Elşən Manafov: "Müxalifətin səsvermə yolu ilə Paşinyanı hakimiyyətdən uzaqlaşdıracağı inandırıcı deyil"
Baqrat Srbazyanın rəhbərliyi siyasi qüvvələrin ziddiyyətlərini kənara çəkə bildi, arxiyepiskopun təsir gücü bu ziddiyyətləri üstələyir. Bu barədə "Həyat üçün ölkə" partiyasının həmtəsisçisi Mesrop Arakelyan jurnalistlərlə söhbətində bildirib.
Onun sözlərinə görə, bu, təkcə siyasi müstəvidə deyil, bütün sosial təbəqələrdə də baş verir: "Baqrat Srbazyan təkcə mitinqin və ya müəyyən küçə prosesinin lideri kimi deyil, həm də siyasi lider kimi qəbul edilməlidir. Yaxın gələcəkdə müvəqqəti hökumət və ya başqa format olacaq. Biz inanırıq ki, bu mərhələdə Baqrat Srbazyan konsolidasiya üçün yeganə fürsətdir. "Növbəti baş nazirin namizədliyinin müzakirəsi güclü siyasi fikir ayrılığına səbəb olacaq".
Belə görünür ki, ermənilər yeni baş nazir yox, müvəqqəti hökumət axtarışındadılar. Bu yolla Paşinyana qarşı olan qüvvələri, necə deyərlər, təmərküzləşdirmək istəyirlər.
Maraqlıdır, bütün bunları ekspertlər necə dəyərləndirir?
"Erməni cəmiyyətində Azərbaycanla növbəti dəfə hərbi toqquşmaya guc, təpər və istək olmadığından..."
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov müxalifətin bu istəyinin real olmadığını qeyd etdi: "Erməni müxalifətinin kilsənin yönləndirdiyi etiraz aksiyalarından hökumətə təzyiq vasitəsi olaraq istifadə edib, parlamentdə muvəqqəti hökumət formalaşdırmaq istəyi ölkənin mövcud qanunvericiliyinin tələbləri baxımından qəbuledilməzdir. Hazırda müxalifət parlamentdə iki fraksiya ilə təmsil olunur. Onlardan biri sabiq prezident Robert Köçəryanın rəhbərlik etdiyi "Hayastan" fraksiyasıdır. Bu fraksiya parlamentdə 29 deputata malikdir. Digəri isə Ermənistanın üçüncü prezidenti Serj Sarkisyanın "Mənim şərəfim" fraksiyasıdır ki, 6 deputatla təmsil olunur. Hazırki baş nazir Paşinyanın impiçment tələbini parlamentdə müzakirəyə çıxarmaq üçün daha bir deputat müxalifət fraksiyasına qoşulmalıdır. Keşiş Srbazyan müstəqil deputatlardan bir neçəsinin onları dəstəkləməyə hazır olduqlarını bildirib. Lakin hazırkı iqtidar partiyası sayılan Mülki Müqavilə parlamentdə böyuk üstünlüyə malikdir. O baxımdan müxalifətin səsvermə yolu ilə Paşinyanı hakimiyyətdən uzaqlaşdıracağı inandırıcı deyil. Bununla belə, Paşinyanın özünün Ermənistanda küçə yürüşlərinin artan təzyiqi nəticəsində hakimiyyətə gəlmə presidenti mövcuddur ki,onu da geosiyasi faktor - Qərbin maliyyə və siyasi dəstəyi doğurmuşdu. Hazırki şəraitdə bu əks qütb Rusiya ola bilər. Lakin Moskva Ermənistana yetərincə təsir vasitələrinə malik olduğundan, rəsmi İrəvanla münasibətlərdə yumşaq gücün tətbiqindən kənara çıxmır. Erməni cəmiyyətində isə Azərbaycanla növbəti dəfə hərbi toqquşmaya guc, təpər və istək olmadığından, Paşinyan əleyhinə başlanmış etiraz aksiyaları genişmiqyaslı müstəviyə keçə bilmir. Xüsusən də cəmiyyət onu müharibəyə sürükləyə biləcək "Qarabağ klanı"nın təmsilçilərinin iqtidara gəlməsindən ehtiyat edir. Bununla belə, millətçilik ab-havasının erməni cəmiyyətinə təsir imkanları hələ də qalmaqdadır".
Vidadi ORDAHALLI
