Makron Kaledoniya aeroportunu bağladı - kanak xalqı "qida blokadasına" alındı...
Mübariz Göyüşlü: "Bu, Fransanın qəddarcasına yürütdüyü imperialist siyasətin növbəti göstəricisidir"
Bu gün Yeni Koledoniya əhalisi, kanak xalqı Fransanın müstəmləkə siyasətinə, istismarçılığına qarşı mübarizə aparır, bu ölkənin boyundurğundan xilas olub dövlət müstəqilliklərini elan etmək istəyirlər.
Fransa isə kanak xalqının bu haqlı mübarizənin qarşısını almaq, etirazları amansızlıqla yatırmaq yolunu tutub, ora qoşun yeridib. Bununla kifayətlənməyən işğalçı, irticaçı dövlət Yeni Koledoniyada hava limanını bağlayıb ki, bura giriş-çıxış olmasın.
"Yevropeyskaya pravda" ("Avropa həqiqətləri") yazır ki, Fransa tərəfindən Yeni Kaledoniyanın paytaxtı yaxınlığındakı hava limanı daha bir neçə gün bağlı qalacaq.
Paytaxt Numea yaxınlığındakı beynəlxalq hava limanının bağlanmasını bəzi ölkələr, xüsusən də Avstraliya və Yeni Zelandiya narahatlıqla qarşılayıb, onların öz vətəndaşlarını daha tez təxliyə etmək çağırışlarına baxmayaraq, mayın 23-nə qədər kommersiya uçuşları üçün hava limanı bağlı qalacaq. Müstəqillik tərəfdarı qüvvələrin seçki islahatlarından narazılığı nəticəsində etirazlar başlayıb, hava limanı isə ötən çərşənbə axşamından bağlanıb.
Bildirilir ki, Fransadan təxminən 2700 nəfərlik polis qüvvələrinin gəlməsinə baxmayaraq, vəziyyət hələ də çox gərgindir və bir çox yollarda barrikadalar qalmaqdadır. Bazar günü səhər başlayan polis hərəkatı magistral yola nəzarəti bərpa etməyə yönəldilib.
"Avropa həqiqətləri" yazır ki, gələn həftənin bazar ertəsi saat 18:30-da Parisdə Yeni Kaledoniyadakı vəziyyətlə bağlı Müdafiə Şurasının yeni iclası keçiriləcək. Fransa Daxili İşlər Nazirliyinin rəhbəri əməliyyatın ilkin "uğurları" barədə məlumat verib. Bununla belə, jurnalistlərin hadisə yerindən verdiyi məlumata görə, etirazçılar dağıdılsa da, barrikadalar və nəzarət-buraxılış məntəqələri tezliklə bərpa edilib.Yeni Kaledoniyada genişmiqyaslı etirazlar ötən bazar ertəsi başlayıb. Yerli müstəqilyönlü qüvvələr seçki qanununun konstitusiya islahatından narazıdırlar. Təəssüf ki, sözügedən mətbuat orqanı Fransanın işğalçılıq, müstəmləkəçilik siyasətini, amansızlığını "islahat", öz haqlarını tələb edənləri isə "islahat əleyhdarları" kimi qələmə verir. Etirazçılar hesab edir ki, Fransanın bu addımları Yeni Kaledoniyada fransızyönlü siyasətçiləri gücləndirəcək və yerli kanak xalqının daha da marginallaşmasına gətirib çıxaracaq.
Qeyd edək ki, Fransa tərəfindən 2021-ci ildə keçirilən saxta referendumu kanak xalqı boykot etdi.
Yəni Numea Sazişinin icazə verdiyi üçüncü və sonuncu referendum 2021-ci il dekabrın 12-də keçirilib, lakin səsvermə kanak xalqının böyük hissəsi tərəfindən boykot edildiyindən, fransızlar daha böyük saxtakarlıqlar edərək, yerli əhalinin 96 faizinin müstəqilliyə "yox" dediyini elan etdi. Əhali səsverməni boykot etdiyi və Fransa ortaya saxta rəqəmlər çıxardığı üçün Yeni Kaledoniya Fransanın bir hissəsi kimi qaldı. Bu ilin mayında isə Yeni Kaledoniya ərazisində təklif olunan seçki islahatı ətrafında müzakirələr zamanı iğtişaşlar, qarşıdurmalar baş verdi, bu gün də o mənzərə yaşanır. Referendumlar nəticəsində əldə edilən statistikalardan göründüyü kimi, Fransa bu ada dövlətini zor gücü ilə öz təsir dairəsində saxlamaq istəyir.
Xarici media da yazır ki, hələ bir neçə gün hava limanı bağlı olıacaq. Koledoniyanın paytaxtı Numea şəhərinin hava limanının bağlanmasından Avstraliya, Yeni Zelandiya narahatdır, ordan öz vətəndaşlarını çıxara bilmirlər. Fransa da ora təxminən 2700 nəfərlik polis qüvvələri yeridib. Həm polis qüvvələri yeritməsi, həm də üstəlik hava limanını bağlaması, haqqını tələb edən insanlara qarşı vəhşilik çox narahatedicidir. Bu, buradakı yerli xalqı blokadaya almaqla rəsmi şəkildə iqtisadi təzyiqlə onun müstəqillik iradəsini sındırmaq cəhdidir. Belə deyək, Fransanın bu amansız davranışı, hava limanını bağlaması az qala genosid mühasirəsidir. Camaatın əlaqələrini kəsməklə, onları çörəklə, ərzaqla imtahana çəkməklə yerli xalqa qarşı genosid siyasəti yürüdür.
"Bu cür qəddar, zalım, blokada siyasətilə Fransa kanak xalqının müstəqillik yolunu bağlaya, iradəsini sındıra bilməyəcək"
Müasir İnkişaf Birliyinin sədri Mübariz Göyüşlü "Bakı-Xəbər"ə şərhində "bu, Fransanın qəddarcasına yürütdüyü imperialist siyasətin növbəti göstəricisidir. Müasir dövrdə yeni müstəmləkəçilik siyasətinin ən bariz nümunəsini Fransa göstərir. Bu müstəmləkəçi ölkə Yeni Kaledoniyada kanak xalqını fəlakətə düçar edib. Təəssüf ki, biz BMT Təhlükəsizlik Şurasının beş daimi üzvündən biri olan Fransanın, özünü mədəniyyət və demokratiya çarçısı, insan hüquqlarının müdafiəçisi kimi qələmə verən bir dövlətin rəhbərinin belə bir qəddar yanaşmalarını müşahidə edirik" deyə bildirdi.
M.Göyüşlünün sözlərinə görə, Fransanın Yeni Kaledoniyanın paytaxtında hava limanını bağlaması, bundan sonra bir neçə gün də bağlı saxlamaq niyyətini açıqlaması nəinki yerli əhalinin, eləcə də başqa dövlətlərin vətəndaşlarının vəziyyətinə mənfi təsir göstərir, dövlətlər Fransanın amansız davranışları nəticəsində öz vətəndaşlarını oradan təxliyə edə bilmir. "Fransa yalnız kanak xalqını təhlükə ilə üz-üzə qoymayıb, oradakı xarici ölkə vətəndaşlarının da vəziyyətini ağırlaşdırıb, yolunu bağlayıb. Kanak xalqının başına gətirdiyi bəlalara, bu gün orada etirazçılara divan tutmasına, təəssüf ki, dünya birliyi hələ də susur. Heç böyük dövlətlərin də səsləri çıxmır. Oradakı məzlum xalq növbəti dəfə fəlakətə, aclığa düçar edilir, dəhşətli hadisələr yaşayır. Çox təəssüflər olsun ki, dünya birliyi Fransanın qaniçən siyasətinə göz yummaqla kanak xalqını taleyin ümidinə buraxıb. Bir xalqın belə ağır şəkildə blokadada saxlanılması, onların qida ilə, çörəklə imtahana çəkilməsi yolverilməzdir"-deyən M.Göyüşlü bildirdi ki, başqa dövlətlərdən fərqli olaraq, Azərbaycan Fransanın bu siyasətinə qarşı susmur, etiraz edir, Bakı Təşəbbüs Qrupu fəlaiyyət göstərir, biz bütün platformalarda bu məsələni gündəmə gətiririk və gətirəcəyik də. O qeyd etdi ki, kanak xalqı tək olmadıqlarını, onlara dəstək verdiyimizi bilməlidir, bilirlər də. Bu dəstəyin də Fransanı ciddi narahat etdiyini deyən M.Göyüşlü vurğuladı ki, bu ölkə bizi əsassız yerə Yeni Kalendonyada iğtişaşlar təşkil etməkdə günahlandırır. "Halbuki, iğtişaşları Azərbaycan deyil, Fransa təşkil edir. Bu cür qəddar, zalım blokada siyasətilə Fransa kanak xalqının müstəqillik yolunu bağlaya, iradəsini sındıra bilməyəcək. Bu xalq Fransanın mütəmləkəçilik siyasətinə qarşı sona qədər mübarizə aparmalı və birdəfəlik onun ağalığına, zülmünə son qoymalıdır. Neomüstəmləkəçilik faciəvi nəticələrə aparır, mütərəqqi bəşəriyyəti Fransanın müstəmləkəçilik siyasətinə qarşı çıxmağa səsləyirəm"-deyə M.Göyüşlü qeyd etdi.
İradə SARIYEVA
