"Prezident Administrasiyasında siyasi partiyalarla görüş Azərbaycanda çoxdan başladılmış yeni siyasi konfiqurasiyanın formalaşdırılması prosesinin davamıdır. 4 ilə yaxındır gedir. Belə ki, Azərbaycanda keyfiyyətcə yeni siyasi sistem münasibətlərinin yaradılması Vətən müharibəsinin ilk günlərindən başladıldı. Bu prosesin təşəbbüskarı təbii ki, Prezident İlham Əliyev oldu".
Bu fikirlər "Bakı-Xəbər" Media Qrupunun rəhbəri, politoloq Aydın Quliyevin öz Facebook səhifəsində paylaşdığı statusunda yer alır.
A.Quliyev daha sonra yazır:
"Dövlət başçısı siyasi partiyaların Azərbaycanın tarixində misilsiz fenomen olan azadlıq və bütövlük müharibəsindən, böyük Qarabağ Zəfərindən kənarda qalmalarını rəva görmədi və strateji düşüncə sahibi olan lider kimi hər siyasi qüvvənin bütün potensiallarının ortaya qoyulmasına şərait yaratdı. Sadə dildə desək, İlham Əliyev istədi ki, bütün mənalarda qaçılmaz olan Qarabağ qələbəsində, Azərbaycanın ərazi bütövlüyünün və suverenliyinin ilk dəfə bərpasında bütün siyasi partiyaların az, ya çox dərəcədə payı olsun... Heç kim, heç bir partiya mənim bu mülahizəmdən inciməsin. Vətən müharibəsində Azərbaycan dövlətinin, onun konstitusion təmsilçisi İlham Əliyevin siyasətinə dəstək vermiş partiyalardan heç birinin siyasi fəhmini aşağılamaq, dəyərdən salmaq fikrində deyiləm. Lakin güman edirəm ki, bu siyasi partiya rəhbərlərinin hər biri uzun illərlə ölçülən böyük siyasət təcrübəsinin sahibləri olaraq anlamaya bilməzdilər ki, onların dəstək verib-verməməsindən asılı olmayaraq, İlham Əliyev seçilmiş hərbi həll yolunu uğurla başa çatdıracaq. Daha açıq və daha konkret deyək. İlham Əliyev Dağlıq Qarabağ münaqişəsinin hərbi həll yolunu illər öncə seçərək bu yolda hazırlıqlara başlayanda öz hesablarını siyasi partiyaların mütləq əksəriyyətlə ona dəstək verəcəyinin üzərində qurmamışdı. Əksinə, planlar siyasi partiyalardan mütləq dəstəyin olmayacağı şərti çərçivəsində hazırlanmışdı. Hətta hamı üçün olmasa da, bəzi siyasi qüvvələrin müharibə vaxtı arxadan zərbə vuracaqları da istisna deyildi. Lakin xoş bir haldır ki, siyasi partiyalar böyük fəhm nümayiş etdirə bildilər və Ali Baş Komandan olaraq İlham Əliyevin seçdiyi müharibə variantını ərazi bütövlüyümüzün bərpasına doğru ən tutarlı və ən kəsə yol kimi qəbul etdilər, bütünlüklə, hətta özünü radikal müxalifət hesab edən qüvvələr də bu böyük tarixi prosesə dəstək verdilər.
Mayın 16- da keçirilmiş görüş Prezidentin yeni siyasi münasibətlər modelinin formalaşdırılmasında tam ardıcıl olduğunu bir daha nümayiş etdirdi. Yəni hər kəs görə bilər və gördü ki, Prezident İlham Əliyev bütün siyasi partiyaların qatıldığı münasibətlər sisteminə təkcə müharibə şəraiti ilə bağlı fenomen kimi baxmır, əksinə, sağlam qüvvələrin hamısının bütün zamanlarda bir ortada olmasına ümummilli güc göstəricisi kimi baxır və onun təkmilləşdirilməsini daimi prosesə çevirmək istəyir. Təsadüfi deyil ki, görüşdə siyasi partiyaların mütləq çoxluğu ilə bərabər geniş spektrdə əlaqədar dövlət orqanlarının da təmsilçiliyi təmin olundu. Prezident Administrasiyası, MSK, Ədliyyə, Maliyyə nazirlikləri və Hesablama Palatası nümayəndələrinin iştirakının təmin olunması bir daha ifadə etdi ki, Prezident bu məsələyə mühüm dövlət siyasətinin ayrılmaz tərkib hissəsi kimi baxır. Heç şübhə yoxdur ki, siyasi partiyalar dövlətçilik siyasətinə bundan sonra da davamlı dəstək versələr, bu həm onların özlərinin daha güclü inkişafına şərait yaradacaq, həm də dövlətçiliyimizin gücünün ümumən artırılmasına dəstək olacaq.
Bu görüşün keçirilməsi ölkə Prezidentinin həmçinin siyasi partiyaların daha da inkişaf etməsində maraqlı olduğunu bir daha göstərir. Çünki dövlət orqanları ilə sağlam və işgüzar əməkdaşlıq bütün hallarda həm də partiyaların özlərinin inkişafına təkan vermiş olur.
Təəssüf ki, özünü hələ də ölkədə yeni siyasi münasibətlərdən kənarda qoymaq istəyən partiyalar var. Əlbəttə, bu onların öz seçimidir və müşahidələrə görə, ölkə prezidenti istisnasız olaraq bütün siyasi subyektlərin konstruktiv əməkdaşlığa və sağlam siyasi dialoqa qatılmasında maraqlı olduğunu göstərir. Özünü bu prosesdən kənarda qoyanlar isə əslində bəzi vacib məqamları unudur, ya da onları öz ambisiyalarına qurban verirlər. Belə ki, sürətlə irəliyə gedən Azərbaycandan çox-çox uzaqlarda qaldıqlarının və ya qala biləcəklərinin fərqinə varmırlar. Halbuki buna lazımi önəmi vermək çox vacibdir. Yaxşı haldır ki, Prezidentin yeni siyasi əməkdaşlıq modeli qurmaq siyasəti ölkənin mütləq əksər partiyaları tərəfindən dəstəklənir. PA-dakı görüşün təmsilçilik çevrəsi bunu əyani şəkildə göstərdi.
Azərbaycanda siyasi partiyaların fəal qatıldığı yeni konfiqurasiya quruculuğu cəmiyyətimizə və bütün beynəlxalq dairələrə təsirli mesajlar verir. Belə görüşlər Azərbaycan cəmiyyətini milli-siyasi birliyin nə qədər vacib olduğuna və bu işdə şəxsən Prezidentin nə qədər birləşdirici lider olduğuna bir daha inandırır. Eyni zamanda bəzi beynəlxalq dairələrə Azərbaycandakı milli-siyasi birliyi pozmaq cəhdlərinin mənasız olduğunu bir daha xatırladır.
Xaricdən baxan hər kəs üçün aydın mənzərə var. Dünənə qədər hakimiyyətlə hətta "əməkdaşlıq" kəlməsini dilinə gətirmək istəməyənlər bu gün yeni siyasi konfiqurasiyanın qurulmasına hakimiyyətin əməli tərəf-müqabili kimi həvəslə qoşulurlar. Xarici qüvvələrin isə buradan çıxarmalı olduqları ibrət odur ki, Azərbaycanda ilk dəfə 2020-ci ildə əsası qoyulmuş geniş milli-siyasi həmrəylik ölkənin ərazi bütövlüyünün və suverenliyinin bərpasına gətirib çıxardı. Böyük nəticədir. Bu nəticədə payı olan kimsə milli-siyasi birliyə zidd addım atmaz.
Yəni Prezident Administrasiyasının partiyalarla görüşü ölkədə siyasi həmrəylik üçün möhkəm bazanın yaradıldığını nümayiş etdirdi..."
MƏTLƏB
