Daşdəmir Əliyev: "Azərbaycan mümkün ola biləcək bu cür təxtibatlara qarşı istənilən müstəvidə mübarizə aparmağa hazırdır"
Ermənistanda Paşinyana qarşı yeni təzyiq dalğası başlayıb. Maraqlıdır ki, bu proses həyata keçirilən delimitasiya prosesi fonunda baş tutur. Bir sıra siyasi fəallar və hüquq müdafiəçiləri qeyd edir ki, delimitasiya prosesi heç bir hüquqi əsas olmadan siyasi qərarlarla həyata keçirilir.
Bu qəbildən olan şəxslər qeyd edir ki, dövlət sərhədinin demarkasiyası heç bir izahat və səbəb olmadan baş verir, heç bir qətnamə layihəsi belə yoxdur.
Onlar hesab edir ki, dövlət sərhədi və sərhəd təhlükəsizliyi məsələləri Ermənistanın hər bir vətəndaşını, ilk növbədə, sərhədyanı kəndlərin sakinlərini, onların həyati hüquqlarını narahat edir - istənilən məhdudiyyətlər ictimai məsuliyyət və düzgün hüquqi əsaslandırma tələb edir.
Belə tələblərdən sonra belə qənaətə gəlmək olarmı ki, delimitasiyanın keçirilməsi üçün hansısa hüquqi sənədin ortada olmaması gələcəkdəki Ermənistan hakimiyyətlərinə sərhəddəki dəqiqləşməni şübhə altına almağa əsas vermiş olar?
Hərbi-siyasi şərhçi, ehtiyatda olan polkovnik-leytenant Daşdəmir Əliyev "Bakı-Xəbər"ə açıqlamasında bildirdi ki,
Azərbaycan və Ermənistan arasında sərhədin Qazax-Tavuş istiqamətinin demarkasiyası ilə bağlı imzalanan protokol Kirants kəndində narazılıq yaradıb:
"Ermənistan baş nazirinin ofisi protokolda istədiklərinə nail olduqlarını açıqlayıb.
Qeyd olunub ki, Voskepardakı (Əskipara) kilsə, o cümlədən, Bağanis-Voskepar yolu onların nəzarətində qalıb. Bununla yanaşı, 25 hektar əkin sahəsinin Kirants kəndində qaldığı deyilir. Kirants kəndindəki ermənilər isə Ermənistan hakimiyyətini yalan danışmaqda ittiham edir. Bildirirlər ki, onların xeyrinə heç nə həll olunmayıb.
Baş nazir Nikol Paşinyan bildirib ki, bu üç məqam həssas məsələdir, burada daha əhatəli iş aparılacaq. Ermənistan müxalifəti isə bildirib ki, Kirants kəndinə 25 hektar ərazinin əlavə olaraq qalması mümkün deyil. Çünki xəritələrdə fərqli şeylər qeyd olunur. Onlar Paşinyanın yalan danışdığını deyirlər. Baş verənlər bir daha sübut edir ki, Bakı-İrəvan xəttində problemlərin həlli üçün üçüncü tərəflərin vasitəçiliyinə ehtiyac yoxdur, əksinə, belə müdaxilələr əlavə problemlər yaradır.
Uzunmüddətli düşmənçiliyə baxmayaraq, iki ölkə "dil tapa" bilər və bu, qarşıda gözlənilən böyük sülh sazişinin də yalnız ikitərəfli formatda bağlanmasının mümkünlüyünü ön plana çıxarır. Sərhədlərin dəqiqləşməsi ikitərəfli dövlət komissiyalarının əldə etdiyi razılaşma əsasında həyata keçirilir. Həmin komissiyada müxtəlif dövlət qurumlarının nümayəndələri təmsil olunur. Bu ikitərəfli komissiyanın imzaladığı bütün sənədlər dövlət adındandır və rəsmi xarakter daşıyır. Bunu heç kim şübhə altına ala bilməz. Sərhədin dəqiqləşən hissələrinə dirəklər basdırılır, hətta bəzi yerlərdə artıq məftillər də çəkilib. Ermənistanda gedən prosedur eynilə Azərbaycanda da aparılır. Yəni biz bununla bağlı parlamentdə hansısa xüsusi qanun layihəsi qəbul etməmişik. Ermənistanda bundan sonra hakimiyyətdə hansı qüvvə olarsa, əldə olunan razılaşmaya hörmətlə yanaşmalıdır. Buna qarşı edilən hər hansı bir cəhd Azərbaycanın ərazi bütövlüyünə qəsd kimi dəyərləndiriləcək. Təbiidir ki, Azərbaycan mümkün ola biləcək bu cür təxtibatlara qarşı istənilən müstəvidə mübarizə aparmağa hazırdır. Bu baxımdan da Ermənistanda səslənən bənzər fikirlər sülh prosesini ləngitməyə yönəlib və Qərbdən stimullaşdırılır".
Məhəmmədəli QƏRİBLİ
