralamaq heç bir fayda verməyəcək, hansısa fransız deputatın hədyanları gerçəyi dəyişməyəcək"
Rəsmi Parisin Azərbaycana qarşı yürütdüyü düşmən siyasətini Fransa senatının müəyyən deputatları da davam etdirir. Bunların gözlərini erməni sevdası elə tutub ki, hər şeyə görə Azərbaycanı suçlayırlar. Elə bunun təzahürüdür ki, Fransanın içində bir hadisə baş verirsə "bunu Azərbaycan edib" deyirlər.
Məsələn, Yeni Kalendoniyada və başqa müstəmləkələrində davam edən milli azadlıq hərəkatlarının, Fransanın neokolonializm siyasətinə qarşı başlanan etirazların arxasında Azərbaycanın durduğunu iddia edirlər. Təbii ki, bu tamamilə əsassızdır.
Fransa Milli Assambleyasının Fransa-Ermənistan parlament dostluq qrupunun rəhbəri Ann-Lorens Petel sosial şəbəkə hesabında Azərbaycanla bağlı sərsəm fikirlər səsləndirib. Guya Fransa Ermənistanı dəstəklədiyi üçün Bakının hədəfinə çevrilib.
"Yeni Kaledoniyada sabitliyin pozulmasının arxasında Azərbaycanın yaratdığı Bakı Təşəbbüs Qrupunun dayandığı göz qabağındadır" iddiasını irəli sürən parlamentari sərsəmləyib ki, guya rəsmi Bakı erməni "demokratiyasını" dəstəklədiyi üçün Fransadan "hayıf" alır. Hətta əsassız olaraq ölkəmizdə "diktatura" olduğunu da sərsəmləyib. Guya Azərbaycan Fransanın ermənilərə dəstək verməsinə görə, ondan qisas alır. Bu əlbəttə ki, tamamilə absurddur və rəsmi Bakı nə Fransanın, nə də başqa ölkənin daxili işlərinə qarışmağı adətə çevirməyib, bu, Fransaya xas xüsusiyyətdir ki, uzun illərdən indiyə qədər ölkəmizin daxili işlərinə qarışmağa cəhd edir, Cənubi Qafqaza müdaxilə edib burada qarışıqlıq yaratmağa, təsir gücünü yeritməyə çalışır. Bunun isə qarışısını hər zaman Azərbaycan dövləti alır. Yeni Kaledoniyada və başqa müstəmləkələrdə baş verən narazılıqların isə günahkarı istilaçı, sömürücü Fransadır, o torpaqların və xalqların üzərindən əlini çəkmək əvəzinə azadlıq, müstəqillik arzusunda olan xalqları qanında boğur, onların iradəsini sındırmağa çalışır.
"Müstəmləkəçiliklə mübarizədə Azərbaycan nümunə göstərir, amma Fransa etdiklərindən dərs götürmək əvəzinə, müxtəlif adamların dili ilə Azərbaycanı ləkələməyə çalışır"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə şərhində bildirdi ki, Fransa parlamentarisinin dedikləri tamamilə cəfəngiyatdır. "Fransa hər zaman Azərbaycana qarşı qərəzli olub, düşmənçilik yolunu tutub. O, bu düşmənçiliyi yalnız İkinci Qarabağ müharibəsi dövründə göstərməyib, Vətən müharibəsinə qədər də Fransa Azərbaycana qarşı zaman-zaman ikiüzlü siyasət ortaya qoyub. Ancaq İkinci Qarabağ savaşı Fransanın əsl simasını ortaya çıxardı. Bu baxımdan, hansısa fransız deputatın Azərbaycana qarşı hədyanlar söyləməsini təbii qarşılamaq lazımdır. Çünki Fransa üçün ermənilər, Ermənistan ayrıcalıq təşkil edir. Bu mənada Ermənistanda avtortarizm, diktatura, yaxud demokratiya olmasının heç bir əhəmiyyəti yoxdur. Yəni Ermənistanda diktatura rejimi hökm sürsə də, onu "demokratiya" kimi qələmə verəcəklər. Əslində isə Ermənistan demokratiyasından danışmağa dəyməz. Ola bilsin, Paşinyan hökumətinin əvvəlki hökumətlərdən fərqli müəyyən addımları var. Amma bütövlükdə Ermənistanda demokratiyadan danışmağın heç bir anlamı yoxdur"-deyə bildirən F.Ələkbərli vurğuladı ki, Azərbaycanı pisləmək fransızların xarakterindən irəli gəlir.
Azərbaycanın Yeni Kaledoniyada və başqa müstəmləkələrdə baş verən etirazlarda əli olmadığını deyən F.Ələkbərlinin sozlərinə görə, Bakı Təşəbbüs qrupu Fransanın daxili işlərinə qarışmaq üçün yox, müstəmləkə təpikləri altında əzilən xalqların harayını beynəlxalq ictimaiyyətə çatdırmaqdan ötrü yaradılıb. O qeyd etdi ki, beynəlxalq aləm Fransanın o ərazilərdə müstəmləkəçiliyinə son qoyması üçün çalışmalıdır, Azərbaycan neomüstəmləkəçiliyə qarşı çıxır və bir xalqın başqa bir xalqın üzərində ağlığını qəbul etmir. "Müstəmləkəçiliklə mübarizədə Azərbaycan nümunə göstərir, amma Fransa etdiklərindən dərs götürmək əvəzinə, müxtəlif adamların dili ilə Azərbaycanı ləkələməyə çalışır".-deyə bildirən F.Ələkbərli vurğuladı ki, uzun illər Azərbaycan torpaqları Ermənistanın işğalı altında olub, amma Fransanın işğalçıya qarşı hər hansı bir addımı olmayıb, əksinə, işğalın uzadılmasına dəstək verib. Eyni zamanda Ermənistanda baş verən neqativ hallarla bağlı heç zaman Fransanın reaksiya vermədiyini deyən F.Ələkbərli qeyd etdi ki, Ermənistan parlamentində güllələnmə belə olub, sui-qəsdlər törədilib, qanlar tökülüb, qanunsuz hakimiyyət dəyişiklikləri olub, amma Fransa bir bəyanat verməyib, bunların üstündən səssiz keçib. "Əlbəttə, bu. demokratiya əlaməti deyildi. Fransız parlamentari haqsız olaraq ölkəmizdə "diktatura" olduğunu yazıb. Bunu ona görə deyib ki, biz öz torpaqlarımızı işğaldan azad etmişik, tarixi torpaqlarımızda, ayrılmaz ərazilərimizdə öz hökmranlığımızı bərpa etmişik. Bununla da Fransanın da, Ermənistanın da çirkin oyunlarını pozmuşuq, münaqişənin bu şəkildə həlli, torpaqlarımızın azad olunması faktını Fransa heç cür həzm edə bilmir"-deyən F.Ələkbərli qeyd etdi ki, beynəlxalq hüquq Azərbaycanın tərəfindədir, dövlətimiz öz hüququndan istifadə edib ədaləti bərpa etdi, etməkdə də davam edəcək. "Azərbaycanı qaralamaq heç bir fayda verməyəcək, hansısa fransız deputatın hədyanları gerçəyi dəyişməyəcək. Azərbaycan həmişə haqqı, ədaləti dəstəkləyib, bu yolda da davam edəcək. Bir də ki, düşmənçiyi Azərbaycan yox, Fransa aparıb həmişə, ermənilərə görə öz paralmentində bizə qarşı bədnam qətnamələr qəbul etdirib, separatçıların təəssübünü çəkib"-deyə müsahibimiz bildirdi.
İradə SARIYEVA
