Əli Mustafa: "Onlar bildirmək istəyirlər ki, ümumiyyətlə bu bölgədə baş verən hadisələrin heç biri ilə Ermənistanın əlaqəsi yoxdur"
İran prezidenti İbrahim Rəisinin mayın 19-da Ermənistanın Sünik (Zəngəzur) vilayətinə gəlməli olduğu, lakin son anda səfərini təxirə salması ilə bağlı xəbərlər həqiqəti əks etdirmir. Bunu Ermənistan Xarici İşlər Nazirliyinin rəsmisi Ani Badalyan deyib:
"Yüksək rütbəli məmurların Ermənistana təsdiqlənmiş səfərləri ilə bağlı rəsmi məlumat verilir".
Xatırladaq ki, ötən gün İranın hökumətə yaxın olan mediasında Rəisinin Qərbi Zəngəzur ərazisində yol açılışında iştirak etmək üçün Ermənistana səfərdən son anda imtina etdiyi haqda məlumat yayılmışdı.
Bu xəbəri İran yox, Ermənistan niyə tələsik təkzib edir? Özü də əsaslandırma məntiqli deyil. Demirlər ki, belə bir səfər nəzərdə tutulmayıb, deyirlər ki, belə səfərlərlə bağlı əvvəlcəsən rəsmi məlumat verilir. Ermənistanın bu məlumatı dərhal təkzib etməyə can atması nə ilə bağlıdır?
Müstəqil siyasətçi Əli Mustafa "Bakı-Xəbər"ə açıqlamasında bildirdi ki, İran prezidenti Rəisinin may ayının 19 - da "Xudafərin" və "Qız qalası" hidroqovşaqlarının açılışında iştirakı ilə bağlı rəsmi məlumat əvvəlcədən verilmişdi: "Yəni tədbirdə onun iştirakı normaldır və ictimaiyyətə də bu barədə açıqlama vardı. Amma Ermənistana gedəcəyi, oradan hansısa yolun aşılışı ilə bağlı hər hansı bir məlumat yox idi. Son anda belə bir qərarın olması və s., düşünürəm ki, bunlar qeyri - ciddi məlumatlardır. İndi Ermənistan da bunu dilə gətirdi. Əslində ola bilsin ki, onlar bu səfərlə bağlı və Rəisinin həyatını itirməsi ilə bağlı məsələlərdə Ermənistanın adının keçmədiyini, onun iştirak etmədiyini demək istəyirlər. Onlar bildirmək istəyirlər ki, ümumiyyətlə bu bölgədə baş verən hadisələrin heç biri ilə Ermənistanın əlaqəsi yoxdur. Hətta bura gəlmək barədə də razılaşma olmayıb. Düşünürəm ki, hansısa şübhələrə, ehtimallara yol açılmasın deyə bunu ediblər. Digər tərəfdən də, əslində bu dedi-qodular Azərbaycan - İran, Azərbaycan - Ermənistan münasibətlərinə də xələl gətirə bilər. Ermənilər bundan da çəkinirlər və anlayırlar ki, boş, cəfəng məlumatdan problem yaratmaq onların da işinə gələcək hal deyil. Ermənistan tərəfin məsələyə münasibət bildirməsi, tez-tələsik informasiyanı təkzib etməsi daha çox ordan qaynaqlanır ki, məsələnin Ermənistana aidiyyəti olmadığını ortaya qoymaq istəyirlər. Eyni zamanda, Azərbaycanla əməkdaşlığın tərəfində olduqlarını, Azərbaycanla başlanan dialoqun dərinləşməsini istədiklərini bildirmək istəyirlər. Mən hesab edirəm ki, burada başqa bir məntiqi izah axtarmaq düzgün deyil. Son günlər Ermənistan tərəfdə saytların Azərbaycana qarşı müəyyən hücumları da oldu. Amma indi rəsmi olaraq bu açıqlamanın yayılması bəlkə də bir üzrxahlıq idi. Rəsmi erməni qurumları bildirmək istəyirdilər ki, bu yazılanlara rəsmi dairələrin aidiyyəti yoxdur, özfəaliyyətdir. Rəsmi məqamlar isə əksinə, bu hadisədən sui-istifadə etmək, dövlətlərarası münasibətlərin korlanmasında rol almaq istəmirlər".
İstənilən halda, bu məsələdə erməni məkri görünür. Rəisinin ora gedib-getməyəcəyi ilə bağlı dolğun xəbərin verilməsi nəyisə dəyişən deyil. Çünki Rəisi artıq həyatda yoxdur!
Məhəmmədəli QƏRİBLİ
